Joba thuhril
3
1 Chu hnunga chun Joba chun a bau a phong a, a piengna ni chu trongsie a’n phur a. 2 Hieng hin a hril a:3 “Ka piengna ni chun trongsie phur sien,
Naupa a pieng ie!’ an ti zăn khomin.
4 Chu ni chu thimah inchang sien,
Chung Pathien khomin hre fu naw sien,
Thimin bawm khum tlat raw se.
5 Thim le thina hlimin hauh sien,
Sûmin bawm khum tlat sien la,
Sŭn thim chun sukthlabâr raw se.
6 Chu zân chu thim sain tuom sien la,
Chu kuma nihai lai thrang naw sien,
A thlà khom tiem sa ni naw raw se.
7 Chu zân chu ching song sien la,
Hlimna ri hrim hre ta naw raw se.
8 Trongsie inphur thiema mi hril,
Leviathan khom chok tho thiemhan,
Chu ni chu trongsie inphur raw hai se.
9 A sikhawvar chu inthimpek sien,
Var chu nghak thlawn dèr hai sien,
Ni êng hrim hmu naw raw hai se.
10 Ka nu sŭl lo khărpek lo a,
Hieng ang buoina tuok dinga,
A mi lo inpiengtir leiin,
Chu zân chun trongsie phur raw se.
11 Sŭla inthoka ka suok ni khan,
Ieng leia ka lo hlamzui naw?
12 Ka nu’n mal chungah mi chawi a,
Ieng leia nenetuia a mi chawm?
13 Ka pieng khan lo hlamzui lang,
Inin chawl hadam ta’ng ka tih,
14 Hnuoi lalhai le an khawnbawlhai,
Mani ta dinga hmun le hma indin,
Tlu rampek vong tahai leh chun,
Zăl hmun rem tlang tâng kan ta,
15 A nih, mi lien le lal hausahai,
Rangkachak le tangkaruo ngota,
An lal in sung siptuhai le chun.
16 Ieng leia ni êng hmu hman lo,
Hlàmzuia thi tahai ang el a,
Phŭm hmanga ka lo um naw?
17 Thlăna chun mi rilohaiin,
Buoina an siem ta ngai naw a,
Chăuhai an chawl hadam tah.
18 Tânghai khom chawl hadamin,
Vêngtuhai vauh khawng rihai,
Hriet ding hrim a um ta nawh.
19 Chu chun mi chîn mi lienhai,
An rêngin an zăl tlăng a,
Siehlawhai khom an pu lakah,
An zalen fihlim ta si.
20 “Ieng leia rinum tuor kuomah,
Var pĕka an um am a na?
Ieng leia lungril beidong kuomah,
Hringna pĕka an um am a na?
21 Thi châka thi thei si lo,
Ro phŭm rûk nèka nasaa,
Thìna daptuhai kuomah?
22 Thlăn muol an liem ni khuoa
Hlim le lawma siphai kuomah?
23 Pathienin an lampui hrukpêk a,
Däi a’n huon khumhai kuomah?
24 “Bu hrim hrim fa thei loin,
Trapin ka’n hniek hlop hlop a,
Ka beidong inrŭm ri khom,
Tui angin a’n baw hok hok.
25 Ka thil tuok inlâu rop chu,
Ka chungah a hung tlung a,
Ka thil pangzat rop hlak chun,
A mi hung nangchǐng ta si.
26 Hadamna ka nei naw a,
Ka um trok trok thei naw a,
Chawl damna hrim hmu loin,
Buoinain a mi nang vèl.”