2 Israel thlahai lukhaitu po po le thiempuhai le Levi thlahai chu a ko khawm a. 3 Kum sawmthum le a chung tieng Levi thlaa mi pasal an tiem po po chu singthum le sangriet an nih. 4 Chuong laia mi singhni le sangli chu LALPA in bawltuhai inrawitu ding an na, sangrukhai chu hotu le rorêltu ding an nih. 5 Mi sangli chu kotkhar vengtu ding an na, sangli dang chu lalin a pèk rimawi hmangruohai tuma LALPA inpakna hla saktu ding an nih. 6 Davida chun Levihai chu Gerson pawl, Kohat pawl le Merari pawlin a thrè tawl a.

7 Gerson mihai chu Ladan le Simei an nih. 8 Ladan naupahai chu Jehiel, Zetham le Joel an nih. 9 Simei naupahai chu Selemot, Haziel le Haran an nih. Chuonghai chu Ladan sungkuoa lukhaituhai an nih. 10 Chun, Simei naupahai chu Jahat, Ziza (Zina), Jeus le Beria an nih. Chuong mi palihai chu Simei naupahai an nih. 11 Jahat chu a upa tak a na, Ziza chu a pahnina a na, Jeus le Beria chun nau an hau naw leiin sin insem pha leh sung khat angin an tiem hlak.

12 Kohat naupahai chu Amram, Izar, Hebron le Uziel, an rêngin pali an nih. 13 Amram naupahai chu Aron le Mosie an nih. Aron chu thil thienghlim tak inhlantu dinga ser hrang a ni a, ama le a thlahai chu kumkhuoa LALPA bieknaa rimtui rawtu, thilhlânhai inhlàntu, bûr le bel thienghlim hai enkoltu le LALPA hminga mipuihai ta dinga malsawmna hriltu dinga ser hrang an nih. 14 Pathien mi Mosie naupahai chu Levi hnam laia zèl sa an nih.

15 Mosie naupahai chu Gersom le Eliezar an nih. 16 Gersom naupahai laia upa tak chu Subael a nih. 17 Eliezar thlahai laia upa tak chu Rehabia a nih. Eliezer chun naupa dang a nei naw a, sienkhom Rehabia chun naupa tam tak a nei. 18 Izar naupahai laia upa tak chu Selomot a nih. 19 Hebron naupahai laia upa tak chu Jeria, a dottu Amaria, a pathumna Jahaziel le a palina Jekameam an nih. 20 Uziel naupahai chu a upa lem Mika a na, a naupang lem Isia a nih.

21 Merari naupahai chu Mahli le Musi an nih. Mahli naupahai chu Eleazar le Kisa an nih. 22 Eleazar chun naupa nei loin a thi a, naunu chauh a nei a, an laichin Kisa naupain nuhmeiah a nei a. 23 Musi naupahai chu Mahli, Eder le Jerimot, an rêngin pathum an nih.

24 Chuonghai po chu Levi thla, an sungkaw hming inziek dan anga sungkaw lukhaitu, LALPA in bawla thrang, kum sawmhni chin chung tieng an tiem pohai chu an nih. 25 Davida ngeiin, “LALPA Israel Pathienin a mihai chu muongna pe a, ama chu kumkhuoa Jerusalema chêng dinga a hung leiin, 26 Levihai khomin Biekbuk zawn a, bûr le bêlhai an som pei ngai ta naw nih” a lo ti hrim a. 27 Davida thupèk nuhnung tak angin Levihai chu kum sawmhni chin le a chung tieng po tiem an nih.

28 Levihai sinthaw chu Pathien Tempul rongbawla Aron nauhai thrangpui dam, Tempul kot inhuonna sung le pindan sunga thil serhai po po sukthieng le LALPA ina rongbawlna dang hrim hrima inhmang a nih. 29 Bei sie ding dam, bu le bâl inhlàna hmang ding beiphit indip tak buotsai dam, chol thrang lo bei pèr amanih, bêla ur amanih zèu amanih dam, indik thlapa thil bûk le inkhì dam a nih. 30 Chun, tûk tin le zan tieng zâta LALPA kuoma lawmthu hril le inpâk dam, 31 Sabat nia dam, thla thara dam, hunbi nei kûta dam an thaw dinga ruot ang peia LALPA kuoma pumraw thilhlan inhlàn rop dam, 32 Intuokna Puon in enkol dam, Hmun Thienghlim enkol dam, LALPA ina rongbawl, an unau Aron naupahaiin thaw ding an ruot ang pei thaw dam chu an sin a nih.