4 Khawpui chu a lienin a la’n thawl a, a chêng an la tlawm a, in tlu se tahai chu bawl loin a la um zing a. 5 Mi lŭnhai, rorêltuhai le vantlang mipuihai chu ko khawm a, mani sungkuo seng zieka inchik dingin Pathienin ka lungrilah a mi’n hriettir a. Judai rama hung kir nawk hmasa takhai inthla dan ziekna lekhabu ka hmu suok a, chu taka chun hieng ang hin an ziek a: 6 Sala Babulon lal Nebukadnezzarin a thruoihai laia an sal intangnaa inthoka suok, Jerusalem le Judai rama mani khuo senga kir nawk a, chu rama cheng tahai le 7 an thruoituhai chu Zerubabel, Jesua, Nehemia, Azaria, Raamia, Nahamani, Mordekai, Bilsan, Misperet, Bikvai, Nehum le Baana hai an nih. Israel thla saltang hung kirhai chu, 8 Paros thlahai sanghni zakhat sawmsari pahnih; 9 Sefatia thlahai zathum sawmsari pahnih; 10 Ara thlahai zaruk sawmnga pahnih; 11 Pahat-Moab thlaa mi (Jesua le Joab zungzama mi) sanghni zariet sawm le pariet; 12 Elam thlahai sangkhat zahni sawmnga pali; 13 Zatu thlahai zariet sawmli panga; 14 Zakai thlahai zasari sawmruk; 15 Binui (Bani) thlahai zaruk sawmli pariet; 16 Bebai thlahai zaruk sawmhni pariet; 17 Azgad thlahai sanghni zathum sawmhni pahnih; 18 Adonikam thlahai zaruk sawmruk pasarih; 19 Bikvai thlahai sanghni sawmruk pasarih; 20 Adin thlahai zaruk sawmnga panga; 21 Ater thlahai (Hezekia zungzama mi) sawmkuo pariet; 22 Hasum thlahai zathum sawmhni pariet; 23 Bezai thlahai zathum sawmhni pali; 24 Harif (Jora) thlahai za sawmpahnih le 25 Gibeon (Gibar) thlahai sawmkuo panga.

26 Bethlehem mi hung kir nawk hai: Netofa thlahai za sawmriet pariet; 27 Anathot thlahai za sawmhni pariet; 28 Bet Azmavet khaw mihai sawmli pahnih; 29 Kiriat Jearim, Kefira le Beerot khaw mihai zasari sawmli pathum; 30 Rama le Geba khaw mihai zaruk sawmhni pakhat; 31 Mikmas khaw mihai za sawmhni pahnih; 32 Bethel le Ai khaw mihai za sawmhni pathum; 33 Nebo khaw danga mihai sawmnga pahnih; 34 Elam khaw danga mihai sangkhat zahnih sawmnga pali; 35 Harim khaw mihai zathum sawmhnih; 36 Jeriko khaw mihai zathum sawmli panga; 37 Lod, Hadid le Ono khaw mihai zasari sawmhni pakhat; 38 Senaa khaw mihai sangthum zakuo sawmthum an nih.

39 Thiempu hung kir nawkhai chu: Jedaia sungkuoa mi (Jesua zungzama inthok) zakuo sawmsari pathum; 40 Imer thlahai sangkhat sawmnga pahnih; 41 Pasur thlahai sangkhat zahnih sawmli pasarih; 42 Harim thlahai sangkhat sawm pasarih an nih.

43 Levi thlaa mi hung kir nawkhai chu: Jesua le Kadmiel sungkuoa mi (Hodavia thlahai) sawmsari pali; 44 Asaf sungkuoa mi hla saktu pawl za sawmli pariet; 45 Kotkhar vengtu Salum, Ater, Talmon, Akub, Hatita le Sobai hai sungkuoa mi za sawmthum pariet an nih.

46 Tempul siehlaw hung kir nawkhai chu Ziha, Hasufa, Tabaot, 47 Keros, Siaha (Sia), Padon, 48 Lebana, Hagaba, Salmai, 49 Hanan, Gidel, Gahar, 50 Reaia, Rezin, Nekoda, 51 Gazam, Uzia le Pasea, 52 Besai, Meunim, Nefusim (Nefusesim), 53 Bakbuk, Hakufa, Harhur, 54 Bazlut, Mehida, Harsa, 55 Barkos, Sisera, Tema, 56 Nezia le Hatifa hai an nih.

57 Lal Solomon siehlawhai thlaa mi hung kir nawk chu Sotai, Soferet, Peruda (Perida), 58 Jaala, Darkon, Gidel, 59 Sefatia, Hatil, Pokeret-hazebaim le Ami (Amon) an nih.

60 Tempul siehlaw le Solomon siehlaw hung kir nawk po po chu an rêngin zathum sawmkuo pahnih an nih.

61 Hieng Tel Mela, Tel Harsa, Kerub, Adon le Imer khuohaia inthoka Jerusalema hung kir an um a, sienkhom an sungkuo chanchin inziekna lekha an hmu zo naw leiin Israel thlahai lai tiem sa thei an ni nawh. 62 Chuonghai chu Delaia, Tobia le Nekoda thlaa inthokin mi zaruk sawmli pahnih an na, 63 thiempu laia inthokin Hobaia, Hakoz le Barzilai thlahai an nih (Barzilai hin Gilead mi Barzilai sungkuoa mi nuhmeiah a nei a, a nuhmeihai tieng hming a put ta lem a nih). 64 Hienghai hin an thlatuhai suina an zong hmu naw leiin thiempu sin thaw dingin thienghlim loa ngai an nih. 65 Urim le Thummim hmanga LALPA rawn thei thiempu an nei hma khat chu ram optu chun anni chu thiempuhai chan thil serhai chu an fak ve khom a phal nawh.

66 Judai rama hung kir po po chu mi singli sanghni zathum sawmruk an nih. 67 Chuonghai baka chun nuhmei le pasal siehlaw sangsari zathum sawmthum pasarih le hla saktu za sawmli panga an hung bok a. 68 Ran an hung thruoi zat chu sakor zasari sawmthum paruk, sabengtung lien chi zahni sawmli panga, 69 sanghawngsei zali sawmthum panga le sabengtung chîn chi sangruk zasari sawmhnih a nih.

70 Sungkaw lukhaitu threnkhatin an sinthawnaa ding chun thilpek an pèk a. Ram optu chun thawlawmah rangkachak kilogram riet, rangkachak maihun sawmnga le thiempu zakuo zanga le sawmthum a pêk a. 71 Hotu danghai chun rangkachak kilogram za le sawmruk le pariet le tangkaruo kilogram sangkhat le zahni le sawmnga an pêk a. 72 Sungkaw lukhaitu iemani zatin rangkachak kilogram za le sawmruk le pariet le tangkaruo kilogram za le sawmli le thiempu zakuo sawmruk le pasari an pêk bok a.

73 Chuongchun, thiempuhai, Levihai, kotkhar vengtuhai, hla saktuhai, Tempul siehlawhai, mi dang threnkhathai le Israel thlahai po po chu mani khuo sengah umhmun an bĕngbel nawk ta a.