Hamanin Judahai sukram a tum
3
1 Chuong thil hnunga chun Lal Zarzia chun Agag mi, Hamedatha naupa Haman chu a’n kaisangtir a, mi lienhai po po neka insângah a hlangkai a. 2 Lal thupêk angin, lal ina thoktuhai po po chun Haman chu inzain, kûnin chibai an bŭk hlak a. Nisienlakhom, Mordekai chun a hmaah kûnin chibai a bûk nuom nawh.3 Lal ina thoktuhai po po chun Mordekai kuomah, “Ieng leia lal thupêk i bawsiet am a na?” tiin an indon a. 4 Chuong anga ni tina an hril khom chun a la zawm chuong naw rop leiin Mordekai um dan chu a ngaimaw le ngaimaw naw fiena dingin Haman chu an hril a, chun Juda mi a ni thu an kuoma Modekaiin a hril khom chu an hril sa bok a.
5 Mordekaiin kûna chibai a buk nuom naw thu Hamanin a hriet chun a lung a’n ling a. 6 Mordekai chung chauha kut hang thlâk chu hun tawkin a hriet naw a, Juda mi a ni thu an hril bok leiin Lal Zarzia lalram sunga Juda um po pohai chu sukchimit vong dan ding a zong a.
7 Lal Zarzia inlala inthoka kum sawm le kum hnina, thla khatna, Nishan thlaa chun chèt hun ding ni le thla remchang dapin, aienna dingin thrum an vawr an vawr a, thla sawm le thla hnina, Adarb thla ni sawm le ni thumah a tla a. 8 Chuongchun, Haman chun Lal Zarzia kuomah, “I ram sunga biel hrang hranga um dar hnam threnkhat an um a, an danhai chu hnam danghai dan leh an inang naw a, lal dan khom an zawm nuom bok naw a, chuong ang mihai inumtir zing chu lal ta dinga thil thra ni naw nih. 9 Lalin rem a ti chun chuong mihai chu sukhlum vong dingin thu insuo sien la, chu thil thawna ding chun lal sum sienaah tangkaruo kilogram nuoithum le singli hung pe’ng ka tih” a ta. 10 Lal chun a suoi namna kutsebi chu a phawi a, Judahai hmelma Agag mi, Hamedatha naupa Haman chu a pêk a. 11 Lal chun Haman kuomah, “Tangka chu nangman kol la, sienkhom chuong mihai chu i nuom ang angin thaw rawh” a ta.
12 Haman chun thla khatna ni sawm le ni thumahc lal lekha ziektuhai chu a ko a, a ram pumpuia biel tin optuhai le anni hnuoia thoktu le rorêltuhai po po kuoma puong dingin, biel tin trong le hawropin Lal Zarzia thusuok chu a’n ziektir a, lal kutsebi chun suoi a nam vong a. 13 Chuongchun, biel tinah mi an intlàntir a, lekha chu an thon dar chum chum a. Chu lekhaa chun Juda mi taphot, upa le naupang, nuhmei le nunauhai khom hlà nei dêr loa thla sawm le pahnina, Adar thla ni sawm le ni thum niad suom a, that a, ni khat thil thua sukchimit vong ding le Judahai thil neihai po po rok ding ti thu chu a chuong a. 14 A ni tiem nia mihaiin an thaw ding seng thaw thei dinga an inpuocha theina dingin lal thusuok chu hmun tina hnam tin kuomah a kawpi sem dar ding ti a ni bok a. 15 Lal thupêk angin, an rang thei ang taka thusuok chu puong dar dingin tlangval ngal hrathai chu an intlàntir a, Susaa lal umna kula chun an puong bok a. Chu zoah lal le Haman chu zu dawn dingin an inthrung a, Susa khawpui ruok chu namên loin a chi-ai a.