2 Jerusalemah kum thum a’n lal a, a nu hming chu Maaka a na, Gibea khaw mi Uriel naunu a nih.

Abija le Jeroboam chu an indo a. 3 Abija chun indo mi, sipai huoisen thlang khawm nuoi li leh a va bei a, Jeroboam chun mi hrat thlang khawm nuoi riet leh thrang a lo khaw a. 4 Abija chu Efraim tlang rama Zemaraim tlangah a ngîr a, “Aw Jeroboam le Israel mi po pohai, lo ngaithla ro. 5 LALPA, Israel Pathien chun Israel ram chu Davida le a thlahai kuomah machi thuthlung^a thlungin kumkhuoa dingin a pêk tah ti in hriet naw am a ni? 6 Chuong sa khom chun Nebat naupa Jeroboam, Davida naupa Solomon siehlaw chu a pu chungah a lo hel el ta hi! 7 Solomon naupa Rehoboam chu naupang dawng a la ni lai le a la do hne tawl hmain ama kal zawngin Jeroboam chun mi hmangna bo ruol a’n pung khawm a. 8 Tu khom hin Davida thlahai kuta um LALPA ram chu do dingin in inpuocha a, sipai khom in hau hle a, Jeroboamin in pathien dinga a siempek chêu bawngte limhai khom in kuomah a um a. 9 LALPA thiempu, Aron nauhai le Levi-hai chu hnot suokin, ram dang mihai thaw danin thiempu in insiem a ni naw am a ni? Bawngchal tuoi le beramchal pasari chawia hung inhlàn taphothai chu pathien ni hrim hrim lohai thiempuah in lo siem thei pei a ni khah.

10 “Keini Pathien ruok chu LALPA a na, ama chu kan inphatsan naw a, LALPA rongbawltu thiempuhai khom Aron naupahai le anni thrangpuitu Levihai an nih. 11 Ni tin zing tieng le zan tieng pumraw thilhlân le rimtui thilhlân LALPA kuomah an inhlàn a; dawkan thienghlimah bei an sie diem a, zan tieng zâtin rangkachak khawnvar sienaa khawnvarhai chu an insit a. Keini chun LALPA kan Pathien thupêk chu kan zawm zing a, nangni ruok chun ama chu in nghatsan ta si a. 12 Ngai ta u, Pathien chu kan kuomah a um a, ama chu mi thruoitu a nih. A thiempuhai chun nangni dona dingin tawtawrawt mût an tih. Israel mihai, in pi le puhai Pathien LALPA chu kalin do naw ro, hmuingil naw top in tih” a ta.

13 Nisienlakhom Jeroboam chun an hnung tienga inchàntu sipai a sie a, ama chu Judahai hma tieng chun a um a. 14 Judahai an hang ngha kîr chun hnung tieng le hma tieng râlin an inhuol an hmu a, chuongchun LALPA chu koin thiempuhai chun tawtawrawt an mût a. 15 Judahai chu an khèk dur dur a, an khèk ruol chun Abija le Judahai hmaah Pathienin Jeroboam le Israel mihai po po chu a suktlawm a. 16 Judahai hmaa chun Israelhai chu an tlansie a, Pathienin an kutah a pêk a. 17 Abija le a mihai chun an that treu a, Israel mi thlang thrieu nuoinga an that a. 18 Chu trum chun Israel mihai chu an tlawm a; LALPA, an pi le puhai Pathiena an innghat leiin Judahai chun hnèna an chang a nih. 19 Abija chun Jeroboam chu a hnot a, Bethel khuo hai, Jesana khuo hai, Efron khuo hai le an khawperhai chu a lakpek a.

20 Abija inlal sungin Jeroboam chu a ngîr suok nawk ta nawh. LALPAN a hrem a, a thi a. 21 Abija ruok chu a hung hrat deu deu a. Nuhmei sawm le pali a nei a, naupa sawmhni le pahni le naunu sawm le paruk a nei a. 22 Abija chanchin danghai, a thilthawhai le a thil hrilhai chu zawlnei Ido ziek chanchin inchiknaah a chuong.