2 Solomon chun Israelhai po po, sipai sang chunga kawmandarhai le za chunga kawmandarhai, roreltuhai, Israel pahnam tina thruoituhai le sungkuo tina lukhaituhai chu a ko khawm a. 3 Pungkhawmhai po po chu Gibeon hmunsângah a thruoi tung a, chu taka chun LALPA siehlaw Mosiein thlalera a siem Biekbuk, Intuokna Puon in kha a la um a. 4 Pathien Bawm ruok chu Kiriat Jearim-a inthokin Jerusalemah an lâk tung ta a, a siena dinga Davida buotsai puon ina chun an sie a. 5 Amiruokchu, Hur naupa Uri naupa Bezalel siem dâr maichàm chu Gibeon-a biekbuk kotah a la um zing leiin, Pathien rawn dingin Solomonin chu hmun chu a panpui tawl a nih. 6 Intuokna Puon in hmaa um dâr maichàma chun Solomon chu LALPA hmaah a hang fe a, maichàma chun pumraw thilhlânah ran sângkhat a hang inhlàn a.

7 Chu zân chun Solomon kuomah Pathien a hung inlâr a, a kuomah, “I dit dit mi hni rawh, pe’ng ka ti che” a ta. 8 Solomon chun Pathien kuomah, “Ka pa Davida kuoma khan lunginsietna nasa tak i’n langtir a, ama hmunah lalin i mi lo sie ta a. 9 Aw LALPA Pathien, pilvut anga tam mipuihai chunga rorêltuah i mi sie ta si hin chu, ka pa Davida kuoma i thu tiem kha sukpuitling rawh. 10 Hi mihai hi ka thruoi theina dingin varna le hrietna mi pe rawh. Chuong naw chun i mi hieng zozaihai ro hi tuin am rêlpek thei an ta?” a ta.

11 Pathien chun Solomon kuomah, “Hieng ang lungril hi put a, sum le pai dam, hausakna dam, chawimawina dam le i hmêlmahai thina ding dam hni lo a, dam sawtna hai khom hni bok lo a, an chunga lala ka siena che ka mihai ro i rèlpek theina dinga varna le hrietna i mi hni lem leiin, 12 varna le hrietna ka pêk che bàkah i hmâ le i hnunga lal tu khomin an nei dèr lo ding sum le pai hai, hausakna hai le chawimawina hai pe sä bok ka ti che” a ta.

13 Chuongchun, Biekbuk umna Gibeon hmunsânga inthokin Solomon chu Jerusalem tieng a kîr nawk a, Israelhai chungah ro a rèl a. 14 Solomon chun tawlailir le sakor chungchuong mi tam tak a’n din a, tawlailir sangkhat le zali a nei a, sakor le a chungchuong mi singkhat le sanghni a nei bok a, chuonghai chu tawlailir sie khawmna khawpuia hai le Jerusalemah a sie a. 15 Lal chun Jerusalemah tangkaruo le rangkachak chu lung ang elin a bûm hnèr hnûr a; sidar thing khom phai thruta theichang bil ang hiela ngai thei khopin a hau a nih. 16 Solomon sakorhai chu Aigupta (Musri) le Kilikia (Kue) a inthokin lal aiawa sumdawnghaiin an inchawk suok hlak a. 17 Aigupta rama inthoka an inchawkhai chu tawlailir pakhat peiah tangkaruo sekel zaruk, sakor pakhat peiah tangruo sekel za le sawmnga a nih. Anni chun Hit lalhai le Aram lalhai po po kuomah an zor sawng hlak.