2 ama chu Salum naupa a na, ama chu Zadok naupa a na, ama chu Ahitub naupa a na, 3 ama chu Amaria naupa a na, ama chu Azaria naupa a na, ama chu Meraiot naupa a na, 4 ama chu Zerahia naupa a na, ama chu Uzi naupa a na, ama chu Buki naupa a na, 5 ama chu Abisua naupa a na, ama chu Finehas naupa a na, ama chu Eleazar naupa a na, ama chu thiempu lal Aron naupa a nih. 6 Hi Ezra hi lekha ziektu a na, LALPA, Israelhai Pathienin Mosie hmanga Israel mipuihai kuoma a pek danhai chu hre tak el a nih. Babulona inthokin Jerusalemah a hung tung a, LALPA a Pathienin a ditsak leiin lal chun a hni po po chu a pêk pei a. 7 Lal Artazerzia inlala inthoka kum sarina chun Israel mi iemani zat chu thiempu hai, Levi chia mi hai, hla saktu hai, kotkhar vengtu hai le Tempula thoktu threnkhathai chu thruoiin Jerusalem tieng a pan a.

8 Chu kum thla khatna ni, Artazerzia inlala inthoka kum sarinaah Jerusalem a hang tlung a. 9 Babulona inthokin thla khatna ni khat niin an suok a, Pathienin ama chu a veng pei a, thla ngana ni khat ni chun Jerusalem a tlung a. 10 Ezra chu LALPA Dan inchûk le zawm tum tlat mi, a dànhai le thupêkhai chu Israelhai inchuktir dinga inpe zo mi a nih.

11 Chun, hi hi lal Artazerzia-in thiempu Ezra, lekha ziektu, Israelhai ta dinga LALPA thupekhai le thuruothai hrietna tienga mi thiem kuoma lekha a thon chu a nih:

12 “Lalhai lal Artazerzia-in thiempu Ezra, van Pathien Danhai zirtirtu chu chibai ka bûk.

13 Tu hin ka ram sunga Israel mi po po le thiempuhai le Levihai tu khom Jerusalema nang le fe nuom taphot chu fe thei dingin thu ka pêk. 14 I kuta i kol, in Pathien Danhai chungthua Judai ram le Jerusalem ngirhmun chu hang chìk dingin lal le a khawnbawl pasarihaiin kan tir chê a nih. 15 Chu bakah, lal le a khawnbawlhaiin mani lung puoka phal taka Israelhai Pathien, Jerusalema chêng ta dinga thilpêk an inhlàn tangkaruo le rangkachakhai băkah, 16 Babulon rama inthoka i hmu thei zat taphot tangkaruo le rangkachak le mipuihai le thiempuhaiin Jerusalema an Pathien ta dinga mani lung puoka an inhlàn thilpêk po po chu chawi bok i ta. 17 Hi sum hin bawngchal dam, beramchal dam, beramte dam le fak le dawn thilhlân dinghai chu inchaw nghal i ta, Jerusalema in Pathien Tempula maichàma chun i hang inhlàn ding a nih.

18 “Chun, tangkaruo le rangkachak hmang bânghai chu in Pathien dit zawng nia in hriet dan ang angin nang le i unau Judahaiin hmang ro. 19 In Pathien Tempula rongbawlnaa hmang ding bûr le bêlhai ruok kha chu a kimin Jerusalema in Pathien Tempula chun inhlàn rawh. 20 In Pathien Tempula dinga mamaw le chuong ang thila dinga sum in trûl zât zàt chu lal sum ina inthokin lo hmang pei rawh.

21 “Tu hin kei, lal Artazerzia ngeiin Eufretis vadung thlang tieng biela lal sumkoltu po po kuomah thiempu le van Pathien danhai zirtirtu Ezra-in a hni taphot chu lo pe pei dingin thu ka pêk a nih. 22 Pĕk thei zăt ding chu tangkaruo kilogram sangthum zali, huit kilogram singkhat, uoiin litar sanghni, hriek litar sanghni le machi chu tiem chin nei lo ni’ng a tih. 23 Van Pathienin thaw dinga a ti taphot chu van Pathien tempula dingin thaw ngei ro. Ieng leiin am Pathien lungsenna chu lal le a naupahai ram chunga hin a tla ding a na? 24 Chun, thiempuhai, Levihai, hla saktuhai, kotkhar vêngtuhai le Tempula rongbawltuhai le Pathien ina sinthawtu hrim hrim chu sie amanih, an thil nei man amanih le leiman ieng khom in inchawitir ding a ni nawh ti ka’n hriettir bok cheu.

25 “Chun, nang Ezra, Pathienin varna a pêk chê kha hmangin, Eufretis vadung thlang tieng biela mipuihai chunga indik taka rorêltu dingin in Pathien dan hre mi hotu le rorêltu dinghai chu ruot la, a hre nawhai chu inchuktir rawh. 26 Tu khom in Pathien dân le lal dân zawm naw taphot chu sukhlum amanih, a rama inthoka hnot suok amanih, a thil neihai lakpêk amanih le lung ina intangtir amanih a ni nghàl ngèi ngéi ding a nih” tiin.

27 Hieng anga Jerusalema LALPA Tempul chawimawi nuomna lal lungrila inneitirtu LALPA, ei pi le puhai Pathien chu inpâkin um raw se. 28 Ama chun lal le a khawnbawlhai le a hnuoia thuneituhai po po hmaah a hmangaina chuoi ngai lo chu ka chungah inlangtirin a mi chawimawi a. LALPA ka Pathien zangaina kut chu ka chungah a um leiin a mi sukhuoi a, Israelhai laia lukhâitu deu deuhai chu ka ruola Jerusalem tienga kir tung ve dingin ka hawr khawm thei tah a nih.