Thiempuhai sinthaw ding
24
1 Aron thlahai pawl hrang hranga an insiem dan chu hieng ang hi a nih: Aron naupahai chu Nadab, Abihu, Eleazar le Ithamar an nih. 2 Nadab le Abihu chu thla nei loin an pa nêkin an thi hmasa lem a, Eleazar le Ithamar hai chun thiempu sin an thaw a. 3 Eleazar thlaa mi Zadok le Ithamar thlaa mi Ahimelek hai thrangpuiin Davida chun an rongbawl dan ding ang peiin a pawl pawlin a thrè hrang a. 4 Ithamar thlahai nek chun Eleazar thlaa mi chu sungkuo lukhaitu an tam lem daih leiin, chuong ang dungzui chun thre a ni a, Eleazar thlahai chu sungkuo sawm le parukin, Ithamar thlahai chu sungkuo parietin thrè an nih. 5 Eleazar le Ithamar thlahai lai chun Hmun Thienghlima thoktu le Pathien rongbawltuhai an um ve ve si leiin thlei nei bik um lo dingin thrumvawrin an sem a.6 Lal le thoktuhai le thiempu Zadok le Abiathar naupa Ahimelek hai hmaa chun thrum chu Eleazar sungkuo le Ithamar sungkuo inkara chun inkàrthlakin an vawr a, Levi mi, lekha ziektu, Nethanel naupa Semai chun a lo ziek thlak pei a.
7 An vawr hmasa tak chu Jehoiarib chungah a tlu a, a voi hnina chu Jedaia chungah, 8 a voi thumna chu Harim chungah, a voi lina chu Seorim chungah, 9 a voi ngana chu Malkija chungah, a voi rukna chu Mijamin chungah, 10 a voi sarina chu Hakoz chungah, a voi rietna chu Abija chungah, 11 a voi kuona chu Jesua chungah, a voi sawmna chu Sekania chungah, 12 a voi sawm le voi khatna chu Eliashib chungah, a voi sawm le voi hnina chu Jakim chungah, 13 a voi sawm le voi thumna chu Hupa chungah, a voi sawm le voi lina chu Jesebeab chungah, 14 a voi sawm le voi ngana chu Bilga chungah, a voi sawm le voi rukna chu Imer chungah, 15 a voi sawm le voi sarina chu Hezir chungah, a voi sawm le voi rietna chu Hapizez chungah, 16 a voi sawm le voi kuona chu Pethahia chungah, a voi sawmhnina chu Jehezkel chungah, 17 a voi sawmhni le voi khatna chu Jakin chungah, a voi sawmhni le voi hnina chu Gamul chungah, 18 a voi sawmhni le voi thumna chu Delaia chungah, a voi sawmhni le voi lina chu Maazia chungah a tlu a.
19 Chu chu LALPA, Israelhai Pathienin an pu Aron kuoma thu a lo pèk anga amain LALPA Tempula rong an bawl dan ding a lo ruot chu a nih.
Levi chihai
20 Hienghai khom hi Levi chihai laia sungkuo lukhaitu an nih: Amram nauhai lai Subael; Subael nauhai lai Jedeia; 21 Rahabia nauhai lai Isia; 22 Izar-hai lai Shelemot; Shelemot nauhai lai Jahat; 23 Hebron naupahai lai a hmasa takah Jeria, a dotah Amaria, a pathumnaah Jahaziel, a palinaah Jekameam; 24 Uziel nauhai lai Mika; Mika nauhai lai Samir; 25 Mika unauhai lai Isia; Isia nauhai lai Zekaria; 26 Merari nauhai lai Mahli le Munsi; Jaazia nauhai lai Beno: 27 Jaziaa inthokin Beno, Soham, Zakur le Ibri; 28 Mahli nauhai lai Eleazar, naupa nei loa um; 29 Kisa nauhai lai Jerameel; 30 Musi nauhai lai Mahli, Eder le Jerimot.
Chuonghai po chu Levi thlahai laia an sungkaw lukhaituhai chu an nih. 31 An unauhai, Aron thlahai thaw dan angin an sungkuo lukhaitu tak le a naupang tak chen khom rong an bawl dan ding hrietna dingin thrum an vawr hlak a, chu chu lal Davida hai, Zadok hai, Ahimelek hai, thiempuhai le Levi sungkuoa lukhaituhai mithmuah an thaw hlak.