Juda lal Jehosafat
17
1 A naupa Jehosafat chun a lalna chu a hung hluo a, Israel mihai do dingin a’n suknghet a. 2 Judai rama kul nei khuo po poah a sipaihai chu a sie a, Judai ram le a pa Asa lo lak Efraim rama khuoa hai chun ralvengtuhai a sie vong bok a.3 Jehosafat chun a hun hma tieng a thlatu Davida kalchawi dan zuia, Baal dam a biek ve naw leiin a kuomah LALPA a um a. 4 Israel mihai chìng dan zui ve loin an pi le puhai Pathien a zong a, a thupekhai a zawm lem a. 5 Chuleiin, a ram chu ama enkolna hnuoiah LALPAN a suknghet a, Judai rama mi po poin thilpêk an hung pèk a, hausain a hung ropui ta hle a. 6 A lungril chu LALPA lampui tieng a thle a, Judai ram hmunsânga bawlhmun po po chu a thriek a, Asera lim thinghai chu a phûr thlûk vong bok a.
7 A hung inlala inthoka kum thumnaa chun a thoktu Ben-Hail hai, Obadia hai, Zekaria hai, Nathanel hai le Mikaia hai chu Judai ram khuoa mihai inchuktir dingin a tir suok a; 8 anni chu Levi hnama mi Semaia hai, Nethania hai, Zebadia hai, Asahel hai, Semiramot hai, Jehonathan hai, Adonija hai, Tobija hai le Tob-Adonija hai bàkah thiempu Elisama le Jehoram haiin an zui a. 9 LALPA Dan Bu chawiin Judai rama khaw tin an sir a, mihai an inchùktir a.
Jehosafat ropuizie
10 Judai ram vela ram dang po po chun LALPA an tri leiin tu khomin Jehosafat chu an do ngam nawh. 11 Filistin mi threnkhat chenin Jehosafat chu thilpêk an hung inhlàn a, sie dingin tangkaruo an hung chawi a; Arab mihai khomin ran ruol, beramchal sangsari le zasari le kèlchal sangsari le zasari an hung pek bok a.
12 Jehosafat chu a hung ropui deu deu a, Judai rama chun kul le thil siekhawmna khuohai a bawl a, 13 Judai ram khuoa hai chun thil a sèk khawm treuh bakah Jerusalemah ral do thiem mi a sie treuh bok a. 14 Chuonghai chu an sungkuo ang peiin, Juda sungkuoa sipai sangkhat pei inrawituhai chunga kawmandarhai chu Adna, mi nuoithum chunga kawmandar; 15 a dotah Jehohanan, mi nuoihni le singriet chunga kawmandar; 16 a dot nawkah LALPA rongbawltu dinga ama thu ngota inpe Zikri naupa Amasia, sipai nuoihni chunga kawmandarhai an nih. 17 Benjamin sungkawa inthokin, sipai huoisen Eliada, thal le phaw chawi mi nuoihni chunga kawmandar le 18 Jehozabad, indo dinga inralthuom sa mi nuoikhat le singriet chunga kawmandar hai an nih. 19 Hienghai hi Judai ram sunga kul nei khaw hrang hranga sipai a siehai baka lal kuoma umhai chu an nih.