Innei pol thua Ezra trongtraina
9
1 Chuong thil po po zoa chun Israel thruoituhai chu ka kuomah an hung a, “Israel mi tam tak chu, thiempuhai le Levihai chenin, hi rama chenghai laka hin an inthier fihlim naw a, Kanan mi hai, Hit mi hai, Periz mi hai, Jebu mi hai, Amon mi hai, Moab mi hai, Aigupta mi hai le Amor mihai thil chìng tirdakum tak chu an thaw ve a. 2 Anni ngei le an nauhaiin hnam dang mi nuhmeiah an nei a, ei chi thienghlim tak chu hi rama mihai chi leh an chok pol a, mi lien le mi lalhai chu hi bawsietna thila hin a zuolkai tak an nih” tiin an mi hung hril a.3 Chu thu chu ka hriet phing leh ka silfenhai ka pot thlĕr a, ka sam le ka khakhmul ka vaw kol a, hrilhai takin ka thrung tlok tlok a. 4 Saltang hung kir laia mi, LALPA Israel Pathien thu hrea tria inthin taphot chu ka kuomah an hung tlăn khawm a, zan tieng hlanbiek hun chenin a ngaina tak hre loin ka thrung tlok tlok a.
5 Zan tieng hlănbiek huna thuomhnaw inek neng nunga lungngai taka inthrung lai chu ka tho a, dingthrathruona bân pharin, LALPA ka Pathien kuomah ka trongtrai a, 6 “Aw ka Pathien, ka hmai a va hang mawk tawpkhawk ngei de aw! Nangma tieng ka hung ngha ringot khom hi inzakum ka ti a nih. Aw Pathien, kan bawsietnahai chun a mi chìm pil a, kan thiem nawna chun van a tong a nih. 7 Kan pi le puhaia inthokin tu chen khom hin nasa takin kan suol a, kan suol lei tak chun kan lalhai le thiempuhai khom ram dang lalhai kawlhnăma that le sala thruoiin an um a, an rok a, an sukmuolpho a, voisun chena kan um dan ang hin.
8 “Tu hin hun tawite sung chu kan chungah zangai, LALPA kan Pathienin mi tlawma zawng dama i mi hlahai chu i Hmun Thienghlima hin i mi’n umtir a, kan mitmeng i sukhar a, kan saltăngnaa inthokin i mi săwk zăng a. 9 Sala kan intăng lai khomin kan LALPA chun i mi thlathlam ngai naw a, Persia lal lunginsiet i mi’n hlawtir a. LALPA in chu indin thar nawk ding le a sietnahai siem thra dingin hringna thar i mi pĕk a, Judai ram le Jerusalemah himna bangin i mi’n huol a.
10 “Tu hin aw kan Pathien, ieng am hril tang kan ta le? I thupêkhai chu kan lo nghatsan ta si a. 11 I siehlaw zawlneihai hmanga, ‘In va fena ding, in va hluo ding hmun chu a ram mihai suolnain a sukporchè ta a, thil tirdakum an chìng chun a ram kil le kap a sukporche a. 12 Chuleiin, in naunuhai chu an naupahai nuhmei dingin inneitir naw unla, in naupahai khom an naunuhai chu pasalah inneitir bok naw ro. In hrât zing a, a ram tharsuok thrahai tlàn a, a ram chu in thlahai kuoma kumkhuoa in inrochungtir theina dingin, ieng lai khomin anni chu inruol thratna thuthlung thlungpui ngai naw ro’ tia thu i lo pek tah kha a ni si a.
13 “Kan chunga thil hung tlunghai hi kan thil suol thaw lei le kan thiem nawna nasa tak lei a nih. Chuong sa khom chun kan Pathien, kan suol ang phua mi hrem loin hieng zat hi damin i mi la hlà ta rop a ni hi! 14 Hieng hi hre zing siin i thupêkhai bawse nawkin, thil tirdakum thawtuhai leh kan innei pol pei ding am a ni? A dam khawsuok um lo le hlà hrim nei loa mi sukram vong khopin kan chungah i lung a sen naw dim a ni? 15 Aw LALPA, Israelhai Pathien, nang chu i fel a, voisun chen hin hlà tawk chu i mi la nei a ni hi. Kan bawsietna leia i hmaa ngîr tlak hrim hrim um naw inlang khom, kan thiem nawna pumin i hmaah kan hung a nih” ka ti a.