Semai hrillawkna
11
1 Rehoboamin Jerusalem a hung tlung chun Israel sungkuohai chu do ding le an ram del po chu a rama la kir nawk dingin Juda hnama mi le Benjamin hnama mihai laia mi huoisen thlang bik mi nuoi khat le sing riet a khawm a. 2 Amiruokchu Pathien mi Semaia kuomah LALPA thu a hung tlung a, 3 “Judai ram lal Solomon naupa Rehoboam kuoma le Juda le Benjamin sungkuo po pohai kuomah, 4 LALPAN hieng ang hin a hril: ‘Hang fe naw ro, Israel thlahai, in unauhai chu hang do hlek naw ro. Mani in tieng seng kir nawk ro. Hi thil hi keima thaw a nih’ tiin hril tawl rawh” a ta. Chuongchun LALPA thu chu an awi a, Jeroboam chu hang bei loin an kìr ta vong a.Rehoboamin kul a siem
5 Rehoboam chu Jerusalemah a um a, Judai ram veng himna dingin a khuohai a siem thra a. 6 Kula a’n huon, Judai ram le Benjamin rama khuohai chu Bethlehem, Etam, Tekoa, 7 Beth Zur, Soko, Adulam, 8 Gath, Maresa, Zif, 9 Adoraim, Lakis, Azeka, 10 Zora, Aijalon le Hebron hai an nih. 11 Chuong kulhai chu a suknghet a, khaw tinah vengtu kawmandar a sie vong a, fak ding dam, hriek dam le uoiin dam a sêk khawm a. 12 Khaw tinah ralthuom phaw le fei hai a sie a, khaw hrat takin a siem tawl a. Chuong ang chun Judai ram le Benjamin rama umhai chu a thuhnuoiah a sie a nih.
Thiempuhai le Levihai Judai ramah an hung
13 Israel ram biel tina thiempuhai le Levihai chu Rehoboam tieng an thrang a. 14 Jeroboam le a nauhaiin LALPA thiempu dingin an hnawl si leiin, Levihai chun an in le lo le ran tlatna hmunhai chu maksanin Judai ram le Jerusalem an pan a. 15 A hmunsanga ronngbawltu ding le kelchal le bawngte lim a siemhai bieknaa hmang dingin Jeroboam chun ama thiempuhai chu a ruot lem a. 16 Israel hnamhai laia LALPA Israelhai Pathien tienga lungril thle taphot chun LALPA, an pi le puhai Pathien kuoma hlanbiek dingin Jerusalem tieng Levihai chu an zui bok a. 17 Chuonghai chun Solomon naupa Rehoboam chu tranin, Judai ram chu an suknghet a, kum thum sung chu Davida le Solomon hai lampui hraw chu an hraw ve a.
Rehoboam sungkuo
18 Rehoboam chun Davida naupa Jerimot naunu Mahalat chu nuhmeiah a nei a. Mahalat nu chu Abihail a na, ama chu Jesai naupa Eliab naunu a nih. 19 Naupa pathum Jeus, Semaria le Zaham hai a hringpek a. 20 Ama hnunga chun Absalom naunu Maakai a nei a, ama chun Abija, Ataia, Ziza le Selomit hai a hringpek a. 21 Rehoboam chun Absalom naunu Maakai chu a nuhmei danghai le hmeihai po po nêkin a hmangai lem a. Rehoboam chun nuhmei sawm le pariet le hmei sawmruk a nei a, naupa sawmhni le pariet le naunu sawmruk a nei. 22 Chun, Rehoboam chun Maakai naupa Abija chu lala a siem theina dingin a unauhai laia chunghnung takah a sie a. 23 Var takin rem a ruot a, a naupahai chu Judai ram le Benjamin ram po poa kul nei khuoa hai chun mawphurna pein a’n um dartir a, fak ding tam tak a pêk a, nuhmei tam tak a’n neitir tawl bok a.