4 Hieng thil hi a tlung hmain Pathien Tempula thil siekhawmna pindan po po enkoltu dingin Tobia sŭng hnaia mi chu thiempu Eliasib-in a ruot a, 5 Levihai, hla saktuhai le kotkhar vêngtuhai chanvo dinga Mosien a lo ruot, thilpêk an hung inhlàn beiphit hai, rimtui hai, bûr le bèl hai, bu le bâl sawma pakhat hai, uoiin le hriek thar hai le thiempuhai chanvo dinga thèn thilhlân an hung inhlànhai po po an sie khawmna pindan lien tak el chu Tobia thuneina hnuoiah a sie vong bok a.

6 Chuong hun lai chun Jerusalemah ka um naw a, Babulon lal Artazerzia inlal kum sawmthum le kum hninaah lal kuomah ka kir nawk a, a hnungah Jerusalema kir nawk phalna ka hni chu a mi phalpĕk a. 7 Jerusalem tieng ka kir nawk chun Eliasib-in thil thra lo tak thaw a, Tobia hluo dinga Tempul kotzawl a lo siempek chu ka hriet tak tak chau a. 8 Ka lung a sen hle a, Tobia thuomhnaw po po chu a pindana inthok chun ka dĕng suok a. 9 A pindan chu inthien fai dingin thu ka pêk a, Pathien Tempula bûr le bèlhai chu beiphit le rimtui thilhlânhai chu ka lâk lŭt nawk a.

10 Chun, Levihai chanpuola ruot chu an pĕk naw leiin rongbawlna tienga mawphurtu Levi mihai le hla saktuhai po po chu mani hmun le ram tieng seng an tlan dar vong tah ti ka lo hriet bok a. 11 “Ieng leia Pathien in hi in thlathlam am a na?” tiin rorêltuhai chu ka khak a, ka ko khawm a, an umna hmun ding senga chun ka’n umtir nawk a. 12 Juda mihai po po chun sawmapakhat bu dam, uoiin thar dam le hriek dam chu a siekhawmnaa chun an hung thak a. 13 Thil siekhawmna pindan po po enkoltu dingin thiempu Selemia hai, lekha ziektu Zadok hai le Levihai laia mi Pedaia hai chu ka ruot a. Anni thrangpuitu dingin Zakur naupa Hanan, Matania tupa chu ka ruot bok a. Hienghai hi mi ringuma inthang an na, an sinthaw ding chu an unauhai kuoma thil inruol taka sem a nih.

14 Aw ka Pathien, hi ka thilthaw thrathai lei hin mi hre zing la, ka Pathien Tempul ta dinga indik taka ka thawhai hi mi theinghilpek naw rawh.

15 Sabat voi khat chu Judai rama mihaiin grêp sawrna khura grêp an chìl lai ka hmu a. A threnin buphal an hung chawi a, inphurtir dinga sabengtung chunga an siem lai dam ka hmu bok a. Jerusalema zor dingin Sabat niin uoiin dam, grêp dam, theichang dam le an tharsuok chi hrang hrang dam chu an hung phur a. Sabata thil an zor lei chun ka zil tawl a. 16 Tura khuoa inthoka zor ding nga le thuomhnaw hung tol pawl khom ka hmu a. Chuonghai chun Judai ram khaw hrang hrang chu hril lo, Jerusalema chen khom Sabat niin an hung zor a nih.

17 Chuongchun, Juda hotuhai chu khakin, “Ieng leia hienga Sabat in sukporche am a na? 18 In pi le puhaiin hieng thil hi an lo thaw hlak leia Pathienin eini chunga le ei khawpui chunga buoina a hung intlungtir hi in la dit tawk naw am a ni? Hienga Sabat in sukporche hin Pathien lungsenna chu Israel mipuihai chungah nasa nawk zuolin in chok tho a nih” tiin ka zil tawl a. 19 Chuongchun, Zirtawp zan tieng Sabat intran an thim chara inthoka Inrinni zan tienga Sabat tawp chenin Jerusalem kul kotpui po po khar vong dingin thu ka pêk a. Sabat niin thuomhnaw ieng khom Jerusalemah an hung phur lut nawna dingin kotpui tin chu ka mihai ka’n vĕngtir a. 20 Voi khat voi hni chu Jerusalem velah thuomhnaw phurtuhai chu an hung inkul a. 21 Sienkhom an thaw indik nawzie inhriettirin, “Ieng dinga kul bulah in hung zăn riek am a na? In thaw nawk vai chun in chungah kut kan thlăk ding a nih” tiin ka vau tawl a. Chu taka inthok chun Sabat ni hrim hrimin an hung nawk ta ngai nawh. 22 Chun, Levihai chu inser thienghlim a, Sabat thienghlimna vong dinga kul kotpuihai vêng dingin thu ka pêk a.

Aw ka Pathien, hi chungthua khom hin mi hre zing la, i hmangaina nasa tak zărin ka chunga hin zangaina inlangtir rawh.

23 Chuong hun lai bok chun Asdod le Amon le Moab minuhai chu Juda mihaiin nuhmeiah an nei ka hmu a, 24 an nauhai chun Juda trong thiem loin Asdod trong an naw leh chuong laia hnam danghai trong chu an hmang lem a. 25 Anni chu ka khak tawl a, trongsie ka’n phur a, a thren ka vuok a, an sam ka pot thlakpek a, an naunuhai chu chuonghai naupahai chu pasala inneitir lo ding le an naupahai khomin chuonghai naunuhai chu inneitir lo dingin Pathien hming sâlin thu ka’n khămtir tawl a. 26 Chun, an kuomah, “Israel lal Solomon ngei khom kha hieng anga innei pol thil lei hin thil suol a thaw a ni naw am a ni? Ama tluk hrim hnam danghai lai lal an um nawh. Pathienin a hmangai a, Israelhai chungah lalah a sie a ni kha. Sienkhom ama meu khom kha hnam dang nuhmeihaiin suolah an thruoi lŭt a nih. 27 Chuong ang chun nangni khomin thil rilo rapthlak thaw vein, Pathien chungah ringum loin, ram dang mi nuhmeiah in nei ve ding am a ni?” ka ta.

28 Thiempu lal Eliashib naupa Joiada nauhai laia pakhat chu Horon mi Sanbalat makpa a na, chuleiin ka kuoma inthokin ka hnot suok a nih.

29 Aw ka Pathien, thiempu an nina leia an ngirhmun chel chu sukporche a, thiempuhai le Levihai thuthlung chu an bawsiet leiin hre zing tawl rawh.

30 Chuong ang chun ram dang mihai lakah ka sukthienghlim tawl a, thiempuhai le Levihai chu an sin ding seng le an rongbawl dan ding seng ka ruotpek a. 31 A hun taka maichăma hmang ding thing an hung pêk ngèi dan ding le thiempuhaiin thlai thar hmasa tak an lak khawm dan dinghai khom ka ruotpek vong a.

Aw ka Pathien, a thra tiengin mi hre zing rawh.