Solomonin varna a hni
3
1 Solomon chun Aigupta lal Faraw leh inkungkeina siemin Faraw naunu chu nuhmeiah a nei a, a lal in ding le LALPA Tempul a bawl mèk lai chu an zo hma le kula Jerusalem an inhuon zo hma chun a nuhmei chu Davida khawpuiah a sie a. 2 LALPA Tempul chu bawl a la ni hri si naw leiin mipuihai chu hmunsânga hai an hlănbiek hlak a. 3 Solomon chun LALPA a hmangaizie inentirin, a pa Davida thurosiehai a zawma chuh hmunsangaa hai hlănbiekin rimtui a la raw zing hlak.4 Chun, lal chu hlănbiek inhlăn dingin Gibeon-ah a fe a, chu chu an hmunsang po po laia poimaw tak a nih. Chu taka chun Solomonin pumraw thilhlânah ran sangkhat zet maichama chun a’n hlàn a. 5 Gibeon-a chun zănah a mangin a kuomah LALPA a hung inlăr a, Pathien chun, “I dit dit mi hni la, pe’ng ka ti che” a ta.
6 Solomon chun, “I siehlaw, ka pa Davida kha i lakah ringum le fel takin a um a, lungril ngîl tak a put leiin a chungah lunginsietna nasa tak i’n langtir a. I lunginsietna ropui tak chu inlangtir peiin voisun hin a lalthrungpha chu a naupa i’n hluotir a. 7 Tu hin aw LALPA, ka Pathien, i siehlaw hi ka pa Davida hmunah lalin i mi sie taa chu naupangte chauh ka la ni a, ka mawphurna hlen suok dan ding khom ka la hriet nawh. 8 I mi thlanghai tam tak, an tamzie khom tiem le inchik seng el ruol lohai lai hin i siehlaw hi ka um a. 9 Chuleiin, a sie le a thra thlier thiem a, i mihai ro ka rĕlpĕk theina dingin, i siehlaw hi varna mi pe rawh. Chuong naw chun i mi hieng zozaihai ro hi tu-in am rêl zo an ta?” a ta.
10 Solomon thil hni chun LALPA a suklawm a. 11 A kuomah, “I ta dinga dam sawtna dam, hausakna dam le i hmêlmahai thìna ding dam hni loa rorêl thiemna i hnì leiin, 12 i hnì ang tak chun thawng ka ta, varna le hriet thiem theina lungril pe’ng ka ti che a, nangma ang hrim tu khom an la um ngai naw ang bokin tu khom um nawk ta ngai naw ni hai. 13 Chu bâka chun i mi hni sa lo hausakna le hmingthangna khom pe sa bok ka ti che a, i dam sungin a tluk phak che lal tu khom um naw ni hai. 14 I pa Davidan ka lampui hrawa ka thu a zawm ang boka i khawsa ve chun dam sawtna khom pe’ng ka ti che” a ta.
15 Solomon chu a thrang har a, a mang a nih ti a hriet suok a. Chuongchun, Jerusalemah a kîr nawk a, LALPA Thuthlung Bawm hmaa chun a ngîr a, pumraw thilhlân le inremna thilhlânhai chu a’n hlăn a, chu zoah a khawnbawlhai po po ta dingin ruoi a thre a.
Thubuoi khirh Solomonin a rem
16 Thubuoi nei nawchizor pahni hi lal hmaah an hung ngǐr a. 17 Pakhat lem chun, “Ka lalpa, hi nu le hin in khata um hlak kan ni a, chu ina kan um lai chun nau ka nei a. 18 Ka nau a pienga inthoka ni thumnaa chun ama khomin nau a nei ve a. Keini pahni chauh naw chu kan inah mi dang tu khom an um nawh. 19 Hi nu nau hi zanah a thi a, a del hlum a ni nghé nghè a. 20 Zan rilah a tho a, i siehlawnu in lai chun ka bula zal ka nau chu a lâk a, a zàlpui a, a nau thisa chu ka bulah a hung inzaltir a. 21 Zingkâr ka nau chu nene hang pêk ka tum a, a thi sa a lo ni zing a. Zing khawvarah ka hang en chieng chun ka nau kha a lo ni ta dĕr da’l a!” a ta.
22 Pakhat lem chun, “Ni hlak a tim ie! A dam lem hi ka naupa a na, a thi lem kha i naupa a nih” a ta. A hmasa lem chun, “A teu naw êm el! A thi hi i naupa a na, a dam hi ka naupa a nih” a ta, lal hmaa chun an insĕl ta rak el a.
23 Lal chun, “Hi nu hin ‘A dam hi ka nau a na, a thi lem hi i nau a nih’ a ta, kha nu khan, ‘A thi hi i nau a na, a dam hi ka nau a nih’ a ti tlat bok si a. 24 Chuleiin, kawlhnâm hung la ro” a ta, an hung lak a. 25 Lal chun, “Naute kha a laiah tan bong unla, a chanve chu pakhat kha pe unla, a chanve dang chu pakhat kha pe ro” a ta.
26 Naute dam lai nu chun a nau chu a lunginsiet êm êm a, lal kuomah, “Pu, lunginsiet takin naute dam lai kha pe el ro. That lul naw ro” a ta. Pakhat lem chun, “A tu khomin chang bik nawng kan tih. Tan bong ro” a ta.