ESTHER
Lal ruoi thrè
1
1 India rama inthoka Ethiopia chen inkàr biel za le sawmhni le pasari chunga Lal Zarziaa inlal lai chun hi thil hi a hung tlung a. 2 Chuong lai chun Susa khawpuia a kula inthokin a lalram chu a op a. 3 A’n lala inthoka kum thumnaa chun lal nauhai le thoktu poimawhai ta dingin ruoi a buotsai a, Media le Persia rama sipai ofisar lien po po le biel tina mi lienhai le thoktu poimawhai chu a fiel kim vong a. 4 A hausakzie le a lalram ropuizie chu inentirin, thla ruk sûng zet chu chong an chĕn a.5 Ruoi trumtriek zo chun Susaa a lal in huon kotzawla chun a siehlawhai le thoktuhai, a chîn taka inthoka a lien tak chen ta dingin kar khat sung ruoipui a buotsai nawk a. 6 Kotzawl chu pat zâi inhmia mawi taka khawng puon var le dumpawlin a chei a, chuonghai chu sailungvar bana a kei bàtna ding tangkaruo kuol an hlinga chun puon senduk hruiin an khai a. A truong sailungvar sen le var inpol dam, tuikeplung le lung man tam chunga chun rangkachak le tangkaruoa siem thrungna an rem khup a. 7 Chi hrang hranga siem rangkachak no mawi tak takin lal uoiin chu lal thupek angin ren dêr loin an sem a. 8 Tu khom pe lui loa mi tin mani du ang tawk senga tam indawntir dingin uoiin semtuhai chu lalin a hril a.
9 Lalnu Vasti khomin Lal Zarzia ina chun nuhmeihai ta dingin ruoi a thrè ve a.
10 A ni sari nia Lal Zarzia-in uoiin a’n rui deu hnung chun a rongbawltu mi tilrè pasari Mehuman, Biztha, Harbona, Bigtha, Abagtha, Zethar le Karkas hai chu a ko a. 11 Lalnu Vasti hmel thratzie chu a mi lienhai inhmutir a nuom leiin, a lallukhum khuma a hmaa hung thruoi dingin anni rawi chu a tir a, lalnu hmêl chu a thra hle si a. 12 A mi tirhai chun lal thupêk chu an va hril a, sienkhom Lalnu Vasti chu a fe nuom naw a, lal chu namen loin a lungsen a.
13 Lal chun a thaw dan pangngaiin mi var, a hun laia thil chinchăng le dan hre mihai chu rawn dingin a ko khawm a. 14 Chuonghai chu Persia le Media ram sunga a mi lien pasari Karsena hai, Sethar hai, Admatha hai, Tarsis hai, Meres hai, Marsena hai le Memukan hai, lal inhnaipui le a mi rawn takhai an nih. 15 Lal chun, “Pindan vengtu mi tilrehai hmanga a dan ang taka lalin hung dinga a kona chu lalnu Vashtiin a zawm naw leiin, dan angin a chungah iem ei thaw ding a na?” tiin a’n don a.
16 Memukan chun lal le a mi lienhai kuomah, “Lalnu Vasti hin lal chunga chauh poi a tawk naw a, a ram pumpuia mi lien po po le Lal Zarzia khuo le tuihai po po poi khom a tawk a nih. 17 Lalnu Vasti thilthaw hi a rama nuhmei po poin hung hrieng an ta, ‘Lal Zarzian a kuoma hung dingin Lalnu Vasti thu a pêka chu a fe nuom nawh’ tiin hril sup sup an ta, an pasalhai hmusit phànain hmang an tih. 18 Voisuna Persia le Media rama mi lien nuhmei hunghai ngei khom hin, ‘Lal Zarziain a nuhmei lalnu Vashti chu hung dingin thu a pêk a, sienkhom a hungpèk nuom nawh’ ti an hriet charin ama thaw dan zuiin an pasalhai hmusit tum vêng an ta, a ram pumah inzanawna le inhalnan chin tawk nei naw nih. 19 Chuleiin, lal remti zawng a ni chun, lalnu Vasti chu lal hmaa inlang thei ta lo dingin thupêk, sŭt nawk thei ta lo, Persia le Media ram dana hmang ding insuo sien ti hi kan thurawn pek nuom chu a nih. Chun, lalin ama aiin a nêka thra lem lalnuah sie sien la. 20 A ram pumah lal thusuok puong dar a ni pha chun nuhmei tu khomin, a chîn taka inthoka a lien tak chenin, an pasalhai thu hung poisa ta’ng an tih” a ta.