Ezra le hung kir nawkhai
8
1 Hieng hi Artazerzia inlal laia Babulona inthoka keima ruola hung sungkuo lukhaituhai le an sungkuo inziek dan chu a nih: 2 Finehas thlaa mi Gersom; Ithamar thlaa mi Daniel; Davida thlahaia inthokin Hatus; 3 Sekania thlahai; Paros thlaa mi Zekaria le a hungpui pasal za le sawmnga; 4 Pahat-Moab thlaa mi Zerahia naupa Eliehoenai le a hungpui pasal zahni; 5 Zatu thlaa mi Jahaziel naupa Sekania le a hungpui pasal zathum; 6 Adin thlaa mi Jonathan naupa Ebed le a hungpui pasal sawmnga; 7 Elam thlaa mi Athalia naupa Jesaia le a hungpui pasal sawmsari; 8 Sefatia thlaa mi Mikael naupa Zebadia le a hungpui pasal sawmriet; 9 Joab thlaa mi Jehiel naupa Obadia le a hungpui pasal zahni le sawmpariet; 10 Bani thlaa mi Josifia naupa Selomit le a hungpui pasal za le sawmruk; 11 Bebai thlaa mi, Bebai naupa Zekaria le a hungpui pasal sawmhni le pariet; 12 Azgad thlaa mi Hakatan naupa Johanan le a hungpui pasal za le sawm; 13 Adonikam thlaa mi, a nuhnung tak Elifelet hai, Jeuel hai le Semaia hai le an hungpui pasal sawmruk; 14 Bigvai thlaa mi Uthai le Zakur le an hungpui pasal sawmsari an nih.Jerusalem tieng Ezra a kîr
15 Chuonghai po chu Ahava tuilamah ka ko khawm a, chu hmuna chun ni thum kan riek a. Mipui le thiempu hunghai ziekna ka hang en chun Levi chia mi hrim hrim tu khom ka hmu naw a. 16 Chuleiin, anni laia lukhaitu Eliezar, Ariel, Semaia, Elnathan, Jarib, Elanathan, Nathan, Zekaria le Mesulam hai chu ka ko a, an mi thiem Joiarib le Elnathan hai khom ka ko sa bok a. 17 Anni chu Kasifiaa Levihai thruoitu Ido kuomah fe a, Jerusalema Pathien Tempula rongbawltu ding a unauhai le an tempula thoktu laia mihai chu hung tir ve dinga va hni dingin ka tir tawl a; ei Pathien ina thoktu ding mi an hung tir ve theina dinga Ido le a unauhai le Kasifia tempula thoktuhai kuoma an trong dan ding chenin ka hril vong a. 18 Ei Pathien lunginsietna kut chu kan chungah a um leiin, mi pakhat a hming Serebia le a naupahai le unauhai mi sawm le pariet an hung tir a. Ama hi pa thei tak el, Mali thlaa mi, Israel naupa Levi chia mi a nih. 19 Chun, Hasabia le Merari thlaa mi Jesai chu a unauhai le naupahai sawmhni leh an hung tir bok a. 20 Chu bakah tempula thoktu mi zahni le sawmhni an thrang sa a. Hieng tempula thoktuhai hi Levihai thrangpuitu dinga Davida le a thoktuhaiin an lo ruot tahai kha an na, an rênga hming ziek lût vong a nih.
Bu nghei trongtrai
21 Chuongchun, kan inzin sung keini le kan naupang thruoihai le kan thuomhnawhai vêng a, him taka kan inzin theina dingin Ahava tuilama chun kan rêngin Pathien hmaah insuktlawm a, bu ngheia trongtrai dingin ka puong a. 22 Lal kuomah, “Kan Pathien chun ama chawibiektu chu a hum hlak a, ama phatsantu chunga ruok chu a lungsenna a chok hlak” tia kan lo hril ta si leiin, lampuia hmêlmahai laka mi vengtu ding sipai le sakor chungchuong mihai tir dinga lal hang hni hlak chu inzakum ka ti ta bok si a. 23 Chuleiin, ei Pathien chun mi hum dingin bu ngheiin nasa takin kan trongtrai a, kan hnìna chu a mi don a.
Tempul bawlna dinga thilpêk
24 Chuongchun, hotu ding thiempu mi sawm le pahnih ka ruot hrang a, chuonghai chu Serebia le Hasabia le an unauhai sawm chu an nih. 25 Lal le a khawnbawlhai le mi lienhai le Israel mipuihaiin Pathien Tempul bawlna dinga tangkaruo hai, rangkachak hai le bûr le bèl hai an hung thaw khawm po po chu ka bûk a, an kutah ka’n hlàn a. 26 Ka bûk le an kuta ka’n hlân sawng zat po chu tangkaruo kilogram singhni sanghni; tangkaruo bûr le bèl zakhat, kilogram sawmsari-a rik; rangkachak kilogram sangthum zali-a rik; 27 rangkachak thlengkûm sawmhni, kilogram riet le a chenve vela rik; rangkachak tluka hlu, dâr bêl tle mawi taka siem pahnih a nih.
28 Chun, thiempuhai kuomah, “Nangni le hieng rosumhai hi LALPA ta dinga inhlàn thienghlim in ni ta a; tangkaruo le rangkachakhai hi LALPA, in pi le puhai Pathien ta dinga mani lung puoka mihaiin an hung inhlân vong a nih. 29 Jerusalema LALPA Tempula hlŭ lût dinga thiempu lal hai, Levi chi hai le Israel upahai kuta a hlekte khom inhmang loa in inhlăn hmâ po chu hieng rosumhai hi thra takin vêng ro” tiin ka hril a. 30 Chuongchun, Jerusalema ei Pathien Tempula rosum sie khawmna ina hlu lut dinga rangkachak le tangkaruo le thil thienghlim an bŭkhai chu thiempu le Levi chia mihai chun an lak a.
31 Ahava tuilama inthokin Jerusalem panin thla khatna ni sawm le pahniah kan inthok suok a, Pathien lunginsietna kutin a mi veng a, hmêlmahai le lampuia suomhmanghai lakah a mi humhim a. 32 Chuong ang chun Jerusalem kan tlung a, ni thum sung chu kan chawl hadam a.
33 Kan tlunga inthoka ni linaa chun tangkaruo hai, rangkachak hai, bûr le bèl hai chu ei Pathien inah kan bŭk a, thiempu Uria naupa Meremot kutah kan inhlăn a; a kuoma chun Finehas naupa thiempu Eleazar a um a; chun, Levi chia mi Jesua naupa Jozabad le Binui naupa Noadia hai khom an um bok a. 34 Iengkim chu inchikin an bûk vong a, an bŭk zàt chu ziekin an inchik thlap a.
35 Chu zoa chun saltang hung kìr po po chun Israel Pathien hmaah pumraw thilhlân an inhlàn a. Israel po po puola dingin bawngchal sawm le pahni, beramchal sawmkuo le paruk, beramte sawmsari le pasari an inhlàn a. Suol ngaidamna thilhlan dingin kelchal sawm le pahnih an inhlân bok a. Hienghai po po hi LALPA kuoma pumraw thilhlân vong a nih. 36 Chun, lal thusuokhai chu Eufretis vadung thlang tieng biela ram optu le a rawihai kuoma chun an pêk a, anni chun thlopin, Tempul bawlna le Pathien chawibieknaah mipuihai chu an thrangpui pei a.