Judahan hnĕna an chang
9
1 Judahai chunga lal thupekhai sukpuitling ni dinga ruot, thla sawm le thla hnina, Adar thla, ni sawm le ni thumna ni chu a hung tlung a. Chu ni chun an hmĕlmahaiin Judahai chu rawt chimit vong an inbeisei a, sienkhom a letling daiin thil a hung inher ta lem a. 2 Lal Zarzia ram bung hrang hranga chêng Judahai chu anni chunga kut thlak theitu laka inveng him dingin khawpuia hai chun an tlan khawm a, tu khom a ngam an um naw a, mi po poin an tri ta lem a. 3 Ram bung tina mi lien hai, ram optu hai le thoktuhai chun Mordekai chu an tri leiin Judahai chu an thrangpui a. 4 Mordekai chu lal ina chun ngirhmun insang taka hlangkai a ni leiin ram bung tinah a hming a’n thang a, a hung ropui ta deu deu a.5 Ni ruot ni a hung tlung chun Judahai chu an nuom ang angin an che a, an hmelmahai chu kawlhnâmin an sàm a, an that a, an sukbohmang a. 6 Susa kul sunga ringot khom mi zanga an that a. 7 Anni hmêlmatu an thathai lai chun Parsandatha hai, Dalfon hai, Aspatha hai, 8 Poratha hai, Adalia hai, Aridatha hai, 9 Parmashta hai, Arisai hai, Aridai hai, Vaizatha hai le 10 Hamedatha naupa Haman naupahai sawm an thrang sa a, sienkhom râllâk sum ruok chu an lăk nawh.
11 Chu ni zan tieng chun Susa kul sunga mi an that zat chu lal kuomah an hril a. 12 Lal chun Lalnu Esther a ko a, “Judahaiin Susa kula ringot khom mi zanga an that a, Haman naupahai sawm an that vong bok a. Hi hmuna hman chuong ang a ni chun, ram bung hrang hranga lem chu an chêt nasat dan ding chu hril loa hmâng a nih. Tu hin dit dang i nei chun mi hni rawh, pe’ng ka ti che. I hni taphot chu pĕk ni’ng a tih” a ta.
13 Esther chun, “Lalin rem a ti chun, Susaa Judahai hin voisuna ang bok hin a zingah la thaw hai sien la, Haman naupa sawmhai ruong chu khaihlumnaa chun khai kang ni sien” a ta. 14 Lal chun chuong ang taka thaw dingin thupêk a’n suo a, Haman naupa sawmhai chu an khai kàng a. 15 Adar thla ni sawm le ni lia chun Susaa Judahai chu an pung khawm nawk a, an hmĕlmahai mi zathum an that bel a, rallak sum ruok chu an lak nawh.
16 A ram sunga Judahai po po khom chu an pung khawm a, insanhim dingin thrang an khaw a, an hmĕlmahai chu mi singsari le sangnga an that a, sienkhom râllâk sum ruok chu an lăk nawh. 17 Chuong ang chun a ram pumpuiah Adar thla ni sawm le ni thuma chun an thaw a, a zinga chun hnena lawmin hlim takin ruoi an thre a. 18 Susaa mihai ruok chun a ni hninaa chun an hmĕlmahai chu an la that a, a ni thumnaa chun an chawl a, lawmna ruoi an siem a. 19 Chu lei chun, thingtlang khuoa um Judahai chun hi ni hni sung hin hlim taka ruoi threin umni an kham a, fak ding inpêk tonna niah an hung hmang ta pei a nih.
20 Chuong ang thil tlunghai chu Mordekai chun a ziek thlak a, Lal Zarzia lalram bung tina a hla le hnaia um Juda mihai kuoma chun a thon dar a, 21 Adar thla ni sawmpali le sawmpanga hi kum tina inser hlak dingin a’n cha a. 22 Hieng ni hnihai hi an hmĕlmahai laka ralmuonga an hung um tàk ni, an lungngaina chu lawmnaah inchang a, an trapna chu innuinaa a hung inchang ni a ni leiin, hlim taka ruoi thre a, mi retheihai kuoma thilpêk nia hmang dingin thu a pêk a nih.
Purim (Aisân) Kŭt
23 Chuongchun, an lo thaw tran tah ang le Mordekaiin lekhathona a hril ang chun kum tina inser zom pei dingin Judahai chun an remti a. 24 Judahai hmêlma Agag mi Hamedatha naupa Haman chun Judahai chu a sukbohmang hun ding ni le thla remchang zongin thrum a vawr a, chu thrum vawra aisan chu ‘purim’ an tih. 25 Amiruokchu, a thil phierruk chu lalin a hung hriet phing leh lal chun thupêk letling insuoin, Judahai chunga a thil phierruk chu Haman chungah a’n tlaktir a, ama le a nauhai chu an khai hlum ta lem a. 26 Chuleiin, hi kût hi aisanna dinga an thrum vawr hmingin Aisân (Purim) Kŭt an hung ti tah a nih. 27 Mordekai lekha insuo le an tonhriet thil lei chun hi ni inser hi a ram pumpuiah an hung thaw tran a, chu chu an thlahai le Juda mia hung inlet taphothai kuoma chun an inhlan sawng ta pei a. Hi nihai hi a hun taka pel dêr loa inser zie dingin thu an intiem bok a. 28 A ram sung biel tin le khaw tina sungkuo tinin hi ni hi hre zinga inserin, an thlahai le an suon la hung um peihai kuoma khom an inhlàn sawng pei ding a nih. Hieng nihai hi tawp loin Judahaiin an inser ding a na, an thlahai khomin hieng nia an chunga thil tlunghai chu an theinghil ngai ding a ni nawh.
29 Chuongchun, Abihail naunu Lalnu Esther le Juda mi Mordekai hai inkop chun lekha an thon bok a, chu taka chun Lalnu Esther-in Aisân Kŭt hmang dan ding thua Mordekai thupêk chu a namnghet a. 30 Chu baka chun, Lal Zarzia inlalna rambung za le sawmhni le pasaria Juda mi chênghai po po kuomah him tak le thlamuong taka an um an ditpui thu lekha an thon bok a. 31 Hieng lekhahai hin Juda mi Mordekai le Lalnu Esther thupèk anga kum tina a hun taka Aisân Kŭt chu hmang ding a ni thu a namnghet a. Mipuiin anni ta ding le an thlahai ta dinga bu ngheia sŭnna ni an lo ruot ang bokin hi kût hi inser dinga mipuiin an lo ruot a nih. 32 Aisan Kŭt hmang dan ding chu Esther thupèkna lekhaah a chuong.