Mipuiin suol an inpuong
10
1 Chuonga Pathien Tempul tuolah bokkhup a, trap puma thupha chawi a, Ezra a trongtrai lai chun Israel mipui tam tak, pasal le nuhmei le naupanghai chu a kuomah an hung pung khawm a, nasa takin an trap ve a. 2 Elam thlaa mi Jehiel naupa Sekania chun Ezra kuomah, “Hi rama hnam dang minuhai hi nuhmeiah kan lo nei leiin ei Pathien chungah thil suol kan lo thaw takzet a nih ti kan inpuong a. Chuong khom chu ni sien, Israelhai ta dingin beisei ding a la um tho annawm. 3 Thaw ro, hnam dang mi nuhmeia ei neihai le an laka pieng po pohai chu thre dingin Pathien kuomah thu thlung thar nawk ei tiu. I thurawn le ei Pathien thupek inzatuhai thu angin thawng ei ta, Pathien dan chu zawm ei tiu. 4 Tho raw khai, hi thil siem thrat dan ding mi kawkhmu chu i mawphurna a nih. Huoi takin um la, thaw rawh, nangma tieng thrang tlat kan tih” a ta.5 Chu phing leh Ezra chu a tho a, thiempuhai le Levihai laia an hotu un deu deuhai le Israel mipui po po chu Sekania-in a hril anga thaw dingin intiemkamna a’n neitir a. 6 Chu zoah Ezra chu LALPA Tempul tuola inthok chun a suok a, Eliasib naupa Jehohanan pindana chun a fe a, chu taka a um sung chun saltang suokhai suolna leia lungngaiin ieng khom fain a dawn nawh. 7 Chuongchun, Judai ram po po le Jerusalema saltang hung kìrhai po po chu Jerusalema hung inkhawm dingin a’n cha a, 8 tu khom ni thum sunga hung inlang ve lo chu, mi lienhai le upahai thu rèl angin, a thil nei po po hrènpek a, ama chu saltang hung kirhai laia inthoka hnot suok ding a ni thu chu a puong a.
9 Chuongchun, Juda mi le Benjamin mihai chu ni thum sungin Jerusalemah an fe khawm ta vong a. Thla kuona ni sawmhniaa chun an inkhawm a, mipui po po chu Pathien Tempul tuolzawla chun an thrung khup a, an thu chai ding rik lei le ruo a sur bok leiin an inthin hlop hlop a. 10 Thiempu Ezra chu a hung ngir suok a, an kuomah, “Thil suol in lo thaw ta a, hnam dang minuhai chu nuhmeiah in nei a. Kha hma nêk hmana nasa nawkzuola thiemnaw chang ei lo ni tah. 11 LALPA, in pi le puhai Pathien hmaa chun in suolhai inpuong unla, a ditzawng angin thaw ta ro. A ram mihai le hieng hnam dang minuhai laka hin inthier fihlim ro” a ta.
12 Mipui po po chun rawl inring takin, “I hril chu a’n dik ie! I ti ang tak chun thawng kan tih. 13 Amiruokchu hi taka ngîr mipuihai lai hin hnam dang nuhmeia nei tam tak kan um a, hi thil hi ni khat ni hni sunga ching fel el thei ding a ni nawh. Tu hi raw sur hun a ni bok si a, tuola hin sawt tak ngir zing ngaina a um nawh. 14 Kan hotuhai hin keini aiawin thaw lem raw hai se. Hi chungthua eini laka ei Pathien lungsenna nasa tak chu a’n kieng theina dingin, hnam dang mi nuhmeia neihai po chu an khuo chita hotu le rorêltuhai leh hun ruotah hung inlang lem raw hai se” an ta. 15 Asahel naupa Jonathan le Tikva naupa Jazeia hai chauin chu rotna chu an kal a, Levi chia mi Mesulam le Sabethai hai khomin an kal a.
16 Chuongchun, an rot dan ang chun an thaw a, Ezra chun sungkuo tin aiawtu ding hming suot meuin a thlang suok a, an chungthu chu ngaituo dingin hotu ruothai chu thla sawmna ni khatb ni chun an inkhawm a. 17 A kum nawk thla khatna ni khatnac ni chun hnam dang mi nuhmeia neihai chungthu chu an sukfel ta a.
Hnam dang mi nuhmeia neihai
18 Hienghai hi thiempuhai laia hnam dang minu nuhmeia neihai chu an nih: Jehozadak naupa Jesua le a unauhai sungkuoa inthokin Maaseia, Eliezer, Jarib le Gedalia an nih. 19 An nuhmeihai mak dingin thu an intiem a, an thiem nawna leiin beramchal pakhat seng inhlanin hlanbiek an thaw seng a. 20 Chun, Imer sungkuoa inthokin Hanani le Eliezer le Zebadia; 21 Harim sungkuoa inthokin Maaseia, Elija, Semaia, Jehiel le Uzia; 22 Pasur sungkuoa inthokin Elionai, Maaseia, Ismael, Nethanel, Jozabad le Elasa an nih.
23 Levi thlaa mi thiem naw changhai chu: Jozabad, Simei, Kelaia (Kelita tia an ko bok), Pathahia, Juda le Eliezer an nih. 24 Hla saktu thiem naw chang chu Eliasib a nih. Kotkhar vengtu laia thiem naw changhai chu Salum, Telem le Uri an nih.
25 Israel mi danghai laia thiem naw changhai chu: Paros sungkuoa inthokin Ramia, Izia, Malkija, Mijamin, Eleazar le Benaia; 26 Elam sungkuoa inthokin Matania, Zekaria, Jehiel, Abdi, Jeremot le Elija; 27 Zatu sungkuoa inthokin Elioenei, Eliasib, Matania, Jeremot, Zabad le Aziza; 28 Bebai sungkuoa inthokin Jehohanan, Hanania, Zabai le Athlai; 29 Bani sungkuoa inthokin Mesulam, Malluk, Adaia, Jasub, Seal le Jeremot; 30 Pahat-moab sungkuoa inthokin Adna, Kelal, Benaia, Maaseia, Matania, Bezalal, Binui le Manase; 31 Harim sungkuoa inthokin Eliezar, Isija, Malkija, Semaia, Simeon, 32 Benjamin, Maluk le Semaria; 33 Hasum sungkuoa inthokin Matenai, Matata, Zabad, Elifelet, Jeremai, Manase le Simei; 34 Bani sungkuoa inthokin Maadai, Amram, Uel, 35 Benaia, Bedeia, Keluhi, 36 Vania, Meremot, Eliasib, 37 Matania, Matenai le Jaasu; 38 Binui sungkuoa inthokin Simei, 39 Selemia, Nathan, Adaia, 40 Maknadebai, Sasai, Sarai; 41 Azarel, Selemia, Semaria, 42 Salum, Amaria le Josefa; 43 Nebo sungkuoa inthokin Jeiel, Matithia, Zabad, Zebina, Jadai, Joel le Benaia an nih. 44 Hienghai po hi hnam dang minu nuhmeia neihai chu an na, a threnin anni lakah nau an nei bok.