Lal Artazerzia inlala inthoka kum sawmhnina Kislev thlaa^a chun lal khawpui Susa kulah ka um a. 2 Judai rama inthoka hung kìr ka unauhai laia mi pakhat Hanani le mi threnkhatin an mi hung sir a. Jerusalem chanchin le Babulona saltang, Juda unau kir nawk hai chanchin dam ka’n don a. 3 Anni chun, “Saltăngnaa inthoka dam khawsuok, Judai rama kir nawkhai ngirhmun chu a se khop el. Buoina le inzakna namên lo an tuok a. Jerusalem kul chu a chim se vong ta a, a kotkharhai khom a kăng siet vong tah” an ta.

4 Chuong ang thu ka hriet char chun ka thrung a, ka trap a. Ni iemani zat bu ngheiin ka sŭn a, van Pathien hmaah ka trongtrai a. 5 “Aw LALPA, van Pathien, Pathien ropui le râpum, nangma hmangaia i thupêk zawmtuhai chunga i hmangaina thuthlung vong zing hlaktu, 6 ka trongtraina hi mi lo ngaithlapêk lul rawh. I mi Israelhai ta dinga sŭn le zăna i kuoma i siehlaw ka hung trongtrai hi mi zuk thlîr la, mi hung en hrăm rawh khai. I lakah nasa takin kan lo suol ta a, a nih, keima sungkuo ngei khomin thil suol kan thaw ta a, thupha ka hung chawi a nih. 7 I lakah rilo takin kan lo khawsa a, i siehlaw Mosie hmanga i pĕk thupêkhai, thusuokhai le dănhai chu kan lo nghatsan ta si a.

8 “I siehlaw Mosie kuoma, ‘Ka lakah in ringum naw chun hnam tin lai thĕ dar ka ti cheu a, 9 sienkhom in hung inlamlĕt a, ka thupêkhai in zawm chun, kawl kil tawp chena hnot dara umhai khom ka hming chêngna dinga ka thlang hmuna chun thruoi khawm nawk vong ka ti cheu’ tia i lo hril kha lunginsiet takin hre zing rawh. 10 Hienghai hi i mi le sa, thilthawtheina ropui tak le kut hrat taka i’n tlan suokhai kha an ni si a.

11 Aw LALPA, lunginsiet takin i siehlaw ka hung trongtraina le i hming inzaa hlimpuitu, i siehlawhai trongtraina hi lo ngaithla hrăm rawh. Voisun là lá hin ditsakna ngen dinga hi lal hmaa i siehlaw ka ngir ding hi mi’n hlawtlingtir hrăm rawh” tiin ka hni a.

Chuong lai chun kei chu lal kuoma zu semtu^b ka nih.