Judai ram lal Abija
15
1 Nebat naupa Jeroboam inlala inthoka kum sawm le kum rieta chun Abijaa chu Judahai chunga lalah a hung um tran a. 2 Jerusalemah kum thum a’n lal a, a nu hming chu Maaka a na, Absalom naunu a nih. 3 A hmaa a pain thil suol a thaw po po kha Abija khomin a thaw ve a; a pu Davidan a lungril a pèk zo angin a lungril chu LALPA a Pathien tieng a pêk zo ve nawh. 4 Sienkhom Davida zarin LALPA a Pathien chun Jerusalema a khawnvar ding pein, ama hung thlaktu ding naupa a’n dinpek a, Jerusalem khuo a’n din nghet bok a. 5 Hit mi Uria chungthua chauh naw chu Davida chun LALPA mithmuah thil fel a thaw a, a dam sungin LALPA thupèkhai chu vong naw lai a nei nawh.6 Abija dam sungin Rehoboam le Jeroboam chu an indo zing a. 7 Abija inlal sunga thil tlung danghai le a thilthawhai chu Juda lalhai inlal lai chanchin inziekna lekhabuah a chuong naw am a ni? Abija le Jeroboam chu an indo hlak a. 8 Chun, Abija chu a thlatuhai kuomah a chawl a, Davida khawpuia chun an phùm a, a naupa Asa chun a lalna chu a hung hluo a.
Juda lal Asa
9 Israelhai lal Jeroboam inlala inthoka kum sawmhnia chun Asa chu Judahai lalah a hung um tran a. 10 Kum sawmli le kum khat Jerusalemah a’n lal a, a pi hming chu Maaka a na, Absalom naunu a nih.
11 Asa chun a pu Davida ang bokin LALPA mithmuah thil fel a thaw hlak a. 12 Pasal inzorhai chu a rama inthokin a hnot suok a, a pa le puhai milim siem po po chu a pei hmang vong bok a. 13 A pi Maaka chen khom pathiennu Asera lem tirdakum tak a’n siemtir leiin lalnu nu a ninaa inthokin a bàn a, a thing milim insiemtirhai chu a phûr thluk a, Kidron vadungah a raw a. 14 An hmunsanghai thriekpek naw sienkhom a dam sungin a lungril po po chu LALPA tieng a ngha tlat a. 15 A pain a lo inhlàn tah le ama ngeiin a’n hlàn tah tangkaruo le rangkachak le thil danghai chu LALPA tempulah a lak lut a.
16 Asa le Israel lal Baasa chu an inlal sung po an indo hlak a. 17 Israel lal Baasa chun Judahai a hang bei a, Judahai lal Asa rama inthoka tu khom hung luta an suok thei nawna dingin Rama khuo chu kulin a’n huontir a.
18 Asa chun LALPA tempula mi le ama lal ina mi tangkaruo le rangkachak um po po chu a lak suok a, a siehlawhai kutah a’n hlàn a, Damaska khuoa um Aram lal, Hezion naupa Tabrimon naupa Ben Hadad kuomah a tir a. 19 A kuoma chun, “I pa le ka pahai an indo hlak leiin nang le kei inkârah inremna thuthlung siem ei tih. En ta, tangkaruo le rangkachak thilpêk khom ka hung thon hi. Israel lal Baasa hi ka rama inthoka a’n hnùk dokna ding chun ama le in inkàra thuthlung i lo siem tah kha tu hin sût el rawh” tiin thu a thon a.
20 Ben Hadad chun Lal Asa thu chu a remti a, chuongchun Israel khuohai chu bei dingin a sipai kawmandarhai a tir a, Ijon khuo dam, Dan khuo dam, Abel Beth Maaka khuo dam, Kinneret biel po po le Naftalia ram po po chu an bei a. 21 Chu thu chu Baasa-in a hriet charin Rama khuo an huon chu a tawpsan a, Tirza tieng a kir nawk ta a. 22 Chu phing leh Lal Asa chun Judai ram po poah thu a thon vel a, Baasa-in Rama khuo inhuonna dinga thing le lung a hmanghai chu tu khom a awl um loin an thak ta mur mur a, chuonghai chu hmangin Lal Asa chun Mizpa khuo le Benjamin rama Geba khuohai chu a siem a.
23 Lal Asa inlal laia thil tlung danghai le a thilthawhai po po le a khaw siemhai chanchin chu Juda lalhai chanchin inziekna lekhabuah a chuong a ni naw am a ni? Sienkhom a tar tieng chun a keah hri iemani a hung invoi ta a. 24 Chun, Asa chu a thlatuhai kuomah a chawl a, Davida khawpuiah a thlatuhai lai an phum a. A naupa Jehosafat chun a lalna chu a hung hluo a.
Israel lal Nadab
25 Jereboam naupa Nadab chu Juda lal Asa inlal kum hninaah Israel lalin a hung um a, Israelhai chungah kum hnih a’n lal a. 26 LALPA mithmuah thil thra lo tak a thaw hlak a, a pa lam hraw chu a hraw ve a, Israelhai chu thil suol a’n thawtir ve a.
27 Isakar sungkuo laia mi Ahija naupa Baasa chun a phier ruk a, Nadab le Israelhai po poin Filistinhai khuo Gibethon an inhuol lai chun Nadab chu a that a. 28 Juda lal Asa inlal kum thumnaa Baasa-in Nadab a that chun a hmunah lalin a um nghal a.
29 Lal a hung ni charin Jeroboam sungkuo po po chu a that ram vong a. LALPAN a siehlaw Silo khaw mi Ahija hmanga a lo hril tah ang khan, Jeroboam sungkuoa mi an thuok thei taphot chu hlà hrim a nei nawh. 30 Jeroboam suolna leia Israelhai chu suol inthawtir a, LALPA, Israelhai Pathien lung chu suksen dinga a cho phawk lei a nih.
31 Nadab inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong naw am a ni? 32 Chun, Asa le Israel lal Baasa inlal sung po chu an indo zing hlak.
Israel lal Baasa