4 Levi mi threnkhat Jesua, Bani, Kadmiel, Sebania, Buni, Serebia, Bani le Kenani hai chu kailawnah an ngìr a, rawl inring takin LALPA an Pathien chu an ko a. 5 Levi mi bok Jesua, Kadmiel, Bani, Hasabneia, Serebia, Hodia, Sebania le Pathahia hai chun mipui kuomah, “Ngîr unla, chatuona inthoka chatuon chena LALPA in Pathien chu inpâk ro” tiin an khèk a.

7 “Nang chu LALPA Pathien, Abram thlangtu, Kaldai ram Ur-a inthoka thruoi suoktu le a hminga Abraham saktu i nih. 8 A lungril chu i lakah ringumin i hriet a, Kanan hai, Hit hai, Amor hai, Periz hai, Jebu hai le Girgas hai ram chu a thlahai kuoma rochung dingin thu i thlungpui a, i fel leiin i thutiem chu i hlen ngei bok a.

9 “Aigupta rama kan pi le puhai rinum tuor chu i hmu a, Tuipui Sena an kona che rawl chu i ngaithlak a. 10 Aigupta mihaiin hmusit taka an soisak i hmu zing leiin, Faraw le a siehlaw po pohai le a rama um po pohai chungah inchiknahai le thilmakhai i’n langtir a, chuong ang chun tu chen hin hming i siem a. 11 An hmaah tuipui chu i suktan a, hnuoi hulah an fe thleng a, a hung hnottuhai ruok chu lipuia lung thlak ang elin tuipui inthŭkah i pei hmang tawl a. 12 Sŭnah sûm lawnin i thruoi a, zănah an fèna lampui elvartu dingin mei lawnin i thruoi bok a.

13 “Sinai tlăngah i hung trum a, vana inthokin an kuomah thu i hril a. Rorêlna indik le fel, dan indik le fel le thuruot le thupek thra takhai chu i pêk a. 14 I chawlni thienghlim chu anni i’n hriettir a, i siehlaw Mosie hmangin thupêkhai, thuruothai le danhai chu i pêk a. 15 An phìng a trâm pha vana inthokin bu i pêk a, an dangchăr pha lungpuia inthokin tui i pêk bok a. Kut phar meua an kuoma pĕk i tiem rama chun lûta rochung dingin i hril a.

16 “Sienkhom, kan pi le puhai chun chapo takin lulul an insuo a, i thupêk an zawm nuom nawh. 17 I thu an ngaithlak nuom naw a, anni laia thilmak i thawpekhai khom an hriet zing nuom ta nawh. Lulul takin an um a, an hel a, bawia an intăngna tienga thruoi kîr nawktu dingin hotu an ruot ta lem a. Nisienlakhom, nang chu ngaidam dinga inpei zing Pathien, mi lunginsiet thei tak, lainatna hau tak, lungsen mei mei lo le hmangainaa sip i ni a, 18 bawngtuoi lim siem a, ‘Hi hi a nih Aigupta rama inthoka thruoi suoktu cheu in Pathien chu’ tia tirdakum taka i hming an hril siet lai khom khan anni chu i thlathlam chuong nawh.

19 “I ngilneina nasa tak leiin anni chu thlalera khan i thlathlam chuong naw a, an lampuia sŭna thruoitu sûm lawn chun a maksan naw a, zăna an lampui elvartu mei lawn chun a maksan ngai bok nawh. 20 Anni inchuktirtu dingin i Thlarau thra tak chu i tir a, an phingtrămin vana inthoka mana pêk i thrul naw a, an dangchar khomin tui pĕk i thrul chuong bok nawh. 21 Kum sawmli sung zet thlalĕrah i chawm tawl a, ieng khom an tlasam naw a, an silfenhai a triek naw a, an kehai a’n vûng bok nawh.

