Kaltuhai
4
1 Kul kan bawl thrat thu Sanbalatin a hriet chun a lung a sen hle a, a lung chok chun Judahai a cheksol a. 2 A ruolhai le Samari sipai ofisarhai kuoma chun, “Hieng Juda mi rethei le ongrop ruol hin ieng am thaw kuok nei dingin in ngai hrim hrim a na? An inthawi rawn lei ringotin ni khat thilthuin kul chu bawl zo dingin an inring am a ni? En hman ro, lung kăng chăr ta sa hmunhnok laia mi an rût khawm a, an bel nawk mei mei a ni hi” tiin a deusaw tawl a. 3 A bula ngîr Amon mi Tobia chun, “An lung remhai saw, sihal khom lawn sien la, sir chim vong a tih” a lo ti ve a.4 Chu phing leh ka trongtrai a, “Aw kan Pathien, mi lo ngaithla rawh, nuizatbûrin an mi hmang a ni hi. An mi deusawnahai chu an lu chungah intlâktir la, anni ngei hi ram dang mihai inroktir la, an salah intăngtir rawh. 5 An bawsietna hi ngaithà hrim hrim naw rawh. An suolnahai chu thâi bo naw rawh, kul bawltuhai hmaa ngei suklungsen chè tumin an cho phawk chê a ni hi” tiin. 6 Chuong ang chun kul chu kan bawl thra pei a, a chenvea insangin kan zom suok vong chenin mipuihai chun lungril po poin thrang an làk takzet a.
7 Jerusalem kul chu siem thrat a ni pei thu le a sietna lai khom hruk phûi a ni tăk thu Sanbalat hai, Tobia hai, Arab mi hai, Amon mi hai le Asdod mi haiin an lo hriet chun an lung a sen hle a. 8 Anni chun Jerusalem hung bei a, buoina siem tumin ro an phier a. 9 Sienkhom kan Pathien kuomah kan trongtrai a, anni laka invengna dingin sŭn le zănin vengtu kan sie a.
10 Chuong lai zing chun Judahaiin, “Thoktuhai an chău zo ta a, hmunhnok inthiel ding hlak chu a la tam bok si a, eini thâ ringot chun kul chu ei indin zo naw ding a ni hi” tiin an hung hril a. 11 Kan hmĕlmahai hlak chun, “An hriet hma le an mi hmu hmain chìm nel ei ta, that fai rip ei ta, an sin chu a chawl a ni el” an lo ti zing bok a. 12 An kawl le kienga chêng Judahai chu kan kuomah hungin, “Sîr tina inthokin an hung bei ding cheu a nih” tiin voi sawm nêka tam rau an mi hung hril ta bok a.
13 Chuleiin, a kul inhnuoina lai tak, hmun uol-aua chun kul phĕnah mipuihai chu a sûng sûngin an kawlhnăm hai, an feihai le an thalngulhai chawiin thranghmun ka’n khawtir a. 14 Kan ngirhmun ka hang en vel hnung chun an hotuhai le mipuihai chu ka ko khawm a, an kuomah, “Ei hmĕlmahai chu tri dêr naw ro. LALPA ropui tak le râpum tak chu hre zingin in unauhai, in naupahai le naunuhai, in nuhmeihai le in in le lohai hum dingin bei ro khai” tiin ka’n fui tawl a.
15 Kan hmĕlmahai chun an thil phier kan lo hriet pei ti le an thiltum chu Pathienin a suktlol ti an hriet chun keini khom mani sin seng sunzom dingin kul tieng kan pan nawk a. 16 Chu taka inthok chun tlangval zatvein sin an thaw a, a zatve dang chun hriemhrei fei, phaw le thalngul chawiin awmphaw an inbel a. Chun, rorêltuhai chun kul bawl thratu Juda sungkuo po po chu an tran tlat a. 17 Kul bawl thratna ding hmangruo phurtu le thaktuhai khomin kut khing khatin sin an thaw a, khing tiengin hriemhrei an chawi a, 18 kul bawltuhai po po khomin kawlhnâm an pâi vong bok a. Tawtawrawt mûttuhai ruok chu ka kuomah an um a.
19 Chuongchun, mi lŭnhai, rorêltuhai le mipuihai kuoma chun, “Sin a tamin ei indar sar a, ei sinthawna kar a hla tawl si a. 20 Rîkrum thilah, ieng lai khom tawtawrawt ri in hriet pha leh kan kuomah hung tlăn khawm unla, ei Pathien chun mi dopêk a tih” ka ta. 21 Chuong ang chun a zatvein fei chawiin, khawfingchata inthoka zan tieng arasi a’n lang chenin sin chu kan sunzom ngat ngat a. 22 Chuong lai bok chun mipuihai kuomah, “Zanah vengtu sin le sunnithlâka sinthaw dingin mi tin in siehlawhai leh Jerusalem khaw sungah hung riek lût vong ro” ka ti bok a. 23 Hi sung hin kei le ka unauhai khom, ka tlangvalhai le vêngtu mi zui hlaktu tu khomin kan silfen kan hlìp ngai naw a, tui chawi le insila kan fe chenina hriemhrei kan chawi hlak.