Lalnu Esther
2
1 Lal lungsen a hung rè hnung chun Vasti thilthaw le a chungthua thupêk a’n suo chu a ngaituo neu neu a. 2 Lal siehlaw, a rongbawltuhai chun a kuomah, “Lal ta dingin nunghak thienglâm le hmêl thra zong kan tih. 3 Biel tina inthoka hung zongtu ding lalin mi ruot sien la, nunghak hmel thrahai chu Susa khawpuia lal hmeihai siekhawmnaah hung thruoi hai sien, nuhmeihai enkoltu mi tilre Hegai hnuoiah sie ni hai sien, an intuoinâmna ding seng pĕk ni raw hai se. 4 Chu zoah lal suklawmtu tak nunghak chu Vasti aia lalnu ni raw se” an ta. An thurawn chu lal remti zawng tak a na, chuong ang chun a thaw ta nghăl a.5 Susaa lal umna kul sunga chun Juda mi pakhat, a hming Mordekai a um a, ama chu Benjamin hnama mi Jaira naupa a na, Jaira pa chu Simei a na, Simei pa chu Kisa a nih. 6 Anni sungkuo chu Babulon lal Nebukadnezzarin sala Juda lal Jekonia a thruoi ruola Jerusalema inthoka sala a thruoi sà vè an nih. 7 Mordekai chun a pate naunu, nunghak nal le hmel thra tak el, a hming Hadasa, Esther tia an ko bok chu a umpui a, a nu le pa an thi hnunga a naunu anga a lăk le a keitlei a nih. 8 Lal thuruot ang chun, Esther khom nunghak tam tak lai Susaa lal hmeihai sie khawmnaa chun nuhmeihai vengtu mi tilre Hegai enkolna hnuoia um dingin an thruoi ve a. 9 Hegai chun Esther chu fel a ti hle a, ditsak takin a enkol a, fak ding thra bìk le intuoi nămna dinghai chu a pêk nghal a, a rongbawltu dingin lal ina inthokin siehlaw nunghak pasari a pêk bok a, lal hmeihai umnaa hmun thra taka chun a sie a. 10 Mordekaiin hril lo dinga a’n fŭi leiin Esther chun a chi le hnam nina chu tu khom a hril nawh. 11 Esther chu ieng am a chang ti hre dingin ni tin lal hmeihai umna tuolzawla chun Mordekai chu a fe hlak a.
12 Lal Zarzia kuoma nunghak tu khom thruoi a ni hmain thla sawm le thla hni sung an tuoi nàm a, thla ruk sung mura hriekin an zŭt a, thla ruk dang sung chu rimtui le hriek thra chiin an zŭt nawk a. 13 Lal kuoma a fe ve hun a hung tlung pha nal taka incheina ding thuomhnaw a dit ang tak chu an pĕk a. 14 Zan tieng lal pindanah a fe, a zing tûka chun mi tilre dang Sasgaz vĕngna hnuoia um lal hmeihai chĕngna in pahninaa chun an thruoi lŭt a. Lal suklawmtu le lalin an hming lama a ko nawkhai chauh naw chu lal kuoma chun kir nawk ta loin chu taka chun an dam sungin an um ta hlak a nih.
15 Mordekai pate Abihail naunu, Mordekaiin a naunu dinga a umpui Esther chu lal kuoma a fe ve hun a hung tlung chun, lal hmeihai vengtu mi tilre Hegaiin a tihai chauh naw chu thil dang ieng khom a thaw nawh. Esther chu a hmu taphot lung tlùk zawng mi a tling a. 16 Chuongchun, Tebet thla, thla sawmna,* Lal Zarzia inlala inthoka kum sarinaa chun Esther chu lal kuoma chun an thruoi lŭt a. 17 Nuhmei dang po po nêkin lal chun a hmangai a, nunghak thienglãm dang po po nêkin a ditsak a, lallukhum a’n khumtir a, Vasti aiin lalnuah a siem ta a. 18 Lal chun a mi lienhai le thoktuhai ta dingin Esther hmingin ruoi ropui tak a thre a, a ram pumah umni a’n khàmtir a, lal thaw dan ding ang hrimin inphal takin a thilhai a sem a.
19 Nunghak thienglãmhai an ko khawm voi hninaa chun Mordekai chu lal kota chun a’n thrung a. 20 Esther chun ama keitleitu Mordekai thu a zawm hlak ang khan a la zawm zing a, a chi le hnam nina chu tu khom a la hril nawh.
21 Lal kot bula Mordekai a’n thrung lai chun lal pindan vengtu laia mi pahnih, Bigthan le Teres hai chu Lal Zarzia chungah an lung a sen a, that tumin an phier rŭk a. 22 Chu thu chu Mordekaiin a lo hriet rŭk a, Esther a hril a, Esther chun Mordekai hmingin lal kuomah a hril a. 23 Chu thu chu an hang sui chieng chun thudik ngei a nih ti an hmu suok a, an pahni chun an khăi hlum a. Chuong thuhai po po chu lal kuoma um lal chanchin ziekna buah a chuong.