Fekân kùt dinga inbuotsaina
30
1 Hezekia chun Israel ram le Judai ram po poah mi a tir a, Efraim-hai le Manase-hai rama khom lekha a thon a, Jerusalema LALPA tempulah hung a, LALPA, Israelhai Pathien Fekàn Kùt hung hmang dingin a fiel a. 2 Lal le a mi lienhai le Jerusalema pungkhawmhai po po chun a thla hninaa Fekàn Kùt hmang an rot a. 3 Chuong lai chun thiempua ser thienghlim an la tam tawk naw bakah Jerusalemah mipui an la pung khawm tam tawk naw leiin a hun pangngaiah kût an la hmang thei hri naw a. 4 Lal le pungkhawmhai chun an thil rot chu thra hlein an ngai a. 5 Chuleiin, Israel ram po poah, Beershebaa inthoka Dan chenin LALPA, Israelhai Pathien ta dinga Jerusalema Fekàn Kùt hung hmang dinga inhriettirna chu thon dar an rèl a. Dàn ang chun tam tak pungkhawma hmang ding a na, sienkhom chuong ang chun hmang a la ni hri nawh.6 Chuongchun, lal thupekin Israel ram le Judai ram hmun tinah lal le a mi lienhai lekhathon chu thu phurtuhaiin an tlànpui a. Chu lekhathona chun, “Nangni Israel thlahai, Asuria lalhai kuta inthoka tlan suok la dam sunhai, LALPA, Abraham Pathien, Isak Pathien le Israel Pathien chu nangni tieng a hung ngha nawk theina dingin, ama tieng hung ngha kir nawk ro. 7 In pi le puhai le in unauhai chu LALPA, in pi le puhai Pathien chunga an ringum naw leia mihai pangzata a siemzie nangni ngeia in hmu ang hin nangni ruok chu um ve naw ro. 8 In pi le puhai ang khan lulul ve naw unla, LALPA kuomah tlu lut ro. Kumkhuoa dinga a ser thienghlim, a hmun thienghlima chun hung ro. LALPA, in Pathien rong chu bawl ro, chuongchun in chunga a lungsenna nasa tak chu nangni lakah a lak kieng ding annawm. 9 LALPA tieng in hung kìr chun, in unauhai le in nauhai chu sala mantuhai inlungsiettir a ta, hi rama hin hung kir nawk an tih; LALPA in Pathien chu ngilnei tak le zangai thei tak a ni si a. Ama tieng in ngha phot chun nghatsan hrim hrim naw ni cheu” tiin.
10 Lekhathon tlànpuituhai chu khaw tinah, Efraim le Manase hai ram po poah, Zebulun ram chenin an fe a, sienkhom anni chun hmusitin an lo nuizat a. 11 Amiruokchu, Aser hai, Manase hai le Zebulun hai laia threnkhat ruok chu inphahnuoiin, Jerusalemah an fe a. 12 Judai rama lem chu LALPA thu anga lal le mi lienhai thupek chu hlen suok ngei dingin Pathien kut chu mipuihai chungah a um a, lungril hmun khat a’n puttir a.
Fekân kùt an hmang
13 A thla hninaa chun chol thrang lo bei kût hmang dingin mipui tam tak Jerusalemah an pung khawm a. 14 Jerusalem khaw sunga maichàm an lo siemhai po po chu an thriek vong a, rimtui rawna maichàmhai po po khom an suksiet a, Kidron vadungah an dehawn a.
15 A thla hnina ni sawm le ni linaa chun Fekân kûtna beramte chu an that a. Thiempuhai le Levihai chu an inzak hle a, chuongchun an insukthienghlim a, pumraw thilhlânhai chu LALPA Tempula chun an hung lak lut a. 16 Pathien mi Mosie dana a hril ang takin mani thawna ding hmun senga chun an um a, thiempuhai chun Levihai hung chawi thisen chu an the a. 17 Mipuihai lai chun ser le sang thaw dinga an insukthieng hman naw leia LALPA kuoma Fekan kùt beramte inhlàn thei lo an um a, chuonghai chu LALPA ta dinga sukthienghlim dingin a thienghlim lohai puolin Levihai chun Fekân kùtna beramtehai chu an that a. 18 Efraim mihai, Manase mihai, Isakar mihai le Zebulun mihai laia tam tak chu insukthienghlim lo an ni a, sienkhom dan lo angin fekân kùtna ruoi chu an fak ve a. Anni ta ding chun Hezekia-in a hnipek a, 19 “Tu khom lungril taka Pathien, an pi le puhai LALPA Pathien zongtu taphot chu hmun thienghlim dan ang takin insukthienghlim naw hai sienkhom LALPA thratna chun ngaidam tawl raw se” tiin a trongtrai a. 20 Hezekia trongtraina chu LALPAN lo ngaithlak a, mipuihai chu a sukdam a.
21 Jerusalema um Israelhai chun chol thrang lo bei kùt chu hlim takin ni sari sung an hmang a; Levihai le thiempuhai chun LALPA chawimawina rimawi hmangruohai chu inring taka tumin ni tinin LALPA kuomah inpakna hlak an sak a. 22 Levihaiin thiem taka LALPA chawibiekna rong an bawlna chungthuah Hezekia chun Levihai chu a’n pak tawl a. Chuong ang chun, LALPA an pi le puhai Pathien kuomah inremna thilhlânhai chu inhlàna LALPA chawimawiin, an chan seng faa dawnin, ni sari sung an kût a.
Kût an hmang non
23 Pungkhawmhai po po chun ni sari dang kût sunzom an rot a, chuongchun ni sari dang chu hlim takin an kùt nawk a. 24 Juda lal Hezekia chun kùt hmangna dingin mipuihai kuomah bawngchal sangkhat le beram sangsari a pêk a; mi lienhai khomin bawngchal sangkhat le beram le kèl singkhat an hung thaw a. Thiempu tam tak chu an insukthienghlim bok a. 25 Juda mipui po po chu, thiempuhai le Levihai leh, Israel rama inthoka hunghai le hnam dang, Israel rama inthoka hung le Judai rama umhai chu an hlim hle a. 26 Jerusalema mihai khom nasa takin an hlim a, Israel lal Davida naupa Solomon hnungah chuong ang hrim hrim chu Jerusalemah a la um ngai nawh. 27 Thiempuhai le Levihai chu an tho a, mipuihai chu mal an sawm a, Pathienin a lo ngaithlak a, an trongtraina chun a chengna Hmun Thienghlim van chu a tlung si a.