Jerusalem kul an indin
3
1 Chuongchun, thiempu lal Eliasib le a unau thiempuhai chu an inthok a, Beram Kotpui chu an bawl tran a, an inhlàn thienghlim a, a kotkharhai an siem thra a, a kul bang khom Insang Zakhatnaa inthoka Hananel Insang chen an bawl pei a, an inhlàn thienghlim a. 2 A dot chara mi chu Jeriko mihaiin an bawl a, chu dota mi chu Imri naupa Zakur-in a bawl a.3 Nga Kotpui chu Hasena nauhaiin an bawl thra a, a tlungpŭmhai an zam a, a kotkharhai an siem a, a kalna le thir tluonhai an siem thra vong a. 4 A dota mi chu Hakoz naupa Uria naupa Meremot-in a bawl thra a, a dota mi chu Mesezabel naupa Berekia naupa Mesulam-in a bawl a, chu dota mi chu Baana naupa Zadokin a bawl thra a. 5 Chu khêla mi chu Tekoa khaw mihaiin an bawl a, sienkhom an mi lienhai ruok chun an thrangpui nuom ve nawh.
6 Khawhlui Kotpui chu Pasea naupa Joiada le Besodeia naupa Mesulam haiin an bawl thra a, a tlungpŭmhai an zam a, a kotkharhai an siem thra a, a kalna le thir tluonhai an siem thra vong a. 7 Anni khêla mi chu Gibeon mi Melatia hai, Meronot mi Jadon hai le, Eufretis vadung thlang tieng biel optu hmunpui Gibeon le Mizpa khuoa mihaiin an bawl thra a. 8 A dota mi chu rangkachak sertu laia mi Harhaia naupa Uziel-in a bawl thra a, chu dota mi chu Hanania, rimtui siemtu laia miin a bawl thra a. Chuong ang chun Jerusalem kul chu a Bangpui chenin an bawl thra a. 9 Chun, anni dota mi chu Jerusalem biel zatve hotu Hur naupa Refaia chun a bawl thra a. 10 Anni zawna mi chu Harumaf naupa Jedaia chun a bawl thra a, chu khêla mi chu Hasabneia naupa Hatus chun a bawl thra a. 11 Chu khêla mi chu Thuk Insang chenin Harim naupa Malkija le Pahat-Moab naupa Hasub chun an bawl thra a. 12 Chu khêla mi chu Jerusalem biel zatve optu Halohes naupa Salum le a naunuhaiin an bawl thra a.
13 Ruom Kotpui chu Hanun rawiin Zanoa khuoa chenghaiin an bawl thra a. A kotkharpui chu an rem thra vong a, a kotkharhai an inbŭk a, a kalna le thir tluonhai an thlak vong a. Chun, Ruom Kotpuia inthoka Hnawlhnok Kotpui, meter zali sawmlia sei khom chu an bawl thra bok a.
14 Hnawlhnok Kotpui chu Beth Hakerem biel optu Rekab naupa Malkija chun a bawl thra a, a kotkharhai a thlâk vong a, a kot kalna le thir tluon rolhai chu a siem thra vong bok a. 15 Mizpa biel optu Kol-Hoze naupa Salun chun Tuikul Kotkharpui chu a bawl thra a, a chung khum a siem a, kotkharhai le a kalna le a thir tluon rolhai po po chu a tharin a thlak vong a. Chun, Lal Huon bula Siloam Dil inhuonna banghai a bawl thra a, Davida khuoa inthoka zuk pan thlakna kailawn chenin a bawl thra vong a. 16 Chu khêla mi, Davida thlăn epa tuiting le Mihrâng Rûn chenin Beth-Zur biel zatve optu Nehemia naupa Azbuk chun a bawl thra a.
Levi chia mi kul bawla thokhai
17 A dot chu Levi chia mi Bani naupa Rehum inrawina hnuoiah an bawl thra a. Chu khêla mi chu Keila biel zatve optu Hasabia chun ama biel hmingin a bawl thra a. 18 A dota mi chu a unauhai, Keila biel zatve optu Henadad naupa Binui (Bavai) rawiin an bawl thra a. 19 A dota mi chu Mizpaa roreltu Jesua naupa Ezer chun kul kawinaa inthoka ralthuom siena hmun pan tungna zawn lai chu a bawl thra a. 20 A dota mi chu Zabai naupa Baruk chun thrahnemngai takin kul kawinaa inthoka thiempu lal Eliasib in kotkhar chenin a bawl thra a. 21 A dot chu Hakoz naupa, Uria naupa Meremot-in thiempu Eliasib kotkhara inthoka a tawp chen chu a bawl thra a.
Kula sinthaw thiempuhai
22 Chu khêla mi chu a sè vêla thiempuhaiin an bawl thra a. 23 Anni dota mi chu Benjamin le Hasub haiin an bawl thra a, a dota mi chu Anania naupa Maseia naupa Azaria chun a in bul po a bawl thra a. 24 A dota mi Henadad naupa Binui chun Azaria ina inthoka a kil chen a bawl thra a, 25 Uzai naupa Palal chun kul kawi tranna epa lal in chuonchunga inthoka Insang Lor zawn chu a bawl thra a. A dota mi chu Paros naupa Pedaia chun a bawl thra a. 26 Ofel muola um Tempula thoktuhai chun sak tienga Tuikul Kotpui zawn chen le insang lor chenin an bawl thra a. 27 A dota mi chu Tekoa inthoka hunghaiin insang lor danga inthoka Ofel muola kul bang chen an bawl thra a.
Sinthawtu danghai
28 Sakor Kotpui chung tieng chu thiempuhaiin mani in zawn seng an bawl thra a. 29 Anni dota chun Imer naupa Zadokin ama in zawn po a bawl thra a. A dot chu Sak Kotpui vengtu Sekania naupa Semaia chun a bawl thra a. 30 A dot chu Selemia naupa Hanania le Zalaf naupahai laia parukna Hanun hai chun an bawl thra a. A dot chu Berekia naupa Mesulam chun ama in zawn po a bawl thra a. 31 A dot chu rangkachak sertu laia mi Malkija chun Enfiena Kotpui zawna Tempula sinthawtuhai le sumdawnghai umna chen le a kil pan tungna chen a bawl thra a. 32 A kil pan tungna le Beram Kotpui inkar po chu rangkachak sertu le sumdawnghaiin an bawl thra bok a.