7 Chuongchun, Jerusalem suo tieng muolah Solomon chun Moab-hai pathien tirdakum Kemos ta ding le Amon-hai pathien tirdakum Molek ta dingin hmunsang^b a siem a. 8 Chuong ang bokin hnam dang mi a nuhmeihai ta ding sengin an pathienhai kuoma inthawina le rimtui inhlànna ding hmunsang a siempek bok a.

9 LALPA Israelhai Pathien, a kuoma voi hni zet hung inlàr tah chu Solomonin a lungrila a nghatsan tak leiin a chungah LALPA a lungsen hle a. 10 Pathien danghai zui lo dingin khap sienkhom Solomon chun LALPA thupek chu a zawm si nawh. 11 Chuongchun LALPAN Solomon kuomah, “Hieng hi i khawsak dan a lo ni ta a, ka thuthlung le thuruothai zawm dinga thu ka pekhai che chu i zawm nuom si naw leiin i kuta inthokin i lalram hi lapêk ka ti che a, i hnuoia mi pakhat kuomah peng ka tih. 12 Amiruokchu, i pa Davida zarin, chuong thil chu i dam lai êm chun thaw naw ning, i naupa kuta inthokin la hmang lem ka tih. 13 I pa Davida zàr le ka khawpui thlang Jerusalem zàrin, a ram po po lapêk loin hnam khat chu la pe hrâm ka tih” a ta.

14 Chuongchun, Edom mi Hadad, Edom lal sungkuoa inthoka hung suok chu Solomon hmèlmaah LALPA chun a hung indin suok a. 15 Chu hma chun, Davidan Edom mihai a do laiin an mithihai phûm dinga hang fe a sipai kawmandar Joab chun Edom mihai chu a that vong a, 16 Edom rama pasal po po an that vong hmâ khat chu Joab le Israel mihai chu thla ruk zet Edom ramah an inkul a nih. 17 Chu lai chun Hadad chu naupang te chauh a la ni a, a pa hnuoia sinthawtuhai leh Aigupta ramah an tlàn a. 18 Midian rama inthokin an inthok suok a, Paran-ah an fe a, Parana inthok chun mi thruoiin Aigupta an pan a, Aigupta lal Faraw chun in le ram pein, fak ding a lo ngaituopek a.

19 Hadad chun Faraw mit a tlung êm leiin a nuhmei, lalnu Tapenes sangnu chu nuhmeiah a’n neitir a. 20 Tapenes sangnu chun naupa a hming Genubat a neipek a, Tapenes chun a enkol a, Faraw nauhai lai chun a khawsa ve ta a. 21 Lal Davida chu a thlatuhai lai a chawl tah ti le a sipai kawmandar Joab khom a thi tah ti Aigupta rama inthoka Hadad-in a lo hriet chun Faraw kuomah, “Ka rama ka kir nawk theina dingin ka suok mi phalpêk rawh” a ta. 22 Faraw chun a kuomah, “Ka kuoma i um hin iem tlaksam i nei a na, chuonga i ram tienga kir nawk i nuom el chu?” a ta. Hadad chun, “Tlaksam lem chu ieng khom ka nei nawh, sienkhom mi’n fetir hrim hrim raw khai” a ta.

23 Chun, Eliada naupa Rezon, a pu Zoba lal Hadadezer kuoma inthoka tlan hmang chu Pathienin Solomon hmèlmaah a hung indin bok a. 24 Davidan Zoba sipaihai a that lai khan ama chun mi a khawm a, chuong helpawlhai thruoitua chun a thrang a, Damaska khuoah an fe a, an hne a, ama chu lalin a um a. 25 Hadad-in buoina a siem bakah Solomon dam sung po po chun Rezon chu Israelhai hmèlma a ni zing a, Aram-ah lalin a um a, Israelhai a theida hle a.

26 Chun, Nebat naupa Jeroboam khom Solomon lakah a hel a. Ama chu Efraim mi, Zeredaa inthoka hung, Solomon thoktu laia pakhat a na, a nu Zarua chu hmeithai a nih. 27 Solomon laka a hel dan chanchin khom hieng ang hin a nih: Solomon chun lal in innghatna thrut zawl do nghettu ding a siem bakah a pa Davida khawpuia kul inhuonna bang se lai po po chu a thol thra a. 28 Jeroboam chu mi huoisen hmingthang a na, tlangval taima tak a nih ti Solomonin a hmu chun Josefa sungkuoa sinthawa sor luihai po po chunga hotuah a sie a.

29 Chuong hun lai chun Jeroboam chu Jerusalema inthokin a suok a, Silo khuoa zawlnei Ahija, silfen thara inthuom chun lam lakah a lo hmu a, an pahni chauin ram hnuoia chun an um a. 30 Ahija chun a hak lai silfen thar hlok chu phel sawm le phel hniin a pot thler a. 31 Ama chun Jeroboam kuomah, “Phel sawm hi la rawh. LALPA Israelhai Pathien chun hieng hin a hril: ‘Ngai rawh, lalram hi Solomon kuta inthokin ka lak hmang ding a na, hnam sawm chu ka pêk ding chê a nih. 32 Amiruokchu, ka siehlaw Davida le Israel thla po pohai khawpui laia ka khawpui thlang bik Jerusalem zarin hnam khat chu la chang a tih. 33 Ama chun a mi nghatsan a, Sidonhai pathiennu Astoret dam, Moab-hai pathien Kemos dam, Amon thlahai pathien Molek dam a biek a, a pa Davida anga khawsa loin, ka lampui a hraw naw a, ka mithmuah thil indik lo a thaw a, ka thupêkhai le ka danhai a zawm bok nawh.

34 ‘Sienkhom, a pa Davida, ka siehlaw le ka thlang, ka thupêkhai le thuruothai zawmtu zârin a ram pumpui ruok chu Solomon kuta inthokin lakpêk nawng ka ta, a dam sung bek chu lalah inumtir ka tih. 35 A naupa kuta inthokin lalram chu lapêk ka ta, hnam sawmhai chu ka pêk ding che a nih. 36 Amiruokchu, ka hming umna dinga ka thlang Jerusalema hin ka siehlaw Davidan ka hmaah khawnvar a nei zing theina dingin a naupa kuomah hnam khat chu la pe hrâm ka tih.

37 ‘Nang ruok hi chu ka ruot che a, i nuom dan ang takin ro rêl i ta, Israelhai chungah lal ni’ng i tih. 38 Thu ka pèkhai che po po anga thaw a, ka lampui hraw a, ka siehlaw Davidan a thaw anga ka thuruothai le thupêkhai kengkaw a, ka mithmuah thil indik i thaw phot chun i kuomah um ka ta, Davida ka’n din nghet ang bok khan i sungkuo indin nghet ka ta, Israelhai hi pe’ng ka ti che. 39 Hi lei hin Davida thlahai chu suktlawm ka ta, sienkhom kumkhuo chun ni naw nih’ a tih” tiin.

40 Chuongchun, Solomon chun Jeroboam chu that a tum a, sienkhom Aigupta lal Sisak kuomah a tlân a, chu taka chun Solomon thi hmâ khat chu a um ta zing a.

41 Solomon inlal sunga thil tlunghai, a thilthaw po po le a varna thuhai chu Solomon chanchin inziekna buah a chuong a ni naw am a ni? 42 Solomon chun Jerusalema inthokin Israelhai chungah kum sawmli ro a rèl a. 43 Chuongchun, Solomon chu a thlatuhai kuomah a chawl a, a pa Davida khawpuia chun an phùm a, a naupa Rehoboam chun lalna chu a hung hluo ta a.