Tempul bawl dodalna
4
1 Saltang hung kirhaiin LALPA Israel Pathien ta ding tempul an bawl tran nawk tah ti Juda le Benjamin hnam hmêlmatuhaiin an lo hriet a. 2 Chuongchun, Zerubabel le an sungkuoa lukhaituhai kuomah an fe a, “Keini khomin bawlpui veng kan ti cheu, in Pathien biek hi keini khomin kan biek ve a, hi taka mi thruoitu Asuria lal Esar-hadon inlal laia inthok ta khan keini khom a kuomah kan inthawi hlak a nih” an ta. 3 Nisienlakhom, Zerubabel le Jesua le Israel sungkuo lukhaituhai chun an kuomah, “LALPA kan Pathien ta ding Tempul kan bawlnaa hin in hung thrang ve ngai naw nih. Persia lal Kura thupek angin LALPA, Israel Pathien ta dinga Tempul chu keini ngeiin kan bawlpek ding a nih” an ta.4 Chu phing leh an kawl le kienga mihai chun Juda mihai chu suklunghnuol tumin an thrang a, Tempul chu bawl zom pei lo dingin an vau a. 5 Persia lal Kura inlal sung po po le Daria inlal hun chenin anni dodalin an thrang ru a, hêktu dingin hrilpuitu dam a hranin an ruoi a, an thiltumhai chu sukhlamzui an tum tlat a.
A hnung peia dodalna dang
6 Chu hnung chun, Lal Artazerzia inlal tran tir laiin Judai ram le Jerusalema umhai chu an hmĕlmahan lal kuomah hĕkna lekha an thon a. 7 Chu hnung khom chun Persia lal Artazerzia kuomah Bislam hai, Mithredat hai, Tabeel hai le an inkoppuihaiin Judahai an hĕkna lekha, Aramik tronga inziek chu an thon bok a, chu chu Persia trongin lal chu an inletpek a. 8 Chun, ram optu Rehum le lekha ziektu Simsai khomin Jerusalem mihai ngirhmun chu Persia lal Artazerzia kuomah ripawt an thon a. 9 A thontuhai chu: Ram optu Rehum le a lekhaziektu Simsai le an inkoppui Erek le Babulon le Elam ram Susaa mi rorêltuhai le thoktuhai dam, 10 mi ropui Asurbanipal (Osnapar)-in sala inthoka a hung insuo, Samaria khawpui le Eufretis vadung thlang tieng rama a’n chengtirhai dam chu an nih.
11 Lal Artazerzia kuoma chun hieng ang hin lekha an thon a:
“Lal tak Artazerzia, i siehlaw Eufretis vadung thlang tienga mihaiin chibai kan buk che. 12 I kuoma inthoka Juda mi hung tunghai kha Jerusalemah an hung a, hi khawpui suol tak le hel hmang hi indin thrain, a lungphŭmhai an phŭm thra ti lalin lo hre raw se. 13 Chu bakah, hi khuo hi indin thra a, a kulhai siem zo a ni phâ chun sie le leiman le an thil nei man hrim hrim chawi nuom ta naw ni hai a, lalin sum a chân pha ding a nih ti lo hre bok raw se. 14 Lal ta dinga mawphurna latu kan ni a,a sukhmêlhema lal a um hmu hi keini ta dingin a fel naw leiin hi thu hi lal kuomah kan hung intlun a nih. 15 Chuleiin, hi khuo hi hel hmang khuo a nizie dam, a ram le lal ta dinga buoina siemtu a ni hlakzie dam le tiena tlanga inthoka hel zing zing a nizie dam lalin a hriet theina dingin thil hlui siekhawmnaa i pi le puhai chanchin inziekna buhai chu indaptir raw khai. Chuong thil leia hi khawpui hi suksiet a lo nih. 16 Hi khawpui hi indin thrat a ni a, a kulhai zo fel a ni phâ chun Eufretis vadung thlang tieng hin chan nei naw phăng i tih ti kan inlau thu lal kan hung inhriettir a nih” tiin.
17 Lal chun donna a hung thon a:
“Ram optu Rehum, lekha ziektu Simsai le an inthloppui, Samaria ram le Eufretis vadung thlang tienga umhai po po chibai ka bûk cheu. 18 In lekha hung thon kha ka hmaah fie takin an inlet a 19 Chuongchun, thu ka pêk a, an zong a, hi khuoa mihai hi tiena tlanga inthokin lal chungah an hel hlakzie dam, chu taka chun buoina le helna a tlung hlakzie dam kan hmu suok ta a. 20 Jerusalema khan lal thilthawthei tak, Eufretis vadung thlang tieng po poa rorêltu dam an lo um ta hlak a, an kuomah sie chawiin, thilpêk hrang hrang an lo pèk ta hlak a. 21 Khang mihai khan thu ka pèk nawk hmâ khat chu khawpui siem thrat sin kha chawlsan phot dingin thupek lo insuo ro. 22 Hi thil hi ngaitha hrim hrim naw ro. Lal ta dinga sietna ding thil hi ieng leiin am a zuolkai pei ei phal ding a na?” tiin.
23 Rehum le lekha ziektu Simsai le an inkoppuihaiin lal Artazerzia lekhathon an tiem zo chun inhmaw takin Jerusalema Judahai kuomah an fe nghal a, thawluinain an thilthaw lai chu an inchawltir a. 24 Chuongchun, Jerusalema Pathien in indin thar sin chu Persia lal Daria hung inlal kum hnina chenin an chawlsan ta hri a.