Maichăm an indin thar
3
1 Mani khuo senga Israelhai an inbengbel nawk hnungin, thla sarina favang intran hlim chun inthuruol takin Jerusalemah an pung khawm a. 2 Jozadak naupa Jesua le a thiempu chanpuihai le Sealtiel naupa Zerubabel le a rongbawlpuihai chun Pathien mi Mosie Dan bua inziek angin pumraw thilhlâna hmang ding Israelhai Pathien maichàm an siem a. 3 An kawl le kienga mihai chu tri hle hai sienkhom, maichàm chu a hmun pangngaia chun an indin thar nawk a, zing tieng le zan tieng pumraw thilhlân an inhlàn a.4 Chun, Mosie dàn bua inziek angin, Bawkte Kŭt an hmang a, ni tina pumraw thilhlân inhlàn dinga bituk ang thlapin an inhlàn a. 5 Pumraw thilhlân băkah thla thar lawmnaa thilhlânhai dam, LALPA ta dinga kût ni an ruot an inser chănga thilhlânhai dam, mani lung puoka thilhlânhai dam chu an inhlàn bok a. 6 LALPA tempul lungphùm chu la phùm tran naw hai sien khom, thla sarina ni khat nia inthok chun pumraw thilhlânhai chu an inhlàn tran nghal a nih.
Tempul an indin thar
7 Persia lal Kura phalna pek angin, lung sertu le themthiemhai an ruoi a, Tura le Sidon mihai chu Lebanona inthokin Jopa kaiah sidar thing an hung intoltir a, a manah bu le uoiin le hriek an pêk a. 8 Sealtiel naupa Zerubabel hai, Jozadak naupa Jesua hai le an unau dang thiempuhai, Levi chia mihai le Jerusalema saltang hung kir po po chun Jerusalema Pathien in an tlunga inthoka a kum hnina le thla hninaa chun Tempul bawl chu an tran a, Levi chia mi, kum sawmhni le a chung tieng po chu LALPA in bawla sinthawhai inrawitu dingin an ruot a. 9 Chuongchun, Jesua naupahai le a unauhai, Kadmiel le a naupahai, Hodavia thlahai chun LALPA tempula sinthawtuhai chu an inrawi a; Levi chia mi Henedad sungkuohai chun an thrangpui bok a.
10 In bawltuhaiin LALPA Tempul lungphum an phùm zo chun, Israel lal Davidan thaw dan ding a lo ruot angin, thiempuhai chun thuom an inbel a, tawtawrawt mût dingin an umna ding sengah an ngǐr a, Levi chia mi Asaf thlahai khom chu LALPA inpakna hla sak dingin darbenthek leh an ngîr bok a. 11 Chuongchun lawmthu hrilin,
“Ama chu a thra si a,
A ngilneina chu kumtluongin,
Israelhai chungah a um zing”
tiin LALPA chu an inpăk a. LALPA in lungphŭm an phŭm tàk lei chun lawm taka LALPA inpâkin mipui chu an khĕk dur dur a.
12 Nisienkhom thiempuhai, Levihai le sungkuoa lukhaitu upa tieng, Tempul hmasa la hre phakhaiin Tempul thrut an rem lai an hmu chun, mi tam tak hlima an khèk dur dur laiin, inring takin an lo trap ve thung a. 13 Hlima an khĕk ri le trap ri thlier hran thei lo khopa nasaa infawk khawm chu hla taka inthok khoma hriet phak khopin a’n ring a nih.