Lal Asa thil siem thrathai
15
1 Chun, Oded naupa Azaria chungah Pathien thlarau a hung tlung a. 2 Asa hmuok dingin a suok a, a kuomah, “Asa le Juda mi po po le Benjamin mi po po hai, mi lo ngaithla ro. Amaa in um sung po nangniah LALPA khom um a tih. In zong chun ama chu hmung in ta, in inphatsan chun inphatsan veng a ti cheu. 3 Israel mihai chu hun sawt tak Pathien tak nei lo le zirtirtu ding thiempu um lo le dàn khom nei loin an lo khawsa a. 4 Amiruokchu, an beidongin LALPA, Israel Pathien tieng chu an ngha a, an zong a, ama chu an hmu a. 5 Chuong hun lai chun inzin suok a him naw a, a rama chenghai po po chu buoina nasa takin a chìm a. 6 Hnam le hnam, khuo le khuo an insuksiet rem rum a, beidongna chi tinrêngin Pathienin a chokbuoi tawl a. 7 Nangni ruok chu hrât takin um unla, inthlàdà naw ro, in thilthaw ra chu in hmu ding a ni si a” a ta.8 Chuong thuhai le zawlnei Oded naupa Azaria thu hrilhai Asa-in a hriet chun a sukhuoi pha a, Judai ram le Benjamin ram po po le Efraim tlangrama khuo an lak po poa inthok chun thil tirdakum milimhai chu a’n thiel fai vong a. LALPA tempul tuolpuk epa maicham chu a siem thra a. 9 Judai ram le Benjamin rama mi po po le a kuomah Pathien a um ti an hriet leia Efraim le Manase le Simeon rama inthoka ama hung bèltuhai po po chu a ko khawm a. 10 Asa inlal kum sawm le kum ngana le thla thumnaa chun Jerusalemah an hung pung khawm a. 11 Chu ni chun an ràllàk bawngchal zasari le beram le kèl sangsariin LALPA kuomah an hlànbiek a. 12 Lungril po po le thlarau po poa LALPA, an pi le puhai Pathien chu zong dingin thu an thlung a. 13 LALPA, Israelhai Pathien zong lo chu a chin a lien, nuhmei pasal tu khom sukhlum dingin thu an thlung bok a. 14 Rawl inring taka khêkin, tawtawrawt le beram ki mutin, LALPA hming sâlin intiemkamna thu an insam a. 15 Lungril taka intiemkamna thu chu an insam leiin Juda mi po po chu an lawm tlang a, titakzetin LALPA chu an zong a, hmu khom an hmu hrim a, LALPA chun kil tinah hadamna a pêk a.
16 Lal Asa chun a pi Maaka khom chu Asera lem tirdakum tak thing an kertir leiin lalnu a nina a hlippek a, Asa chun a milim siem chu a phûr thlùkpèk a, a sât nawi vong a, Kidron vadungah a raw a. 17 Israel rama inthokin hmunsânghai chu inthiel fai zo naw sienkhom Asa lungril chu a dam sungin LALPA chungah a ringum a nih. 18 A pain Pathien kuoma a lo inhlàn tah leh ama lo inhlàn tah tangkaruo le rangkachak le bûr le bèlhai po po chu Pathien tempulah a lâk lùt a. 19 Asa inlal hun kum sawmthum le kum nga sung po chun indo hrim hrim a um ta nawh.