Seba lalnuin a hung sir
9
1 Seba lalnuin Solomon hming inthangzie a lo hriet chun zawna khir tak taka fie dingin Jerusalemah a hang inzin a. Hnung zuitu tam tak leh, rimtui le rangkachak le lunghlu tam tak phurtu sanghawngsei ruol leh Solomon kuom a hang tlung a, a lungrila a pai po po chu phorin a titipui a. 2 A thil indon po po chu Solomonin a don vong a, hriet naw le hrilfie harsa ti hrim a nei nawh. 3,4 Solomon varzie dam, a lal in bawl dam, dawkana fak ding an siehai dam, a khawnbawl inthrung khup el hai dam, rongbawltuhai le an inchei dan hai dam, uoiin semtuhai dam le LALPA tempula pumraw thilhlân a’n hlànhai dam Seba lalnuin a hmu chun mak a ti hiel a.5 Lal kuoma chun, “I thilthawhai le i varziehai ka rama inthoka ka lo hriet kha a lo indik khop el. 6 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nêk daiin i lo insang lem a nih. 7 I mihai hi ieng ang lawma hamthra am an na! I bula cheng, i varna thu ngaithla roptu i siehlawhai hi an va hang hamthra ngei de aw! 8 I chunga lawmtu le a ta dinga roreltua a lalthrungphaa sietu che LALPA i Pathien chu, inpâkin um raw se. LALPAN kumkhuoin Israelhai tungding a nuom leiin fel tak le indik taka an roreltu dingin a sie che a ni hi” a ta.
9 Thilpêk rangkachak kilogram sangli le mawsawla le lunghlu tam tak chu lal kuomah a pêk a. Seba lalnuin Solomon a pèk mawsawla anga thra hrim hrim hi a um nawh. 10 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur treu bok a. 11 Lal chun almuk thinghai chu LALPA tempul kailawn le ama lal in kailawn siemnan a hmang bakah rimawi tumtuhai hmang ding tringtrang le perkhuong siemnain a hmang bok a. Chuong zata tam almuk thing chu a hnungin Judai ramah an hmu ta ngai nawh.) 12 Lal Solomon chun Seba lalnu dit le hni taphot chu a thawpèk bàkah a lal ina rosum tam tak chu amanu hung chawi nêka tam a pêk bok a, a rawihai leh ama ram tieng a kir nawk ta a.
Solomon hausakzie
13 Kum tina Solomon kuta rangkachak lût zàt chu kilogram singhni le sangthum a nih. 14 Chu bâkah sumdawnghai le dawrkaihaiin sie tam tak an hung chawi a, Arabia lalhai le ama ram bung hrang hrang optuhaia inthokin rangkachak le tangkaruo a dong treu bok a.
15 Lal Solomon chun rangkachak sut phêkin phaw lien zahni a siem a, phaw pakhat peiah rangkachak kilogram sari vel an hmang a. 16 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram hni an hmang a. Chuonghai chu a lal in ‘Lebanon Ngawpui Rûn’ a chun a sie a.
17 Lal chun saiha ngotin lalthrungpha ropui tak a siem a, chu chu rangkachak hlîr hlakin a tuom vong a. 18 Lalthrungpha kai tungnaa chun kailawn paruk a um a, kailawna chun rangkachak hlîr ngot a pha a. Lalthrungpha sir ve vea chun kut innghatna chelbân a um a, chu sir ton ve vea chun sakeibaknei lim an ngirtir a. 19 Kailawn paruk sîr tona chun sakeibaknei lim sawmpahni, sir tinah pakhat pei an ngir a, chuong anga ropui chu khaw lai rama khom an la siem ngai nawh.
20 Lal Solomon no po po chu rangkachaka siem vong a na, Lebanon Ngawpui Runa a bûr le bêlhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le bêlhai chu tangkaruoa siem hrim a um nawh. 21 Lal chun tuifinrietah sumdawng long ruol a nei a, chu chu Hiram longpuhaiin an khal a, chuonghai chun kum thum dan peiah rangkachak dam, tangkaruo dam, saiha dam, zawng le ngau lien chi dam an hung phur hlak a.
22 Hausakna le varnaah Solomon chun khawvela lal dang po po a khûm a. 23 Pathienin a lungrila varna thu a siepekhai chu ngaithla dingin khawvela lal po poin Solomon chu an hung pan huoi huoi hlak a. 24 Chun, kum tinin a kuoma hung taphotin thilpek tangkaruo le rangkachaka siem thil dam, silfen dam, ralthuom dam, rimtui dam, sakor dam le sabengtung dam an hung chawipek hlak a.
25 Solomon chun sakor le tawlailir siena hmun sangli a nei a, sakor chungchuong mi singkhat le sanghni a nei a, chuonghai chu tawlailir siena khuoa hai le ama umna Jerusalemah a sie a. 26 Eufretis vadunga inthoka Filistinhai ram le Aigupta ramri chena lalhai po po chungah Solomon chu a’n lal a. 27 Lal chun Jerusalemah thil a hau êm leiin tangkaruo dam chu lungte ang hiel le sidar thing khom tlâng thruta theichang bil ang hiela ngai khopin a tam a nih. 28 Solomon sakorhai chu Aigupta ram le hmun hrang hranga inthoka a làk a nih.
Solomon a thi
29 Solomon inlal laia thil tlung danghai chu a bula inthoka a tawp chenin zawlnei Nathan thu zieka hai, Silo mi Ahija hril lawkna thu inziekna bua hai, Nebat naupa Jeroboam chungthua zawlnei Ido-in inhriettirna a donghai inziekna bua hai a chuong a ni naw am a ni? 30 Solomon chu Jerusalemah Israel mihai po po chungah kum sawmli a’n lal a. 31 Chun, ama chu a pi le puhai kuomah a chawl a, a pa Davida khuoah an phùm a, a naupa Rehoboam chun a lalna chu a hung hluo ta a.