3 Esther chun, “Lal mit ka tlung a, lal remti zawng a ni chun, ka hringna le ka mihai hringna mi hlàpêk hràm dingin ka hni chê a nih. 4 Kei le ka chipuihai chu that a, suom a, sukbohmang vong dinga zor hmang kan ni ta a. A nuhmei a pasalin bawia zor hmang vong ding ti ringot ni inlang chu, lal meu hang sukbuoina tham a tling naw leiin, ieng khom hril naw ning” a ta.

5 Lal Zarzia chun, “Chuong ang thil chu tuin am a thaw ding a na? Chuong ang thil thaw ngamtu chu khaw lai mi am a na?” a ta. 6 Esther chun, “Mi dotu le hmêlmatu chu hi mi rilo Haman hi a nih” a ta. Chuongchun, lalnu le lalpa hmaa chun Haman chu triin a hmêl a dâng a. 7 A uoiin dawn lai chu maksanin lal chu lungsen takin a tho a, lal huonah a lût a. Haman chun a chungah lalin thil thra naw thaw a tum nia a hriet leiin lalnu Esther kuoma chun a hringna hlàpêk dingin a ngĕn a.

8 Huona inthoka ruoi kilna pindana lal a hung kir lai chun Haman beidong chu Esther inthrungna thrungpha chunga chun a tlu a. “Hi lal ina ka bula lalnu a um lai zing khom hin suol lui a tum a ni hiel awm de!” a ti nghur a. Chuonga lal a trong phing leh Haman hmai chu an inkhum a. 9 Lal pindan vèngtu mi tilrehai laia pakhat, lal rongbawltu Harbona chun, “Ngai ta u, lal ta dinga thu thra hriltu Mordekai khaihlumna dingin Hamanin a inah meter sawmhni pahni le a chenvea insang inkhaihlumna a siem sa diem a um” a ta. Lal chun, “Chu taka chun ama hi khâi hlum ro” a ta. 10 Chuongchun, Mordekai khâihlumna dinga a buotsaia chun Haman chu an khai hlum a, lal lungsen chu a hung dei ta a.