Tempul bawl an sunzom
5
1 Chuong lai chun zawlnei Hagai le Ido thlaa mi zawlnei Zekaria hai chun Judai ram le Jerusalema Juda umhai kuoma chun Israelhai Pathien hmingin thu an hril hlak a. 2 Sealtiel naupa Zerubabel le Jozadak (Jehozadak) naupa Jesua hai chun an thu chu zawmin, Jerusalema Pathien Tempul bawl chu an sunzom nawk ta a, Pathien zawlneihai chu an kuomah an um a, an thrangpui a.3 Chu phing leh Eufretis thlang tieng ram optu Tatenai le Sethar-Bozenai le a thawpuihai chu Jerusalemah an hung a, “Hi Tempul hi bawl thra ding le a kulhai indin thar nawk dingin tuin am thu a pêk cheu a?” an ta. 4 Chun, anni bok chun, “Hi in bawltuhai hi tuhai am an na?” tiin an hming an indon bok a. 5 Sienkhom an Pathienin Juda upahai chu a vêng tlat leiin, lal Daria kuoma an chungthu an intlun sung le a donna an hmu hmâ khat chu an in bawl chu an inchawltir chuong nawh.
6 Eufretis vadung ral thlang tieng ram optu Tatenai le SetharBozenai le an sinthawpuihai chun Lal Daria kuomah lekha an thon a, 7 hieng ang hin an ripawt a:
“Lal Daria, i chungah thlamuongna um raw se. 8 Judai ram biela Pathien ropui Tempul an bawlna hmun kan sir thu i kuomah kan hung ripawt a nih. Mawi taka lung ser nama bawl a na, a bang chunga chun thing nawt nam an khang a. Taima taka anni ngei inrawina hnuoia anni kut ngeia an bawl a na, hmâ khom a sawn hrât hle.
9 “‘Hi Tmpul hi bawl ding le a kulhai indin thar dingin tuin am thu a pêk cheu a na?’ tiin an upahai kan indon a.
10 An hotuhai hming inchika i kuoma kan hung ripawt theina dingin an hminghai khom kan indon bok a. Hi hi an mi donna chu a nih:
11 ‘Keini hi hnuoi le van Pathien siehlawhai kan ni a, Israel lal ropui takin kum tam tak liem taa a lo bawl zo tah kha kan indin thar nawk el a nih.
12 Kan pi le puhaiin vana Pathien an suklungsen leiin anni chu Kaldai mi Babulon lal Nebukadnezzar kutah a pêk a, ama chun hi Tempul hi a suksiet a, mihai chu Babulon tieng salah a thruoi a.
13 Amiruokchu, Babulon lal Kura hung inlal tran kum chun Pathien in hi bawl thra nawk dingin Lal Kura chun thu a pêk a.
14 Nebukadnezzarin Jerusalema an Pathien ina inthoka rangkachak le tangkaruoa siem bûr le bèl a lakhai, Babulona ama tempula a siehai chu lal Kura chun a lak suok vong a. Chun, lal Kura chun mi pakhat a hming Sesbazar chu keini mi optu dingin ami pek a, a kuomah,
15 ‘Hieng bûr le bèlhai hi la lá, fe la, Jerusalema Tempulah sie la, Tempul chu a hmun ngaiah bawl nawk ni raw se’ tiin.
16 “Chuongchun, Sesbazar chu a hung a, Jerusalema Pathien in lungphŭm khom a hung phŭm a. Chu nia inthoka voisun chen hin bawl zom a la ni zing a, sienkhom bawl zo a la ni nawh.
17 Chuleiin, lalin thra a ti zawng a ni chun Babulon lal ina thil hlui sie khawmnaah lal Kura’n Jerusalema Pathien in indin thar nawk dinga thupêk a lo insuo chu zong suok ni raw se. Chu hnungah hi chungthua thu tlûkna chu lalin mi hung hril raw se” tiin.