Lal Kura thupèk an zong suok
6
1 Lal Daria chun Babulona ro hlu le thil hlui an sie khawmna in chu dap dingin thu a pêk a. 2 Media biela Ektabana kulbing sanga chun lekhabu ziel an hmu suok a, chu taka chun hieng hin a’n ziek a:3 “Thufûn:
Lal Kura inlal tran kuma Jerusalema Pathien Tempul chungchănga lal thupêk insuo chu: Judahaiin hlànbiek an inhlànna hlak hmuna bok Tempul chu bawl nawk ni sien la, a thrut lungphŭm khom a pangngai charah phŭm nawk ni raw se. A in insangzie chu meter sawmhni le pasari ni’ng a ta, a khang chu meter sawmhni le pasari bok ni’ng a tih.
4 Lung chei thuo thum inkarthlak peiah thingphek rem pei ding a na, a bawlnaa sengso chu lal sum ina inthoka pĕk ding a nih.
5 Jerusalem Tempul, Pathien ina mi rangkachak le tangkaruoa siem bûr le bĕlhai, Nebukadnezzarin Babulona a hawn po pohai chu a umna hmunah thak kir nawk vong a, Pathien ina hlŭ lut nawk ding a nih” tiin.
Lal Daria thupek
6 Chuongchun, lal Daria chun hieng ang hin thu a thon a:
“Eufretis vadung thlang tieng optu Tatenai le Sethar-Bozenai le nangni a biela thoktuhai, lo inthier fihlim ro.
7 Hi Pathien in an bawl nawknaa hin lo inrol naw ro. Judahai optu le Juda upahaiin Pathien in hi a hmun pangngaiah bawl thra nawk raw hai se.
8 Chun, hi thu hi ka pêk cheu: Juda upahaiin Pathien Tempul an bawl nawknaa hin thrangpui unla, an sin a chai nawna dingin hieng mihai sengso po po hi in biel sung, Eufretis vadung thlang tienga sie le leiman in khon, lal sum ina inthoka pĕk nghal vat pei ding a nih.
9 Van Pathien kuoma pumraw thilhlâna hmang ding an mamaw taphot bawngchal tuoi hai, beramchal hai, beramte hai, bu le bâl hai, machi hai, uoiin hai le hriek hai chu, Jerusalema thiempuhaiin an hung hni ang peiin in lo pĕk ngèi ngéi ding a nih.
10 Chuonga in thaw chun van Pathien lawm zawng hlănbiek chu inhlăn thei an ta, lal le a naupahai dam sawtna dingin trongtrai thei bok an tih.
11 “Tu khom hi thupek lo thlak danglam taphot chu a in chung insun pot suok unla, insun chun ama chu sun tlangin târ unla, hi thupêk hi a bawsiet leiin a in chu hmunhnokah inchangtir dingin thu ka pêk bok chêu a nih.
12 Hi ka thupek thlak danglamtu amani le Jerusalema Tempul sukse dinga kut lektu lal le mipui tu khom chu a hming chengna dinga hi hmun thlangtu Pathien chun sukbohmang vong raw se. Zawm nghal dingin kei Daria hin hieng thuhai hi ka pêk a nih” tiin.
Tempul inhlăn
13 Lal Daria thupĕk chu hlen suok dingin Eufretis vadung thlang tieng ram optu Tatenai le Sethar-Bozenai le a thawpuihai chun taima takin thrang an lâk a. 14 Chuongchun, Juda upahai chun Tempul bawl chu an sunzom pei a, zawlnei Hagai le Ido naupa zawlnei Zekaria hai thu hril chun nasa takin a sukphŭr tawl a. Israelhai Pathien thupĕk ang le Persia lal Kura le Daria le Artazerzia hai thupĕk ang chun an bawl a, Tempul chu bawl zo a ni ta a. 15 Lal Daria inlala inthoka kum rukna, Adar thla ni thumaha chun Tempul chu zo fel vong a ni ta a.
16 Chuongchun, Israel mipui hai, thiempu hai, Levi hai le mi dang saltăng hung kirhai po po chun Pathien Tempul inhlănna chu hlim takin an hmang a. 17 Pathien Tempul an inhlăn ni chun bawngchal tuoi zakhat, beramchal zahni le beramte zali an inhlăn a. Israel hnam sawm le hnam hnihai suol ngaidamna dingin kelchal sawm le pahni an inhlân bok a. 18 Mosie lekhabua a chuong angin, Jerusalema Pathien Tempula rongbawltu dingin thiempuhai le Levihai chu pawl hrang hrangah an thrĕ dar a.
Fekân kŭt
19 Thla khatna, ni sawm le ni linaahb saltang hung kìrhai chun fekân kŭt an hmang a. 20 Thiempuhai le Levi chihai chun an rêngin inthienna an nei a, an hung inthieng ta a, Levihai chun saltang hung kîrhai po po ta ding le thiempu danghai le anni ta dingin fekân kŭt beramte chu an that a. 21 Israel thla, saltang hung kìr nawkhai le hnam dang umhai, an thil chìng tirdakum laka inthier fihlima LALPA, Israelhai Pathien pomtuhai leh fekân ruoi chu an kìl tlang a. 22 LALPAN Asuria lalc lungril chu anni tieng inthlêktirin, Pathien, Israelhai Pathien in bawlnaah an kut a sukhrat a, LALPAN lawmnaa a sung sip tawl lei chun chol thrang lo bei kût chu hlim takin ni sari sung an hmang a.