9 Levi chia inthoka namnghettu chu Azania naupa Jesua, Henedad sungkuoa mi Binui, le Kadmiel 10 le an Levi chanpui Sebania, Hodia, Kelita, Pelaia, Hanan, 11 Mika, Rehob, Hasabia, 12 Zakur, Serebia, Sebania, 13 Hodia, Bani le Beninu hai an nih.

14 Mipui tienga namnghettu hotuhai chu Paros, Pahat –Moab, Elam, Zatu, Bani, 15 Buni, Azgad, Bebai, 16 Adonija, Bigvai, Adin, 17 Ater, Hezekia, Azur, 18 Hodia, Hasum, Bezai, 19 Harif, Anathot, Nebai, 20 Magpias, Mesulam, Hezir 21 Mesezabel, Zadok, Jadua, 22 Pelatia, Haanan, Anaia, 23 Hosea, Hanania, Hasub, 24 Halohes, Pilha, Sobek, 25 Rehum, Hasabna, Maaseia, 26 Ahia, Hanan, Anan, 27 Maluk, Harim le Baana hai an nih.

28 Namnghettu mi danghai chu thiempuhai, Levihai, kotkhar vêngtuhai, hla saktuhai, Tempula siehlawhai le Pathien dan zawm tuma an sè vela umhai laka insie hranghai le an nuhmeihai le chinchang hre thei tah an naupahai le naunuhai chu an nih. 29 Hienghai hin an unauhai le an mi lienhai thu chu chel tlatin, Pathien siehlaw Mosie pĕk Pathien dan zawm a, LALPA, kan Pathien thupêk po po le a rorêlnahai le thuruothai chu fimkhur taka zawm le vong dingin inkhâm meuin thu kan thlung a.

30 “Kan kawl le kienga chenghai chu kan naunuhai inneitir loa, kan naupahai ta ding khoma an naunuhai chu nei bok lo dinga inkhâmin thu kan intiem.

31 “Kan kawl le kienga mihaiin thuomhnaw amanih fak ding thil amanih zor dinga Sabat ni le umni khama ni kan inser chànga an hung phur hrim hrim chu inchawpêk lo dingin kan intiem. Chun, kum sarina zâtin lo thaw loa ram chu inawl ding le kan laka Juda mi leibat chu thai bo dingin inkhâmin thu kan intiem bok.

32 “LALPA in siemna dinga sum mamaw tawk a um theina dingin, kum tin sekel hmun thuma threa hmun khat pĕk dinga thupêk um chu sukpuitling dingin mawphurna lăk kan intiem. 33 Chu thawlawm chun chatlak loa hlanbei sie ding dam, bu le bâl inhlànna le pumraw thilhlàna ding dam, Sabat ni le thla thar lawmna le kum tina kût hrang hrang hmangnaa ding dam, thil thienghlim inhlànnaa ding dam, Israel mihai ta dinga suol ngaidamna dinga inremna thilhlân ding dam le kan Pathien tempula thaw trûl dang po poa hmang ding mamawhai dam phuhrûk a tih.

34 “Dànin a phŭt anga LALPA kan Pathien maichăma tì ding kum tina a hun bi ruot ang thlapa kan Pathien Tempula thing hung latu ding sungkuohai hrietna dingin thiempuhai, Levihai le mipuihaia inthokin thrum vawrin kan sukthluk.

35 “Kan lo tharsuok bu le bâl le thlai thar hmasa tak le kan thing le thei kung ra hmasa takhai chu LALPA Tempula hung chawi rop dingin kan intiem. 36 Kan naupa pieng hmasa takhai le kan ran pieng hmasa tak, kan bawng ruol le beram ruolhai laia pieng hmasa takhai chu dănin a phŭt anga LALPA ta dinga kan Pathien Tempula rongbawltu thiempu kuoma inhlàn kan remti.

37 “Kan bei hmet hmasa tak hai, kan bu le bâl thilhlân hai, thing le thei chi tinreng ra hmasa tak hai, uoiin thar le hriek thar hmasa tak hai laia a thra tak pei chu LALPA ina a siekhawmnaah thiempu kuomah hung chawi dingin kan intiem. Kan lo tharsuok sawma pakhat changtu ding le chu chu kan umna khaw tina la khawmtu dinga ruot Levihai kuomah kan lo tharsuok sawma pakhat hung chawi seng dingin kan intiem. 38 Levi chihaiin sawma pakhat an laka inthoka sawma pakhat chu Aron thlaa mi thiempuhai ta dingin kan Pathien Tempula ro siekhawmnaah an pek ve hlak ding a nih. 39 Israel mihai le Levihai chun bu le bâl thilhlânhai le uoiin thar le oliv hriek thar inhlănhai chu Tempulah hung chawi an ta, rongbawltu thiempu le kotkhar vêngtu le hla saktuhai ngirna bula a siena ding bawm thienghlima chun sieng an tih. Kan Pathien in hi chu ngaithâ lo dingin kan rêngin kan intiem” tiin.