3 Joab chun lal kuomah, “LALPA i Pathien chun i mipuihai a lêt zain sukpung raw se. Ka pu le ka lal, chuonghai po po chu i khuo le tui an ni naw am a ni? Ieng leia ka pu, lal hin hieng thil hi a thaw châk am a na? Ieng leiin am Israelhai chungah thiemnawna chu a’n tlungtir ding a na?” a ta. 4 Joab le sipai kawmandarhai thu nêkin lal thu chu a hrât lem si leiin Israelhai tiem dingin lal chu a suoksan a, Israel ram po po a fang a, Jerusalemah a hung kir nawk a. 5 Joab chun Israel mi ral do thei, kawlhnâm chawi chin zat a ripawt chu maktaduoi khat le nuoi khat le Judai rama mi, kawlhnâm chawi chin mi nuoili le singsari an nih. 6 Levihai le Benjaminhai ruok chu a tiem sà ve nawh, lal thupek chu Joab theida zawng tak a ni si a. 7 Chu thupek chu Pathien mithmuah thil suol a ni leiin Israel chu a hrem a.

8 Davida chun Pathien kuomah, “Ka thilthawa hin nasa takin ka suol a nih. Sienkhom tu hin i siehlaw thiemnaw changna hi ngaidam hram rawh. Thil invetthlâk tak ka lo thaw si a” a ta. 9,10 LALPA chun Davida zawlnei Gad kuomah, “Fe la, hieng ang hin Davida hril rawh: ‘Hi hi LALPA thu chu a nih: thil kong thum thlang ding ka pêk che laia mi hi i chunga tlung dinga i nuom tak pakhat thlang rawh’ a tih” tiin.

11 Chuongchun, Gad chu Davida kuomah a fe a, “LALPAN hieng hin a hril: 12 ‘I rama hin kum sari^a tràm intlâktir am, thla thum sung i hmêlmahaiin chem tum le an hnot lènga um am, an naw leh i rama ni thum sung LALPA kawlhnàm, hripui inlèngtir a, vantirkoin Israel ram hmun tin a suosam, a ieng am i thlang a? Tu hin inngaituo la, a mi tirtu kuoma ka hril ding thu tlukna siem la, chu chu mi hril rawh” a ta. 13 Davida chun Gad kuomah, “Ka bei a va hang dong ngei de! LALPA kutah tlu lût phot el ka tih, zangaina a hau hle si a. Mihriem kuta chu mi pe lût naw hràm rawh” a ta.

14 Chuongchun, Israel mihai chungah LALPAN hripui a’n lèngtir a, Israel mi singsari an thi a. 15 Chun, vantirkoin sukse dinga Jerusalem tieng ban a phar lai chun, an siet tuok ding laka chun LALPA lung a na leiin kut a’n hnûkkirtir a, mipuihai hremtu vantirko kuoma chun, “A hun tah! I kut kei kîr ta rawh” a ta. Chu lai chun LALPA vantirko chu Jebu mi Arauna hrizawla ngîr a nih.

16 Davida chu a hang ngha a, hnuoi le van inkara vantirko ngîr, a kuta kawlhnâm chawi a, Jerusalem chunga inlet zing chu a hmu a. Chu phing leh saiip sila ngîr Davida le a upahai chu hnuoi sikin an bokkhup a. 17 Davida chun LALPA kuomah, “Ral do thei chin mi tiem dinga thupetu chu keima hi ka ni naw am a ni? Kei hi thilsuol thawa poi tawktu chu ka na, mi danghai hi chu beram ang mei mei an nih. Ieng am anni hin suol thaw an nei hrim a? Aw LALPA ka Pathien, i kut chu kei le ka sunghai chunga hin thlâk lem la, hripui hi i mihai chungah inlèngtir zing ta naw raw khai” a ta.

18 LALPA vantirko chun zawlnei Gad chu Davida kuomah a tir a, “Fe tung la, Jebu mi Arauna hrizawlah LALPA ta dingin maichàm siem rawh” tiin a hang hril a. 19 LALPA hminga Gad-in thu a pek chu zawmin, Davida chu a fe tung a. 20 Arauna’n bu a chìl lai chun a hang ngha a, LALPA vantirko a hmu a, a bula um a nauhai pali chu an inbi a. 21 Davida chun a va pan a, Arauna chun a hei hmu phing leh hrizawla inthok chun a hung suok a, a hmaah hnuoi sika bokkhupin lal chu chibai a bûk a.

22 Davida chun a kuomah, “Mipuihai laka hri a’n kieng theina dinga LALPA ta dinga maichàm siemna ding i hrizawl hi a man tlingin min chawktir raw khai” a ta.

23 Arauna chun Davida kuomah, “Ka pu, ka lal chun awm a ti ang ang chu la raw se. En ta, pumraw thilhlâna ding bawngchal le thinga ti ding hrizawl hmangruohai le bu le bâl thilhlâna hmang ding huit khom pe’ng ka ti che. Hieng po po hi keiman tum vong ka tih” a ta. 24 Sienkhom lal chun Arauna kuomah, “Ni lo e, a man kim pe ngeiin ka’n chawk ding a nih. Man loin i ta chu LALPA ta dingin la nawng ka ta, pumraw thilhlân khom inhlàn bok naw ning” a ta.

25 Chuongchun, hrizawl hmun inchawkna dingin Davida chun Arauna chu rangkachak tangkaruo sekel zaruk^b a pêk a. 26 Davida chun maichàm a siem a, pumraw thilhlân le inremna thilhlân a’n hlàn a. LALPA chu a ko a, LALPA chun vana inthokin maichàm chunga pumraw thilhlâna chun mei zuk tirin a hung don a.

27 LALPA chun vantirko chu thu a pêk a, a kawlhnâm chu a pâiah a thun nawk ta a. 28 Jebu mi Arauna hrizawla chun LALPAN a hung don ngei a nih ti Davidan a hmu chun hlànbiek a’n hlàn a. 29 Chuong lai chun thlalera Mosien LALPA biekbuk le pumraw thilhlân inhlànna dinga maichàm a siem chu Gibeon khuo hmunsânga um a la ni a. 30 LALPA vantirko kawlhnâm chu Davidan a tri leiin chu hmuna chun Pathien rawn dingin a fe ngam naw a nih.