3 Esther chu mitthli tla puma lal ke bula bokin, Judahai laka thil thra lo Agag mi Hamanin a lo remruot chu sukbo dingin lal kuoma chun a ngèn a. 4 Lal chun a rangkachak hmol chu Esther tieng chun a lek phei a, Esther chu a tho a, lal hmaa chun a ngîr a. 5 Lal kuoma chun, “Lalin thra a ti zawng a ni a, a mit ka tlung a, ka chungah a lung a awi chun, Agag mi Hamedatha naupa Haman remruota Judahai suksietna dinga lekha, lal rama biel po poa thon dara um chu thaw ta lo dinga hrilna lekha ziek ni thei sien ti ka ngèn a nih. 6 Ka chipuihai chunga sietna hung tlung ka hmu chu iengtin am tuor zo lul ka ta? Ka sungkuohai sukmanga an um chu iengtin am ka tuor zo ding?” a ta.

7 Lal Zarzia chun Lalnu Esther le Juda mi Mordekai kuomah, “Hamanin Judahai chungah kut a thlâk leiin Haman in le lo chu Esther kuomah ka pêk a, ama khom ka’n khaihlumtir ta a. 8 Judahai kuoma lal hminga thon ding i dit dan ang takin ziek la, lal suoi namin chăr rawh. Lal hminga ziek le lal kutsebia suoi nam le chăr ta chu sukdanglam thei a ni nawh” a ta.

9 Chuongchun, chu ni lâ là, thla thumna, Sivan thla, ni sawmhni le pathumnaa chun lal lekha ziektuhai chu Mordekai chun a ko a, a thupek ang chun Judahai kuoma dam, hotuhai kuoma dam, India rama inthoka Ethiopia ram chena biel hrang hrang za le sawmhni le pasaria ram optuhai le mi lienhai kuoma thon ding ram bung tina chenghai trong le hawropin lekha an buotsai a. 10 Chu lekha chu Lal Zarzia hminga ziek a ni a, lal kutsebi suoi an nam a, lekha chu sakor an inphurtir a, ama vai ngat sakor lien le hrât chi chunga chuongin an tlànpui a.

11 Chu lekhaa chun lal chun khaw tina um Juda mihai chu pungkhawma lo inveng him dingin a ti a. Khaw lai rama mi khom anni bei dinga hung inthok taphot chu lo bei lèt a, nu le nauhai khom suom a, an thil neihai rok a phalpèk a. 12 Lal Zarzia lalrama ram bung po po sungah chu thupek chu Judahai that ni dinga ruot, thla sawm le thla hnina, Adar thla, ni sawm le ni thumna nia hmang ding a nih. 13 Chu nia hmêlmahai chunga phuba an lăk theina dinga inpei sa diema Judahai chu an lo um theina dingin ram bung tina chun thon dar a, mi po po kuoma puong dinga ti a nih. 14 Chuongchun, lal thupek angin, lal dâk thaktuhai chun lal sakor lien le hrat chiah chuongin inhmaw takin an tlànpui a. Susa kul sunga khom lal thupêk chu an puong dar a.

15 Mordekai chun lal thuom, a dumpawl le a vâr inbelin, rangkachak lallukhum ropui tak a khum a, pat zai inhmia khawng korfuol senduk hakin lal ina inthok chun a hung suok a, Susa khawpuia mihai chun hlim takin lawmna an siem a. 16 Judahai ta ding chun hlimna le lawmna ni, chawimawia an um ni, ni hlimum a nih. 17 Lal thupêk a tlungna ram bung le khawpuia um Juda mi taphot chun hlim takin lawmna ruoi an thre a, umni an kham a. Chuong ramhaia mi tam tak chu Juda-ah an inchang a, Judahai trìna chun a man tawl si a.