8 Levihai chu Jesua, Binui, Kadmiel, Serebia, Juda le lawm thu hrilna inkhawma hla saktuhai inrawitu Matania le a unauhai, 9 Bakbukia le Uni le an unauhai, inkhawmnaa anni epa ngir hlakhai chu an nih.

10 Jesua chu Joiakim pa a na, Jehoiakim chu Eliasib pa a na, Eliasib chu Joiada pa a na, 11 Joiada chu Jonathan pa a na, Jonathan chu Jadua pa a nih.

12 Hienghai hi Joiakim dam laia thiempu sungkuoa lukhâituhai chu an nih: Seraia sungkuoah Meraia; Jeremia sungkuoah Hanania; 13 Ezra sungkuoah Mesulam; Amaria sungkuoah Jehohanan; 14 Maluk sungkuoah Jonathan; Sekania (Sebania) sungkuoah Josefa; 15 Harim sungkuoah Adna; Meremot (Meraiot) sungkuoah Helkai; 16 Ido sungkuoah Zekaria; Ginethon sungkuoah Mesulam; 17 Abija sungkuoah Zikri; Miniamin sungkuoa le Moadia sungkuoah Piltai; 18 Bilga sungkuoah Samua; Semaia sungkuoah Jehonathan; 19 Joiarib sungkuoah Matenai; Jedaia sungkuoah Uzi; 20 Salu sungkuoah Kalai; Amok sungkuoah Eber; 21 Hilkia sungkuoah Hasabia; Jedaia sungkuoah Nethanel hai an nih.

22 Persia lal Daria inlal laiin Levihai sungkuoa lukhâituhai le thiempu lal Eliasib hai, Joiada hai, Johanan hai le Jadua hai hun laia thiempuhai sungkuoa lukhâituhai chu fel takin rikawt an siem a. 23 Chu inchikna bua chun Levihai sungkuoa lukhâituhai chu Eliasib tupa Johanan dam lai hun chena mi a chuong a. 24 Chu taka Levi sungkuoa lukhaituhai chu Hasabia hai, Serebia hai, Kadmiel naupa Jesua hai le an unauhai, Pathien mi Davida’n a lo ruot anga lawmthu hril inkhawma a pawl pawla indota trongtrai le hla saktu dinga anni rawi epa ngir hlak hai chu an nih. 25 Kotkhar vêngtuhai laia kotpui bula rosum siekhawmna pindanhai vengtu chu Matania hai, Bakbukia hai, Obadia hai, Mesulam hai, Talmon hai le Akub hai an nih.

26 Hienghai po po hi Jozadak naupa Jesa, chu naupa Joiakim hai, ram optu Nehemia hai le thiempu le lekha ziektu Ezra hai hun laia rongbawltu an nih.

27 Jerusalem kul thar inhlàn nia darbenthek le perkhuong le tringtrang rema lawmthu hrilna le inpakna hlahai hlim taka saktu dingin a ram sunga um Levihai po po chu an inchă khawm a. 28 Anni chu Jerusalem le a sè vel le Tempul siehlawhai umnaa inthokin an hung fuon khawm a. 29 Hla saktuhai chun Jerusalem kawl velah umhmun an lo khuor tah leiin a thren chu Beth-gilgal le Geba le Azmavet vela inthok khomin an hung bok a. 30 A hmasa takin thiempuhai le Levihai chu an inhlàn thienghlim hmasa phot a, chu zoah mipuihai le kul kotpuihai le banghai chu an inhlàn thienghlim a.

31 Judai rama thruoituhai chu kul bang chung zawla chun ka thruoi a, inpâkna hla saktu ding pawl hni tam tham tak ve ve ka ruot a. Zaipawl pakhat chun kul bang chung zawl sim tieng Hnawlhnok Kotsuo an pan a, 32 Hosaia le Juda thruoitu a zatvein an zui a, 33 chuonghai lai chun Azaria hai, Ezra hai, Mesulam hai, 34 Juda hai, Benjamin hai, Semaia hai le Jeremia hai an thrang a, 35 tawtawrawt muttu thiempuhai chu an thrang sa bok a. Anni hnunga chun Asaf thlaa mi Zakur, chu naupa Mikaia, chu naupa Matania, chu naupa Semaia, chu naupa Joanathan, chu naupa Zekaria chun a zui a. 36 Chu zoah Zekaria thawpuihai Semaia hai, Azarel hai, Milalai hai, Gilalai hai, Maai hai, Nethanel hai, Juda hai le Hanani hai chun hnung an dàl a. Lekha ziektu Ezra-in hma a thruoi a, Pathien mi Davidan rimawi hmangruo a lo ruot ang char chu an tum a. 37 Tuikul Kotsuoa inthok chun Davida khawpui tieng kailawnah an pan tung a, Davida in chu an fe khèl a, sak tienga Tuikul Kotsuo an pan a.

38 Anni intuokpui dingin zaipawl pahnina chu hmar tieng pangah an fe kuol a, kei le mipui a zatvein kan zui a, kul bang chungah Thuk Insang fe thlengin Bang Sei chung kan hraw a, 39 khawpui hlui kotsuoa Efraim Kotpui chungah, chu zoah Nga Kotpui chungah fein, Hananel Insang fe pelin Za Insang tieng kan pan a, fepeiin Beram Kotpui kan pèl a, Kotkhar vengtuhai kotpui chen kan fe a.

40 Inpakna hla saktu zaipawl pahnihai chun Pathien Tempul an pan a, an hmun dinga ruota chun an ngìr a, kei le rorêltu a zătve chun kan zui lŭt a. 41 Tawtawrawt chawi thiempu Eliakim hai, Maaseia hai, Miniamin hai, Mikaia hai, Elioenei hai, Zekaria hai le Hanania hai le 42 hla saktu Maaseia hai, Semaia hai, Eleazar hai, Uzi hai, Jehohanan hai, Malkija hai, Elam hai le Ezer hai khom chu an lŭt a, zaipawl thruoitu Jezrahia inrawina hnuoiah rimawi remin, inring tak le fie takin hlapawl an sak a. 43 Chu ni hlimuma chun hlànbiek tam tak an inhlăn a, Pathienin hlimna nasa tak a pêk a. Nuhmei le naupanghai khom lawmnaa chun an thrang a, Jerusalema an hlim ri chu hla taka inthok khomin hriet phak a nih.

44 Chu ni chun thilpêk hai, lo tharsuok hmasa tak hai le sawma pakhat hai siekhawmna pindanhai enkoltu ding an ruot a, anni chun danin a phŭt anga chuong thilhai chu loa inthoka thiempuhai le Levihai ta dinga la khawm dingin mawphurna an lăk a, Judai ram mi po poin thiempuhai le Levihai rongbawlna chu an hlutpui si a. 45 Davida le a naupa Solomon thupĕk angin, hla saktuhai le kotkhar vêngtuhai khomin Pathien rong an bawl dan ding le an insukthienghlim dan ding chu an zawm a. 46 Pathien kuoma lawm thu hrilna le inpakna hla an sak phaa zaipawl thruoitu an nei hlak chu kha hmaa Davida le Asaf hun lai daia an lo thaw tran tah a nih. 47 Zerubabel dam lai le Nehemia dam lai chen khom hla saktuhai, kotkhar vêngtuhai le Levihai fak ding chu mipuiin an hung tumpek hlak a. Levihai chun an chana inthokin Aron thlaa mi thiempuhai chanvo ding chu an sie hrangpek nawk hlak.