Ezra’n Dan bu a tiem
8
1 Thla sarina, favang laihawlaa mani khuo senga Israelhai an inbengbel hnung chun, mi po po chu zai khata luongin Tuikul Kotpui bula tuolzawla chun an hung pungkhawm a. LALPAN Israelhai zawm dinga thu a pek, Mosie Dan bu chu hung laa tiem dingin lekha ziektu Ezra chu an ngèn a.2 Chuongchun, thla sarina ni khat ni chun thiempu Ezra chun nu tling pa tling pungkhawmhai le a hre thiem thei chin po po hmaa chun Dan bu chu a hung chawi a. 3 Tuikul Kotpui khèla tuolzawl tieng chu nghain, zing tienga inthoka sŭn chang chenin mi po po hriet theia inringin Dan thu chu a tiem a, mipui chun ngun takin an ngaithlâk thrup a. 4 Chu huna dinga thram an dawa chun lekha ziektu Ezra chu a ngîr a. A chang tieng chun Matithia hai, Sema hai, Anaia hai, Uria hai, Hilkia hai le Maaseia hai an ngìr a. A voi tieng chun Pedaia hai, Misael hai, Malkija hai, Hasum hai, Hasbadana hai, Zekaria hai le Mesulam hai an ngîr bok a.
5 Ezra chun mi po po mithmuah lekhabu ziel chu a hang sŭt a. Mipui chung tienga ngir a ni leiin an hmu thei vong a, a hang sŭt lai chun mipui an ngîr vong a. 6 Ezra chun LALPA, Pathien ropui tak chu a’n pàk a, mipui po po chun bân pharin, “Amen, Amen” tiin an lo don a, hnuoi sikin an bokkhup a, LALPA an chawibiek a. 7 Levi mi Jesua hai, Bani hai, Serebia hai, Jamin hai, Akub hai, Sabethai hai, Hodia hai, Maaseia hai, Kelita hai, Azaria hai, Jozabad hai, Hanan hai le Pelaia hai chun ngir zinga um mipuihai chu dan thu an hrilfie a. 8 Pathien Dan chu an tiem a, tlar tin chu an hriet thiem vong theina dingin an tiem non a, chieng takin an hrilfie a.
9 Dăn thu an hang hriet chun mipui chu an trap mur mur leiin ram optu Nehemia hai, thiempu le lekha ziektu Ezra hai le mipui inchuktirtu Levi hai chun mipui kuomah, “Voisun hi LALPA in Pathien ta dinga ni thienghlim a na, thla suksieta trap hun a ni nawh” an ta.
10 Nehemia chun, “Fe unla, ruoi inhnik hnik fain, uoiin thlum thlum dawn unla, ieng khom buotsai ve nawhai khom sem ve ro. Voisun hi LALPA ta dinga ni thienghlim a nih. Lungngaiin um naw ro, LALPA lawmna chu in hrătna a ni si a” a ta. 11 Levihai khomin mipui kuomah, “To unla, trap ta naw ro. Voisun hi ni thienghlim a nih. Lungngai naw ro” tiin an lo zăp dei a. 12 Chuongchun, Pathien thuhai ngaithlaa an hriet thiem bok lei chun lawmna ruoi faa dawn ding le făk ding thilpekhai sem a, hlim taka chu ni chu hmang tlâng dingin mipuihai chu in tieng an inlawi ta a.
Bawkte Kŭt
13 Chun, chu thla, ni hninaab chun sungkuo tin khaituhai le thiempuhai le Levihai chu dan thu inchûk dingin lekha ziektu Ezra kuomah an fe khawm a. 14 Dan thu an inchŭk a, thla sarinaa kût an hmang lai chun Israel thlahai chu sawlbŭkah an um ding a nih ti LALPAN Mosie hmanga thu a pĕk chu an hmu suok a. 15 “Tlangah hang fe unla, danin a phŭt anga kût hmang sunga umna ding sawlbŭk bawlna ding oliv kau dam, oliv suok kau dam, inhmui kau dam, tûm kau dam le theichang kau dam hang la ro” tia khuo po po le Jerusalema tlang insamtir dinga thu a pĕk dam chu an tiem suok a. 16 Chuongchun, mipuihai chu an inthok suok a, an va làk a, mi po poin an in chunga dam, an tuol kota dam, Pathien Tempul kota dam, Tuikul Kotpui tuolzawla dam, Efraim Kotpui tuolzawl lien tak laia dam sawlbŭk an bawl fek fuk a. 17 Chuongchun, saltang hung kir po po chu kar khat kŭt an hmang sungin sawlbŭka chun an um seng a, lawmnain an sip a. Nuna naupa Josua hun laia inthoka chu ni chen chun hieng ang hin Israel thlahaiin bawkte kŭt an la hmang ngai nawh. 18 Ni tinin ni sari an kŭt sung po po chun Pathien Dan bua mi chu Ezra’n a tiem a. A ni rietna ni, kût trumtriek ni chun Mosien thu a pĕk angin, inkhawmna ursùn takin an nei a.