Nehemian retheihai a san
5
1 Chuong lai chun pasal ruol le an nuhmeihai chu ka kuomah an hung a, an unau Judahai chungah nasa takin an chier a. 2 A threnin, “Keini sungkuo hi kan tam a, kan tlăk tawk khop inchawkna ding sum tam lem kan mamaw a nih” an ta. 3 A thren ruok chun, “Trăm laia bu inchawkna dingin kan in le lo le grêp huonhai kan bànda zo vong tah” an hung ti a. 4 A thren nawk chun, “Lal kuoma sie kan chawi ding kan pŭk aiah kan lo le grêp huonhai dakhamah kan sie ta a. 5 Juda mi kan ni ve a, kan nauhai khom Juda dang nauhai ang bok an ni ve naw am a ni? Sienkhom, kan nauhai chu Juda mi bok bawia kan sie a lo ngai ta hiel a. Kan naunuhai a thren lem chu bawiah an lût dĕr tah. Kan lo le grêp huonhai hlak chu mi dangin an mi neipek zo ta bok si, chĕt ngaina a um ta naw a nih” an hung ti a.6 An chierna thu ka hriet chun ka lung a sen hle a. 7 An ngirhmun chu ka ngaituo neu neu hnungin an mi lŭnhai le rorêltuhai kuoma chun, “In unauhai a pung uma sum in inpuktir hin anni chu in sawrde a nih” tiin ka khak a, an chungchang ngaituo dingin vantlang inkhawm ka ko a. 8 An kuomah, “Hnam danghai kuoma inzor tah ei unau Judahai chu ei thei ang angin ei intlan hràm hrám hlak a. Tu hin nangnin in unauhai chu ei intlan nawk ngai dingin bawiah in siem nawk tum a ni hi” ka ta. An to chip a, tu khomin hril ding an hriet nawh.
9 Chuongchun, ka hril zom pei a, “In thilthaw hi thil indik a ni nawh. Ei hmĕlma hnam danghai mi endong ding vengna lei bêkin ei Pathien hi ei tri naw ding am a ni? 10 Keima ngei le ka unauhai le ka hnuoia sinthawtuhai hin a pung umin sum le bu dam ei unauhai kuomah ei inpuktir hlak a, hi hi bansan ei tiu khai. 11 Voisun ngei hin an in le lohai, an grep huonhai le oliv huonhai chu pe kir nawk unla, sum le bu le uoiin le oliv hriek in lo inpŭktira inthoka a pung po kha pe kir nawk hrăm ro” ka ti bok a.
12 Anni chun, “Pe kir nawk vong kan ta, an lakah ieng khom phût nawng kan ta, i ti ang tak chun thawng kan tih” an ta. Chu phing leh thiempuhai chu ka ko a, mi lŭnhai le rorêltuhai chu thu an intiem tah anga thaw dingin intiemkamna ka’n neitir a. 13 Chun, ka zakaw fuol hmawr chu ka thin a, “In thu tiem anga in thaw naw a ni chun in in le loa inthokin Pathienin thin thla ve raw se cheu” ka ta. Pungkhawm po po chun, “Amen” an ta, LALPA an inpàk a. Mipuihai chun an thutiem angin an thaw a.
14 Chu bakah Lal Artazerzia inlal kum sawhninaa inthoka kum sawmthum le kum hnina chen, a rêngin kum sawm le kum hni sung chu Judai ram optu ka ni a, chu sung chun keima le ka hnuoia thoktuhaiin kan chan ding lal busung voi khat khom kan làk ve nawh. 15 Keini hmaa ram optuhai chun mipuihai chung an sukrik thei hle a, an ni tin fak ding bu le dawn ding uoiin an intumtir băkah tangkaruo sekel sawmli an lakpek hlak a; an hnuoia thoktuhai chen mipui chungah an insuklal thei hle hlak. Sienkhom kei ruok chun Pathien ka tri leiin chuong ang chun ka thaw ve ngai nawh. 16 Chuong chu thaw nêk hmanin, kul bawlah ka’n hmang char char lem a, ram hlekte khom ka’n chawk naw a, ka hnuoia thoktuhai po po khom kul bawla inhmang tlat dingin ka ngiet a.
17 Chu bâka chun, kan kawl le kienga ram dang mi hunghai băkah Judahai le rorêltuhai laia mi ka dawkana thlaithleng kîl hlak za le sawmnga an um zing a. 18 Ni khata dinga kan khorsaw chu bawng pakhat le beram thra chi ngot paruk le âr tam tak a na, ni sawm dan zatah uoiin chi hrang hrang tam tak kan mamaw bok a. Amiruokchu, mipui an harsa êm leiin ram optu ka nina puola fak le dawn ka dong ding hai chu ka phût ve ngai hrim hrim nawh.
19 Aw ka Pathien, hieng mihai ta dinga ka thaw po po hi ka thratna dingin mi hrepêk zing rawh.