Jerusalemah Nehemia a fe
2
1 Lal Artazerzia inlala inthoka kum sawmhnina Nisan thla, thrâl intran hlim lai chun lal dawn ding uoiin an hung làk chu lal ka va pêk a. Kha hma khan lungngai hmĕl ka put ngai naw a. 2 Lal chun ka kuomah, “Damnawna nei si loin i hmêl a va hang ngûi ngei de! Thil dang rak ni naw nih, lungzingna i nei a ni hih” a ta, ka tri ta hle el a. 3 Amiruokchu lal kuomah, “Lal chu kumkhuoin dam zing raw se. Ka thlatuhai ruong zălna khawpui a tlu ram zo a, a kotkharhai khom a kăng ût vong ta si chun ieng leiin am hmêl hlim ka put thei ding a na?” ka ta. 4 Lal chun, “Iem a na i dit chu?” a ta, chuongchun van Pathien kuomah ka trongtrai a. 5 Lal kuomah, “Lal remti zawng a ni a, i siehlaw hin lal mit a tlung a ni chun, Judai rama ka thlatuhai ruong zălnaa ka fe mi phalpêk la, khuo chu hang indin thar nawk ka tih” ka ta. 6 Lalnu bula inthrung lal chun, “Ieng chen am i thang ngai a ta? Ieng tik am hung kìr nawk thei i ta?” a ta. Lal chun lawm takin ka fe a mi phalpĕk a, ka suok hun ding khom chu ka sukfel a.7 Chu bâka chun lal kuomah, “Lal remti zawng a ni chun, Judai ram ka tlung chena him taka mi veng dinga hrilna lekha Eufretis vadung thlang tieng biela rorêltuhai kuomah mi ziekpek sien. 8 Chun, Tempul vĕla kul kotkharhai siemna ding le kulbîng bangrela hmang ding bakah keima in bawlna dingin thing ka mamaw ding a ni leiin lal thing bil enkoltu Asaf kuomah thing mi pe dinga hrilna lekha mi ziekpek bok sien ka nuom khop el” ka ta. LALPA ditsakna kut chu ka chungah a um leiin lal chun ka hni po po chu a mi phalpêk vong a. 9 Chuongchun, Eufretis vadung thlang tieng biel optuhai kuoma chun ka fe a, lal lekhahai chu ka pêk tawl a. Lal chun a mi fepui dingin sipai hotuhai le sakor chungchuong mihai a tir bok a. 10 Horon mi Sanbalat le Amon mi Tobia haiin Israel thlahai thrangpui dinga ka hung tlung thu an hriet chun an lung a sen hle a.
Nehemia-in Jerusalem kul a fang
11 Jerusalem ka hang tlung chun ni thum sung chu ka la chawl hri phot a. 12 Chu zoah mi tlawmte chauh thruoiin zănah ka suok dok a. Jerusalem ta dinga ka thaw ding Pathienin ka lungrila a min hriettir chu tu khom ka hril naw a, ka chuongna sabengtung chauh naw chu ran sa dang thruoi ka nei bok nawh. 13 Ruom Kotpui tieng kotkhara chun ka suok a, sihal tuikula chu fe pĕlin, Hnawlhnok Kotpui tieng kan fe a, Jerusalem kul chim tahai le a kotkhar kăng tahai chu kan en vèl a. 14 Chu taka inthoka hung kirin, Tuikul Kotpui le Lal Dil umna kotkhar chu kan hung pĕl a, sienkhom kul chimin lam a dang leiin ka chuongna sabengtung chun a fe tlang thei ta naw a. 15 Chuongchun, zăna chun Kidron vadung ka hraw tung ta lem a, kul chu ka en vong a, Ruom Kotpuia bok chun kan hung kir nawk a.
16 Khawpui optuhai chun khaw lai am ka fe a, ieng am ka thaw ti an hriet naw a, ka thil thaw tum chu Judahai, thiempuhai, thruoituhai, thoktuhai le rorêltuhai, a sinthawtu ding takhai chu tu khom ka la hril nawh. 17 An kuomah, “Ei chan sietzie hi in hmu seng a. Jerusalem chu a tlu ram ta a, a kotkharhai khom a kăng hmang vong tah ti in hriet. Thaw ro, ei hmai a mawk zing nawna dingin Jerusalem hi indin thar ei tiu khai” ka ta. 18 Pathien ditsakna kut ka chunga a um dan le lal le kan inbiekna thuhai dam chu ka hril tawl a. Anni chun, “Thaw ro, indin thar nawk ei tiu” an ti nghal a, sin thra thaw ding chun an pu tran ta a.
19 Horon mi Sanbalat hai, Amon mi thoktu Tobia hai le Arab mi Gesem haiin chu thu chu an hrietin an mi nuisaw a, nuizatbûrah an mi hmang a, “Iem a na nangni rawiin in thaw ta hi? Lal laka hel tum in ni?” tiin an mi biek sisaw a. 20 Kei chun, “Van Pathien chun mi’n hlawtlingtir a tih. Keini a siehlawhai hin indin thar nawk kan tih. Nangni ruok chun Jerusalema hin chanvo amanih, thuneina amanih le neitu nina amanih ieng khom nei naw hrim hrim in tih” tiin ka don tawl a.