14
1 Abija chu a pi le puhai kuomah a chawl a, Davida khawpuia chun an phùm a, a naupa Asa chun a lalna chu a hung hluo a, a’n lal sung kum sawm zet ralmuong takin an um a.
Juda lal Asa
2 Asa chun LALPA Pathien mithmuah thil thra le indik a thaw hlak a. 3 Ram dang pathienhai maichàm le hmunsânga bawlhmun po po chu a thriek a, an lung biekhai chu a vuok koi a, Asera lim thinghai chu a phûr thlûk vong a. 4 LALPA, an pi le puhai Pathien chu zong ding le a dan le thupêkhai chu zawm dingin Judai ram mihai chu thu a pêk a. 5 Judai ram khaw tina hmunsânghai le rimtui inhlànna bawlhmunhai po po chu a thriek vong a, a’n lal sungin a ram chu ralmuong takin a um a.
6 Ral a muong sung chun Judai rama khawpuihai chu kulin a’n huon a. LALPAN ralmuongna a pek leiin chu sung chun tu khomin an hung do nawh. 7 Ama chun Judahai kuomah, “Thaw ro, hieng khuohai hi indin ei tiu khai; kulin inhuon ei ta, ralveng buk sanghai bawl ei ta, kul kotkhar le a kalnahai siem ei tiu. LALPA ei Pathien chu bèlbula ei nei leiin ram chu ei kutah a la um zing a, ama chu ei bèl leiin sir tinah ralmuongna a mi pèk a nih” a ta. Chuongchun, khuohai chu an indin thra a, an hmuingîl pei a.
8 Asa chun Juda mi, phaw lien le fei chawi sipai nuoithum a nei a; chun, Benjamin mi, awmphaw hâk le thal chawi nuoihni le singriet a nei bok a, chuonghai chu mi hrât le huoisen vong an nih.
9 Kusha mi Zera chun sipai maktaduoi khat le tawlailir zathum thruoiin anni chu rûn dingin a hung inthok a, Maresa a hung tlung a. 10 Anni chu dang dingin Asa chu a’n thok suok a, Maresaa Zefatha ruoma chun thranghmun a khaw a. 11 Asa chun LALPA Pathien a ko a, “LALPA, nang chauh naw chu mi hrât tak laka mi hrat nawhai san theitu tu khom an um nawh. Aw LALPA kan Pathien, mi hung thrangpui raw khai, nang chu kan innghatna i na, hieng sipai tam tak hi bei dingin i hmingin kan hung inthok suok a nih. Aw LALPA, nang chu kan Pathien i na, mihriemin ngam lul naw raw se che” tiin a trongtrai a.
12 Asa le Judahai hmaa chun Kush mihai chu LALPAN a bei a, an tlanse dur dur a. 13 Asa le a mihai chun Gerar chenin an hnot a, Kush mihai chu an thi rawn tah êm leiin an thrang zo ta naw a, LALPA le a sipaihai hmaa chun an tlawm ta dêr a. Judahai chun râllâk sum tam tak an làk a. 14 Gerar le a se vela khuohai chu LALPA triumna chun a tlakbuok tawl leiin an suksiet vong a, râllâk ding sum a tam leiin khuohai chu an rok a,. 15 Ranpuhai bùkhai khom an bei a, an ran ruol beram, kèl le sanghawngsei tam tak an man a, Jerusalem tieng an kir nawk ta a.