1
1 Uz ramah mi pakhat a hming Joba a um a. Ama chu dem kai lo, mi indik famkim, Pathien tri mi le thil suol laka inthier fihlim mi a nih.2 Naupa pasari le naunu pathum a nei a.3 Beram sangsari, sanghawngsei sangthum, bawngchal tuok zanga, sabengtung zanga le siehlaw tam tak a nei a, khawsak ram tienga mihai lai chu a neinung tak a nih.
4 A naupahai chun mani in sengah ruoi an thrè insawk hlak a, an far pathumhai chu anni le faa dawn tlang dingin an fiel hlak a. 5 An ruoi thrè trumtriek pha leh Joba chun, “Ka nauhai hin thil suol thawin Pathien lo hril se pal hlauh rawi an tih” a ta, zing inhma takin a tho a, an rêngin a ko khawm a, inthienna dingin an hming kipin pumraw thilhlân a’n hlàn a, chu chu dana neiin a thaw zie hlak.
Joba fiea a um hmasatakna
6 Ni khat chu Pathien hmaah vantirkohaia an hung inlang a, anni lai chun Setan khom a hung thrang ve a. 7 LALPA chun Setan kuomah, “Khaw tienga inthoka hung am i na?” a ta. Setan chun, “Suk le tunga ka’n vàk vêlna hnuoia inthokin” a ta. 8 LALPA chun Setan kuomah, “Ka siehlaw Joba hi i thlithlai hlak am? Ama anga dem kai lo, indik famkim, Pathien trî mi le suol laka inthier fihlim hi hnuoi chungah tu khom an um nawh” a ta.
9 Setan chun LALPA kuomah, “Ni e, Joba chun a san boa Pathien a tri ni lo a! 10 Ama le a sungkuo le a thil neihai po po sîr tinah nangin i huol himpĕk a ni naw am a ni? A kut sinthaw mal i sawm a, a ram phêkah a beram le bawng ruolhai i sukpung a. 11 Tu hin a chungah kut inletin, a nei po po chungah i kut thlâk ta ngat la chu, hmai sanah hril se ngèi ngéi a ti che” a ta.
12 LALPA chun Setan kuomah, “Chuong a ni leh fie hrim ta la. A nei po po chungah i nuom ang angin thaw la, ama tak ruok chu tawk poi naw rawh” a ta. Chuongchun, Setan chu Pathien kuoma inthok chun a suok ta a.
13 Ni khat chu Joba nauhaiin an upa tak inah ruoi an kìl a, fain an dawn tlăng a. 14 Chuong lai chun Joba inah zuolko a hung a, “I bawngchal ruolin lo kei a, a bulah i sabengtung ruol an tlat laiin, 15 Sabe mihaiin an mi hung rŭn a, ranhai an lâk vong a, i siehlawhai khom an that a, keima chauh hi hung hril thei dinga tlân suok um sun chu ka nih” a ta.
16 A hril lai zing chun zuolko dang a hung tlung ve a, “Vana inthokin Pathien mei a hung tla a, i beram ruol le berampuhai a kàng hlum vong a, keima chauh hi hung hril thei dinga tlân suok um sun chu ka nih” a hung ti nawk a.
17 A hril lai zing chun zuolko pathumna chu a hung tlung a, “Mi rok pawl Kaldai mi pawl thum an hung a, i sanghawngseihai an lâk vong a, i siehlawhai an that a, keima chauh hi hung hril thei dinga tlân suok um sun chu ka nih” a ti a.
18 A hril lai zing chun zuolko dang a hung tlung a, “I naupahai le naunuhaiin an upa tak inah faa an dawn laiin, 19 thlalĕra inthokin thlipui hrât takin sir tinah an umna in chu a hung nuoi a, in chu a chim a, i nauhai a del hlum vong a, keima chauh hi hung hril thei dinga tlân suok um sun chu ka nih” a hung ti bok a.
20 Chuongchun, Joba chu a tho a, a puon a pot thlĕr a, a lu a vaw kol a, Pathien hmaah hnuoiah a bokkhup a. 21 Joba chun,
“Ka nu sŭla inthokin,
Saruokin ka hung pieng a,
Saruok boka kîr ding ka nih;
LALPAN iengkim a mi pĕk a,
LALPAN a lâk nawk vong a,
A hming chu inpâkin um raw se”