ESTHER
Thuhma
Esther lekhabu hi Thuthlung Hlui Baibul ei hmang laia bu sawmpasarina, bung 10 le chang 167 a sei, 470 B.C vela ziek a nih. A ziektu hi hriet ni naw sien khom Mordekai ni dinga ring (9:29) a nih. A thuziek kalhmang enin, Ezra amanih Nehemia amanih ziek ni dinga ring an um bok. Esther lekhabu hi Nehemia hnungah sie ni sienkhom, thil hung tlung an rikawt hi Nehemia thil rikawthai nèka kum sawmthum vela inhmaa thil tlung tah a nih.
Persia lal Zarzia, Judahaiin ‘Ahasuer’ tia an ko inlal laiin a lalna hnuoia ngirhmun insang tak chel Haman chun Babulon rama la cheng Judahai po po sukchimit vong dingin thu a phier a, sienkhom a mihai ta dinga thi huoma inpe Lalnu Esther zarin sietna ropui an tuok ding chu Judahaiin an pumpel a. Hi sansuokna lawmna hi kum tinin Judahaiin an hmang hlak a, chu chu Purim Kŭt an tih. Hi lekhabu hi Pathien thilthaw ropui chanchin hrilna ni sia Pathien hming voi khat khom inlang si lona, Baibul pumpuia lekhabu um sun a nih. Chun, hi lekhabu hi Baibula chieng lawnga ‘India’ hming inlangna um sun a ni bok.
A thu tlângpuihai
Lalnu Esther (1:1-2:23)
Haman thil phierruk (3:1-5:14)
Haman an khai hlum (6:1-7:10)
Judahaiin hnèna an chang (8:1-10:3)