Jeroboam thua Ahija hrillawkna
14
1 Chuong lai chun Jeroboam naupa Abija chu a hung damnaw a. 2 Jeroboam chun a nuhmei kuomah, “Inthok la, Jeroboam nuhmei i ni ti an hriet thei nawna dingin inchei danglam la, Silo-ah fe rawh. Chu taka chun zawlnei Ahija a um a, ama chu hi mihai chunga lala ka la hung um ding thu mi hriltu kha a nih. 3 Bei tlang sawm le kêk iemani zat le khuoizu bûr khat chawi la, a kuomah va fe la, naupang um dan ding chu lo hril a ti che” a ta. 4 A hril angin Jeroboam nuhmei chun a thaw a, Silo-a Ahija inah a fe a. A upat leiin Ahija mit chu an thim ta a, khuo a hmu thei ta nawh.5 Amiruokchu, LALPAN Ahija kuomah, “Jeroboam nuhmei chu a naupa damnaw chungthu indon ding chein a hung mek a, chu chu kha kha tiin i lo hril ding a nih. A hung pha chun mi dang ni awm takin hung insiem a tih” a ta.
6 Ahija chun kotkhara a hung pèn lut lai ri a hriet charin, “Nang Jeroboam nuhmei, hung lut raw khai. Ieng dinga mi dang anga i hung insiem am a na? Chanchin thra naw tak hril ding chea tir ka nih. 7 Kir nawk ta la, Jeroboam kuoma chun “LALPA, Israelhai Pathien chun hieng hin a tih: ‘Mipuihai laia inthokin ka chawisang che a, ka mi Israelhai chungah hotuah ka siem che a, 8 Davida sungkuohai ram ka lakpèk a, chu chu ka pêk che a, sienkhom nang ruok chu ka siehlaw Davida angin i um ve nawh; ama ruok chun ka thupêkhai a zawm a, ka mithmuah thil thra chauh thaw a tum a, a lungril po poin a mi zui hlak. 9 Nang ruok chun i hmaa mihai po po nêkin thil suol i thaw nasa lem a, lungsen dinga mi cho phawkin, hnam dang pathienhai lim thirin i siem a, hnung tieng i mi nghatsan a.
10 ‘Chuleiin, Jeroboam sungkuoah sietna hung intlungtir ka ta. Jeroboama inthoka naupa pieng taphot chu, bawia um amanih zalèna um amani khom, sukram vong ka ta, miin êk trawng a kang fai vong hmâ khata a raw angin Jeroboama sungkuo chu raw fai vong ka tih. 11 Jeroboam sungkuoa mi, khawpuia thi taphot chu uiin fang an ta, ram hnuoia thi taphot chu chungleng vatehaiin tlàn an tih. Chu chu LALPA thu a nih’ tiin hril rawh.
12 “Tho la, i in tieng kir nawk el ta rawh. Khawpui sung i kein i sir charin naupang chu thîng a tih. 13 Ama chu Israelhai po poin sûn an ta, vui an tih, Jeroboam sungkuo lai ama chauh chu thlàna phûm hlaw ding um sun chu a nih. Jeroboam sungkuo lai hin ama chunga chauh hin thratna iemani LALPA Israelhai Pathien chun a hmu a nih.
14 “Voisun lá là hin Jeroboam sungkuo sukbohmangtu ding LALPAN ama ta dingin Israelhai lal ding hung indin suok a tih. Voisun ngei hin tie! Tak tak maw? Ni e, tu ngei el hin tie! 15 LALPAN Israel chu vuong a ta, tuia phairuong angin inhnîng an tih. LALPA chu suklungsen a, pathiennu Aser lim thinghai siema an phun leiin, an puhai a lo pèk tah, hi ram thra taka inthok hin Israelhai chu pot suok fai vong a ta, Eufretis Vadungpui ràla chen la sukdar vong a tih. 16 Jeroboamin thil suol a thawhai lei le Israelhai khom thil suol a’n thawtir leiin, Israelhai chu nghatsan a tih” a ta.
17 Jeroboam nuhmei chu a tho a, a suok a, Tirza khuo tieng a pan a, an sumphuk a tlung charin naupang chu a thi a. 18 LALPAN a siehlaw zawlnei Ahija hmanga a hril tah angin an phûm a, Israelhai po poin an sùn a.
Jeroboam thi thu
19 Jeroboam inlal laia thil tlung dang hai, a râl bei thu dam le a rorêl danhai chu Israel lalhai chanchin inziekna lekhabuah a chuong. 20 Kum sawmhni le kum hni sung ro a rèl hnungin a thlatuhai kuomah a chawl a, a naupa Nadab chun a lalna chu a hung hluo a.
Judai ram lal Rehoboam
21 Solomon naupa Rehoboam chu Judai ramah lalin a um a, a hung inlal chun kum sawmli le kum khat mi a na, LALPAN a hming umna dinga Israel hnamhai khuo po po laia a thlang khawpui Jerusalema chun kum sawm le kum sari a’n lal a, a nu hming chu Naami a na, Amon mi a nih. 22 Judahai chun LALPA mithmuah thil suol an thaw a, an thlatuhai po po khûma an suol lei chun a thîkthu an chok tho a. 23 Hmunsâng siemin, muol bawk insàngna deu taphot le thingbuk inzar thratna taphotah lung ser le pathiennu Asera lim thinghai chu an phun a. 24 A ram sunga chun pasal inzorna bûk dam siemin, Israel thlahai hmaa LALPAN a hnot suok tah hnamhai ang bokin thil tirdakum tinrêng an thaw ve a.
25 Lal Rehoboam inlal kum nganaa chun Aigupta lal Sisak chun Jerusalem a hung rûn a. 26 LALPA Tempula rosum le lal ina rosumhai chu a lâk fâi vong a, Solomon siem rangkachak phawhai po po khom a lâk sä bok a. 27 Lal Rehoboam chun a aiin dar phaw a siem a, lal in kot vengtu kawmandarhai chu a’n koltir a. 28 LALPA tempulah lal a fe phâ leh vengtuhai chun dâr phaw chu an chawi a, an hung kir pha leh vengtuhai pindana a siena hmuna chun an thak kir nawk hlak.
29 Rehoboam inlal sunga thil tlung danghai le a thilthaw po po chu Juda lalhai inlal lai chanchin ziekna lekhabuah a chuong a ni naw am a ni? 30 Rehoboam le Jeroboam chu indo zing zinga khawsa an nih. 31 Chun, Rehoboam chu a thlatuhai kuoma chun a chawl a, Davida khawpuiah a thlatuhai lai an phûm a. A nu hming chu Naama a na, Amon mi a nih. A naupa Abija chun a lalna chu a hung hluo a.