Juda lal Ahaz
16
1 Israel lal Remalia naupa Peka inlala inthoka kum sawm le kum sarinaa chun Juda lal Jotham naupa Ahaz chu a hung inlal tran a. 2 Lal a ni hin Ahaz chu kum sawmhni mi a na, Jerusalemah kum sawm le kum ruk a’n lal a. Sienkhom a pu Davida’n LALPA a Pathien mithmuah thil thrâ a thaw angin a thaw ve nawh. 3 Israel lalhai lampui hraw hlak chu a hraw ve a, LALPAN Israel thlahai hmaa a hnot suok hnam danghai thil chìng tirdakum tak el chu a thaw a, a naupa ngei khom meiah a’n hlân hiel a. 4 Hmunsânga bawlhmuna dam, muol sîpa dam le thing buk zar lien tin hnuoia dam thilhlan inhlanin rimtui an la raw zing hlak.5 Aram lal Rezin le Israel lal Remalia naupa Peka chu Jerusalem bei dingin an hang fe a, Ahaz chu an inhuol a, sienkhom an hnè thei naw a. 6 Chuong hun lai chun Aram lal Rezin chun Elath khuo chu Aram ta dingin a lâk nawk a, Elath-a inthokin Judahai chu a hnot suok a, Edom mihai chu a thun lut a, tu chen hin an la hluo ta zing a nih.
7 Ahaz chun Asuria lal Tiglat-Pileser kuomah, “I siehlaw le i hnuoia lala um ka na, mi bei dinga hung Aram lal le Israel lalhai kuta inthok hin mi hung san suok rawh” tia hril dingin mi a tir a. 8 Ahaz chun Asuria lal kuoma pek dingin LALPA tempul le lal ina ro siekhawmnaa tangkaruo le rangkachak um taphot chu a lak suok a, a thon bok a. 9 Asuria lal chun a ngenna chu a lo remti a, Damaska a rùn a, a lâk a, a khuoa chenghai po po chu Kir ramah salin a thruoi a, Rezin chu a that bok a.
10 Lal Ahaz chu Asuria lal Tiglat-Pileser be dingin Damaska khuoah a fe a. Damaska khuoa chun maichàm a hmu a, a lim le an siem dan ang chie chu enton dingin thiempu Uria kuomah a thon a. 11 Damaskaa inthoka Ahaz a hung kir hmain thiempu Uria chun maichàm chu lal Ahaz-in a ruongâm a thon ang char chun a lo siem zo hman a. 12 Damaskaa inthoka lal a hung kir chun maichàm chu a hmu a, a va pan a, maichàma chun a kai a. 13 Maichàma chun pumraw thilhlân dam, bu le bâl thilhlân dam, dawn thilhlân dam le inremna thilhlân dam inhlànin thisen a the a. 14 LALPA hmaa dar maichàm, LALPA tempul tuol hmài le a maichàm siem thar inkara um chu a lak son a, a maichàm siem thar hmar tieng chun a sie a.
15 Lal Ahaz chun thiempu Uria kuomah, “Hi maichàm lien taka hin zing tienga pumraw thilhlân le zan tienga bu le bâl thilhlân dam, lal ta dinga pumraw thilhlân le bu le bâl thilhlân dam, a ram mipui ta dinga pumraw thilhlân dam, bu le bâl thilhlân dam le dawn thilhlân dam chu inhlàn la, pumraw thihlân le thilhlân hrang hranga thisenhai po po chu maichama chun thè rawh. Dar maichâm ruok hi chu aiennaa ka hmang ding maichàm ni’ng a tih” tiin a hril a. 16 Thiempu Uria chun Lal Ahaz thupek ang tak chun a thaw a.
17 Lal Ahaz chun dar maichàm sir tuok inkhumna bang chu a hawk thlak a, maihùnhai chu a tolnaa inthok chun a lak hmang vong a. Dâra siem bawngchal chunga inthrut tuizèng chu a lak thlak a, lung rem chungah a’n thrut a. 18 Tempula Sabat ni poa a chung an zar hlak chu a lak hmang a, Asuria lal dit dan angin, lal ina inthoka tempula lal lutna kot khom chu a khâr bok a.