22 “Lalramhai le hnam danghai chu an kutah i pêk a, ram hla le kilkhawr chenin an ram i zauhpek a. Hesbon lal Sihon ramhai le Basan lal Og ramhai chu an hluo a. 23 An thlahai chu vana arasi anga tamin i sukpung a, an hluo dinga an pi le puhai kuoma i lo hril tah rama chun i thruoi lŭt a. 24 An thlahai chun ram chu an hluo a, nangin chu rama um Kanan mihai chu an hmaah i suktlawm a, an nuom nuoma thaw dingin an lalhai le chu rama umhai chu an kutah i pêk a. 25 Kul nei khuohai le ram thra tak tak hai chu an lăk a, thil thra tinrênga sip inhai an hluo a, tuikhur cho sa, grêp huon hai, oliv huon hai le thei kung bil tam tak an hung nei a, tlai takin an infăk thău a, i thratna nasa tak chungah inhoi an chĕn a.

26 “Sienkhom thu an awi naw a, i lakah an hel a, i danhai chu an hnung son a. Nangma tienga kir nawk dinga ziltu zawlneihai chu an that a, nangma hrilsietna thil tirdakum tak tak an thaw a. 27 Chuongchun, suknomnatna tuor dingin an hmĕlmahai kutah i pêk suok tawl a. Chuonga sawrdea an um phing leh nangma chu an hung ko che a, vana inthokin i lo ngaithlak a, i ngilneina nasa tak leiin sansuoktuhai i pêk a, an hmĕlmahai kuta inthokin an san suok a.

28 “Amiruokchu, muongleia an um charin i mithmuah thil thra lo an thaw zui nawk nghal a. Chuongchun, an hmĕlmahai hnuoia kûn dingin an kutah i pêk a. An hung ko pha che leh vana inthokin i lo ngaithlak a, voi tam tak i ngilneina leiin i san suok tawl hlak a.

29 “Chun, i dăna hung kir nawk dingin i zil hlak a, sienkhom chapo takin thil an thaw a, i thupêkhai an pom naw a, a zawmtuin a hringpui ngei ding i rorelnahai chu kalin thil suol an thaw a, tuklul insuoin tukkhum an innghat che a, an insuklŭlul a, an ngaithlak nuom nawh. 30 Kum tam tak chu an chungah i dawthei a, i Thlarau chun zawlneihai hmangin i zil ngat ngat a, an poisa chuong naw leiin an tuolbawmhai kutah i pêk tawl a. 31 Sienkhom, i ngilneina nasa tak leiin anni chu i sukchimit phal naw a, i thlăthlam song ngai bok nawh.

32 “Chuleiin, kan Pathien, Pathien ropui, iengkimthawthei le râpum, thuthlung hlena lunginsietna suklangtu chun kan chunga le kan lalhai, mi lienhai, thiempuhai, zawlneihai, kan pi le puhai le i mihai po po chunga Asuria lalhai inlal laia inthoka tu chena kan chunga rinumna hung tlung zozai hi thil chîn thamah mi ngaipek naw hram rawh. 33 Ieng khom ni sienla, kan chunga thil hung tlung po poa hin nang chu i fel a, indik takin thil i thaw a, keini ruok chun thil thra naw takin kan thaw a nih. 34 Kan lalhai, kan mi lienhai, kan thiempuhai, kan pi le puhai khomin i dăn an lo zawm naw a, i thupêk le i thu inhriettirhai le anni i zilnahai chu an lo pom bok nawh. 35 An chunga i hang thrat êm êm vei leh, an ramah, ram lien tak le thra tak i pĕka chun i rong an bawlpêk si naw che a, an thil suol thaw an ma chuong bok nawh. 36 Ngai ta, tu ruok hin chu bawi kan ni ta a, kan pi le puhai tlăn dinga a ram tharsuok thil thra i pĕk rama hin bawi kan lo ni tah. 37 Kan suol leia kan chunga lala i ruothai hlak chun an hausak pha a, kan taksa le kan ranhai chunga chen khom an nuom nuomin thu an nei a, kan bei a dong êm êm a nih.

38 “Chuong po po lei chun i kuomah ziek ngeiin thu khŭn takin kan thlung a, kan mi lien hai, Levihai le thiempuhaiin an suoi namin an mi namnghetpui a nih” tiin.