Juda lal Ahaz
28
1 Ahaz chu kum sawmhni mi a niin a hung inlal a, kum sawm le kum ruk Jerusalemah a’n lal a. A thlatu Davidan LALPA mithmua thil thra a thaw angin a thaw ve naw a. 2 Israel lalhai thaw dan a hraw lem a, a biek dingin Baal pathien, milim sung chop a siem a. 3 Ben Hinom ruomah inthawina rimtui a raw a, Israelhai hmaa LALPAN hnam a hnot suokhai thil ching tirdakum tak chu zui vein a naupahai chu meiah a’n hlàn a. 4 Hmunsânga maichama hai le tlang sîp le thing buk inzar thratna hnuoi taphotah inthawiin rimtui a raw hlak a.5 Chuleiin, LALPA a Pathienin ama chu Aram lal kutah a pêk a, an hung hne a, a mihai tam tak chu an man a, Damaska tieng salah an thruoi a. Israel lal kutah a pêk bok a, ama chun mi tam tak a that a, 6 Judahaiin LALPA, an pi le puhai Pathien chu an nghatsan tak leiin, Remalia naupa Peka lem chun ni khat thilthuin Judai rama mi huoisen ngot mi nuoikhat le singhni a that a nih. 7 Chun Efraim mi hrat Zikri chun lal naupa Maaseia hai, lal in enkoltu Azrikam hai le lal dottu Elkana hai chu a that a. 8 Israelhai chun an unauhai nuoi hni zet, nuhmeihai le an naunu le naupa hai chu salah an thruoi a, râllâk sum tam tak leh Samaria tieng an hawn a.
Zawlnei Oded
9 Amiruokchu, chu taka chun LALPA zawlnei, a hming Oded a um a, Samaria hung tlung ding sipaihai chu tuok dingin a suok a. An kuomah, “Judahai chungah LALPA in Pathien lung a sen leiin in kutah anni chu a pêk cheu a. Sienkhom lungsena in suom ri khan van a hang tlung a 10 Tu hin Juda le Jerusalem mihai chu a nuhmei a pasalin bawiah siem in tum a. LALPA in Pathien chungah thil suol in thaw a ni naw maw? 11 Tu hin ngaithla ro, in unauhai, sala in manhai hi inkirtir nawk ro. LALPA lungsenna nasa tak chu in chungah a’n ling a nih” a ta.
12 Efraim-hai thruoitu threnkhat, Jehohanan naupa Azaria hai, Mesilemot naupa Berekia hai, Salum naupa Jehizkia hai le Hadlai naupa Amasa hai chun indonaa inthoka hung kirhai chu an lo hmason bok a. 13 An kuomah, “Salhai chu in hung thruoi lut ding a ni nawh. Ei suol le bawsietna chu belsain LALPA chungah bawsietna dang a hung intlun ding a nih. Ei suolna hi a nasa hle a, Israel mihai chungah lungsenna nasa tak a um a nih” an lo ti ve a.
14 Chuongchun, an hotuhai le mipui pungkhawmhai hmaa chun sipaihai chun sala an hung thruoihai le râllâk sumhai chu an pek suok a. 15 An hming hril tah thruoituhai chu an hung tho a, tânghai chu an thruoi a, saruoka um po chu râllâk silfenhai chun an inthuomtir a, puon an pek a, pheikhok an inbuntir a, fak le dawn ding le inzûtna ding hriek an pêk a, a ongrophai chu sabengtung chungah an inchuongtir a, Tûm khuo Jerikoa an unauhai kuomah an zu thak a, Samaria tieng an hung kir nawk a.
16 Hieng hun lai hin lal Ahaz chun thrangpuitu dinga Asuria lal fiel dingin mi a tir a. 17 Edomhai chun Judai ram an hung rùn nawk a, mihai chu salah an thruoi a. 18 Chuong lai zing chun Filistinhai khomin tlang thrutaa khuohai le Judai ram sim tieng an hung rùn a, Beth Semes hai, Aijalon hai, Gederot hai le Soko hai, Timna hai le Gimzo hai le an sè vela khuohai chu an hung bei a, an làk a, an hluo a. 19 Juda lal Ahaz chun Judai ramah rîtlona sukhluor a, LALPA lakah a ringum naw hulhuol leiin LALPAN Judahai chu a suktlawm a nih. 20 Asuria lal Tiglat-Pileser khom a kuomah a hung a, sienkhom thrangpui nêk hmanin a sukbuoi lem a. 21 Ahaz chun LALPA Tempul le a lal ina inthok le a mi lienhaia inthokin thilhai a lak a, Asuria lal chu a pêk a, sienkhom a thrathnempui chuong nawh.
22 Buoinain a nangching lai chun lal Ahaz chun LALPA lakah thil suol a thaw rawn deu deu lem a. 23 Ama hung dotu Damaska mihai pathien kuoma chun a’n thawi a, “Aram lal pathien chun anni a thrangpui leiin kei khom a mi thrangpui ve theina dingin a kuomah ka’n thawi a nih” dam a ti a. Nisienlakhom, chu chu ama le Israel mi po po sietna a ni si a. 24 Ahaz chun Pathien Tempul cheinahai chu a lak khawm a, a chawi hmang vong a. LALPA Tempul kothai chu a kal a, Jerusalem kotthler kil tinah maichàm a siem a. 25 Judai ram khaw tinah pathien danghai ta dinga rimtui inhlànna ding hmunsâng a siem a, a pi le puhai Pathien, LALPA chu a cho lungsen a.
26 A’n lal laia thil tlung danghai le a khawsak dan po po chu, a bula inthoka a tawp chenin, Juda le Israel lalhai chanchin inziekna buah a chuong. 27 Ahaz chu a pi le puhai kuomah a chawl a, Jerusalem khawpuiah an phùm a, sienkhom Israel lalhai thlàna ruok chu a ni nawh. A naupa Hezekia chun a lalna chu a hung hluo ta a.