Israelhai leh an indo
16
1 Asa inlal kum sawmthum le kum ruknaa chun Israel lal Baasa-in a hang bei a, Juda lal Asa rama inthoka tu khom suoka an lut thei nawna dingin Rama khuo chu kulin an huontir a. 2 Chu phing leh Asa chun LALPA tempul le ama ina mi tangkaruo le rangkachak um po po chu a lak suok a, Damaskaa Aram lal Ben-Hadad kuomah a thon a, 3 “Ka pa le i pa inkàra inremna thuthlung an siem ang bok khan nangma le keima inkàra khom thuthlung siem veng ei tih. En ta, tangkaruo le rangkachak ka hung thon hi. Israel lal Baasa hi ka rama inthoka a’n hnùk dokna dingin ama le thuthlung in lo siem tah kha tu hin sût el rawh” tiin thu a thon a.4 Ben-Hadad chun lal Asa thu chu a remtipui a, Israel rama khuohai rûn dingin a sipai kawmandarhai a tir a, Ijon khuo dam, Dan khuo dam, Abel Maim le Naftalia biela hmangruo sie khawmna khuo po po chu a bei a. 5 Chu thu chu Baasa-in a hriet charin Rama khuo an huon lai chu tawpsanin, a thil thaw tum chu a thrul ta a. 6 Asa chun Juda mihai po po chu a thruoi a, Baasa-in Rama khaw inhuonna thing le lung a lak khawmhai po po chu an lâk vong a, Geba le Mizpa khaw kulh siemnain a hmang a.
Zawlnei Hanani
7 Chuong lai chun zawlnei Hanani chu Juda lal Asa kuomah a hung a, a kuomah, “LALPA i Pathienah innghat loa Aram lal i ring lem leiin Aram lal sipaihai chu i’n suo tah a ni kha. 8 Kush mihai le Libian mihai kha sipai ruol tam tak, tawlailir le sakor chungchuong mi khom tam tak an ni naw am a ni? Ni hai sien khom, LALPA i ring leiin i kutah a pêk a ni kha. 9 Ama tienga lungril pe vongtuhai chu sukhrât dingin hnuoi chung po poa hin LALPAN mit a’n lèn kuol zing hlak a nih. Thil invetthlak tak i thaw leiin tuta inthok chu indopui nei zing ta’ng i tih” a ta. 10 Asa chu zawlnei chunga chun a lungsen hle a, a lungsen chun lung inah a khum ta hiel a. Chuong lai zing chun threnkhat chu rawng takin a nêksawr bok a.
Lal Asa inlal tawp dan
11 Asa chanchin a bula inthoka a tawp chen chu Juda le Israel lalhai chanchin inziekna bu-ah a chuong. 12 Kum sawmthum le kum kuo a’n lal kumin Asa kepar chu nasa takin a hung na ta a, a na inrim hle a, sienkhom a natnaa chun LALPA rawn loin damdawi thiemhai a ruoi lem a. 13 Kum sawmli le kum khat a’n lal kumin Asa chu a thi a, a pi le puhai kuomah a chawl ve ta a. 14 Davida khawpuia ama thlân dinga a kera chun an phùm a. A kuonga chun rimtui siemtuhaiin rimtui chi hrang hrang an siemhai chu an thun treu a, chu chunga chun a ruong chu an inzàl a, inza inentirnain ama puolin meipui nasa tak an sep a.