Sheba lalnu le Solomon
10
1 Solomon hming inthangzie le LALPA hming le an inkungkeina chanchin Seba lalnuin a lo hriet chun thu khir tak taka fie tumin a’n thok suok a. 2 Hnungzuitu tam tak le rimtui le rangkachak tam tak le lunghlu phurtu sanghawngsei tam tak thruoiin Jerusalemah a fe a, Solomon kuom a tlung chun a lungrila a paihai po po chu phorin a titipui a. 3 A thu indon po po chu lal Solomon chun a don vong a, hriet naw le hrilfie harsa ti hrim a nei nawh. 4,5 Solomon varzie dam, a lal in bawl dam, dawkana fak ding an siehai dam, a khawnbawl thrung khup el hai dam, rongbawltuhai le an inchei dan hai dam, uoiin semtuhai dam le tempula pumraw thilhlân an inhlanhai dam Seba lalnuin a hmu chun maktiin a ngaina a hriet naw hiel a.6 Lal kuoma chun, “I thilthaw hai le i varzie hai ka rama inthoka ka lo hriet kha a lo indik khop el. 7 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nêk daiin i lo insang lem a nih. 8 I mihai hi ieng ang lawma hamthra am an na! I bula chêng, i varna thu ngaithla roptu i siehlawhai hi an va hang hamthra ngei de aw! 9 LALPA i Pathien, a lawmtu che le lalthrungphaa sietu che chu inpâkin um raw se. LALPAN kumkhuoin Israelhai a hmangai leiin fel taka an rorèltu dingin a sie che a ni hi” a ta.
10 Lal chu thilpêk rangkachak kilogram sangli le rimtui le lunghlu tam tak a pek a. Seba lalnuin rimtui Solomon a pek anga tam hi tu khomin an pek nawk ta ngai nawh. 11 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur treuh bok a. 12 Lal chun almuk thing chu LALPA tempul le ama lal in thrut do nghetna dingin a hmang bakah rimawi tumtuhai hmang ding tringtrang le perkhuong siemnain a hmang bok a. Chuong ang zozaia tam almuk thing chu a hnungin an lak lut ta ngai naw a, an hmu ta ngai bok nawh.) 13 Lal Solomon chun Seba lalnu dit le hnì taphot chu a thawpèk bàkah a lal ina rosum tam tak a pêk bok a, chuongchun a rawihai leh ama ram tieng a kir nawk ta a.
Solomon hausakna
14 Kum tina Solomon kuta rangkachak lut zat chu kilogram singhni le sangthum a nih. 15 Chu baka chun sumdawngtu le thil zortuhai le Arab lalhai le a ram optuhaia inthokin sie le leiman a hmu treu bok a.
16 Lal Solomon chun rangkachak sut phêkin phaw lien zahni a siem a, phaw pakhat peiah rangkachak kilogram thum le gram sawmnga vêl an hmang a. 17 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram khat le gram sawmsari an hmang a. Chuonghai chu a lal in ‘Lebanon Ngawpui Rûn’ a chun a sie a.
18 Chun, lal chun saiha ngotin lalthrungpha ropui tak a siem bok a, chu chu rangkachak tuia inluon vong a nih. 19 Lalthrungpha kai tungna chu kailawn paruk a um a, lalthrungpha hnung tieng chu a’n kuol pup a, thrungna sir tuoka chun kut innghatna bân a um a, chu sir ve vea chun sakeibaknei pahnih an ngir a. 20 Kailawn paruka chun sakeibaknei sawmpahni, sir tinah pakhat pei an ngir a, chuong ang chu khaw lai rama khom an la siem ngai nawh.
21 Lal Solomon no po po chu rangkachaka siem vong a na, Lebanon Ngawpui Runa a bûr le belhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le belhai chu tangkaruoa siem hrim hrim a um nawh. 22 Lal chun tuifinrieta Hiram long ruol le inzin hlak sumdawng long ruol a nei a, chuonghai chun kum thum dan peiah rangkachak dam, tangkaruo dam, saiha dam, zawng le ngau lien chi dam an hung phur hlak a.
23 Hausakna le varnaah Solomon chun khawvela lal dang po po a khûm vong a. 24 Pathienin a lungrila varna thu a siepek chu ngaithla dingin khawvela mi po poin Solomon chu an hung pan huoi huoi hlak a. 25 Chun, kum tinin a kuoma hung taphotin thilpêk tangkaruo le rangkachaka siem thil dam, silfen dam, ralthuom dam, rimtui dam, sakor dam le sabengtung dam an hung chawi hlak a.
26 Solomon chun tawlailir sangkhat le zali le sakor singkhat le sanghni a nei a, chuonghai chu tawlailir siena khuoa hai le Jerusalemah ama kuomah a sie a. 27 Lal chun Jerusalema chun thil a hau êm leiin tangkaruo dam chu lungte ang hiel le sidar thing khom tlang thruta theichang bil anga ngai hiel khopin a siem a nih.
28 Solomon sakorhai chu Musri le Kilikia rama inthoka a lâk deu vong a nih. Chu taka inthok chun lal sumdawnghaiin a honin an inchawk hlak a, 29 tawlailirhai chu Aigupta rama inthokin pakhat peiah tangkaraw sekel zaruk le sakor chu tangkaraw sekel za sawmnga peiin an inchawk a. Chun, Hit-hai le Aram lalhai kuomah an zor sawng bok a.