2 Davida chun Israel rama hnam dang umhai chu a ko khawm a, LALPA in bawlna ding lung ser nàm sa buotsaia sertu ding anni laia mihai chu a ruot a. 3 A tuol inhuonna kotkharhai kilna ding le a man nghetna ding hmangruo siemna dingin thir tam tak a pêk a, dâr a pèk zàt lem chu bùk sèng lo a nih. 4 Sidon le Tura mihaiin sidar thing tam tak an hung thon pei a, sidar thing a pek suok zat khom inchik seng lo a nih.

5 Davida chun, “Ka naupa Solomon hi a la naupangin a tonhriet a la tlawm a, LALPA in ding a bawl ding hlak chu hnam tin mithmua mawi ropui le hmingthang tak a ni ding a ni si leiin ka lo buotsaipui lawk ding a nih” a ta. Chuong ang chun Tempul bawlna dinga châk tam tak chu a thi hmain Davidan a lo sek khawm hman a nih.

6 A naupa Solomon chu a ko a, LALPA Israelhai Pathien in bawl dingin thu a pêk a. 7 Davida chun Solomon kuomah, “Ka naupa, LALPA ka Pathien hminga ding in bawl ka lo lungril hlak a. 8 Nisienlakhom, LALPA thu ka kuomah a hung tlung a, ‘Indonaah i thrang rawn a, thisen tam tak i lo insuo ta a. Hi hnuoia hin ka mithmuah thisen i’n suo rawn ta leiin ka hminga ding in bawl thei naw ti nih. 9 Ngai ta, naupa la nei i ta, ama chu inremna dit mi ni’ng a ta, a vêl rama a hmêlmahai po po laka chun ralmuongna pe’ng ka ta, a hming chu Solomon ning a ta, ama inlal sungin inremna le muongna pe’ng ka tih. 10 Ama chu ka hminga ding in bawltu ding chu a nih. Ama chu ka naupa ni’ng a ta, kei chu a pa ni’ng ka tih. Israelhai chunga a ram lalthrungpha chu kumkhuoa dingin suknghet ka tih’ tiin

11 “Tuhin ka naupa, LALPA chu i kuomah um sien la, hmuingil pei la, LALPA i Pathienin a in bawl dinga a ti chê hi hung bawl hlawtling ngei rawh. 12 Israelhai chunga rorêltuah LALPAN a sie phä chè leh varna le hriet thiemna pe sien la che, chuongchun LALPA i Pathien dan chu zawm thei i tih. 13 Israelhai chungchang thua thuruothai le danhai LALPAN Mosie a pek kha i zawm phot chun hmuingil pei i tih. Hrat tak le huoi takin um rawh; tri naw la, zâm bok naw rawh.

14 “Inrim takin LALPA in bawlna dingin rangkachak kilogram maktaduoi thum le nuoi li le tangkaruo kilogram maktaduoi thum le nuoi li, dâr le thîr khom bùk seng lo le thing le lung châkkhai ka lo lak khawm ta a, sienkhom i la làk sà ngai a tih. 15 Sinthawtu, thing âttu, lung sertu le themthiem, iengkima hmang thei i nei treu ta a, 16 rangkachak le tangkaruo, dâr le thîr le kut themthiem inchik seng ruol lo i nei ta bok leiin bawl tran nghal el ta rawh, LALPA chu i kuomah um raw se” a ta.

17 Davida chun Israel hnama lukhaituhai po po kuomah a naupa Solomon chu thrangpui dingin thu a pêk a. 18 “LALPA in Pathien chu in kuomah a um a ni naw am a ni? Sîr tinah ralmuongna a pêk cheu a ni naw am a ni? Hi rama mihai hi ka kutah a hung inhlàn ta a, ram hi LALPA le a mipuihai thu hnuoia um a ni tah. 19 LALPA in Pathien tieng nghain, lungril le thlarauin a rong bawl unla, LALPA Thuthlung Bawm le Pathien ta dinga hmangruo thienghlimhai chu LALPA hminga ding Tempul in bawla chun in làk lût vat theina dingin Tempul bawl chu tran ta ro” a ta.