Aigupta lal Sisakin Jerusalem a rûn
12
1 Rehoboam chu a hung inlal nghet phing leh ama tienga thrang Israelhai po po leh LALPA dan an nghatsan ta a. 2 LALPA chungah an ringum naw leiin lal Rehoboam inlala inthoka kum nganaa chun Aigupta lal Sisak-in Jerusalem a hung rûn a. 3 Sisak chun tawlailir sang le zahni le sakor chungchuong mi singruk le Libya mi hai, Suki mihai le Kusha mihai, tiem seng loa tam chu Aiguptaa inthokin a hung thruoi a, 4 Judai rama kula inhuon khuohai chu a lâk a, Jerusalem chen a hang tlung a.5 Rehoboam le Juda hnama lukhaituhai, Sisak an tri leia Jerusalema pungkhawmhai kuoma chun zawlnei Semaia a hang fe a, an kuomah, “LALPA chun hieng hin a hril: ‘In mi nghatsan a, chuleiin kei khomin Sisak kutah ka maksan ve ta cheu a nih’ a tih” tiin a hril a. 6 Israel lal le an lukhaituhai chu inpha hnuoiin, “LALPA chu a’n dik a nih” an ta.
7 An inphà hnuoi ti LALPAN a hmu chun LALPA thu chu Semaia kuomah a hung tlung a, “An inphà hnuoi leiin anni chu sukse loin intlan suok vat tawl ka tih. Sisak hmangin Jerusalem chunga hin ka lungsenna bun thla naw ning. 8 Amiruokchu, ka rongbawl le ram dang mi lalhai rongbawl indanglamzie an hriet theina dingin ama thu hnuoiah sie tawl ka tih” a ta.
9 Aigupta lal Sisak chun Jerusalem chu a bei a, LALPA tempul le lal ina rosum po po chu a lâk fai vong a, Solomon siem rangkachak phawhai po po khom a lâk bok a. 10 Lal Rehoboam chun a aiin dâr phaw a siem a, lal in kot vengtu kawmandarhai chu a’n koltir a. 11 LALPA tempulah lal a fe pha leh vengtuhai chun dar phaw chu an chawi a, an hung kìr pha leh vengtuhai pindana a siena hmuna chun an thak kir nawk hlak a. 12 Rehoboam a’n phà hnuoi lei chun LALPAN a lungsenna a lak kieng a, a suksiet vong ta naw a, Judai ram chu iemani chenah a la zieum pei a.
Rehoboam a thi
13 Lal Rehoboam chu Jerusalemah a’n suknghet a, a’n lal zom ta pei a. Kum sawmli le kum khat a ni kuma inlal tranin, LALPAN a hming umna dinga Israel hnam po pohai hmun laia a thlang bik khuo Jerusalema chun kum sawm le kum sari a’n lal a, a nu hming chu Naama a na, Amon mi a nih. 14 Lungrila LALPA a ngaisak naw leiin thil suol a thaw a. 15 Rehoboam inlal sunga thil tlunghai, a bula inthoka a tawp chen chu zawlnei Semaia ziek le zawlnei Iddo zieka inthla sawng dan chanchin an suinaah a chuong a ni naw am a ni? Rehoboam le Jeroboam chu an indo zing zing hlak a. 16 Chun, Rehoboam chu a pi le puhai kuomah a chawl a, Davida khuoah an phùm a, a naupa Abija-in a lalna chu a hung hluo ta a.