Israel lal Jehoahaz
13
1 Juda lal Ahazia naupa Joas inlala inthoka kum sawmhni pathumnaa chun Jehu naupa Jehoahaz chu Samaria khawpuiah Israelhai lalin a hung inthrung a, kum sawm le kum sari ro a rèl a. 2 LALPA mithmuah thil suol a thaw hlak a, Nebat naupa Jeroboam suolna kha chîng vein, Israelhai chu thil suol a’n thawtir a, chu lampui chu a maksan ta nawh. 3 Chuong lei chun LALPA lung chu Israel chungah a chok a, hun sawt tak sung chu Aram lal Hazael le a naupa Ben Hadad thuhnuoiah a pêk tawl tah a nih.4 Jehoahaz chun LALPA ditsakna a ngên rak a, Aram lalin Israelhai a sukrimsik nasatzie chu LALPAN a hmu leiin a thu chu a lo ngaithlakpèk a. 5 LALPA chun sansuoktu a pêk a, Aramhai thuneina hnuoia inthok chun an intàl suok a, kha hma ang bok khan Israelhai chu mani in lumah muong takin an khawsa nawk ta a. 6 Amiruokchu, Israelhai thil suol inthawtirtu Jeroboam sungkuohai suolna kha an la maksan chuong naw a, an la sunzom pei a, Asera lim thinghai khom Samaria khawpuia chun an la ngir zing tho.
7 Jehoahaz chun sakor chungchuong mi sawmnga le tawlailir sawm le sipai singkhat chauh naw chu sipai a nei zo ta naw a, Aram lalin a dang po po chu a sukram vong a, bu vuok huna hrizawla pilvut ang elin a’n changtir tawl a nih. 8 Jehoahaz inlal sunga thil tlung danghai le a thilthawhai chu Israel lalhai inlal laia an chanchin inziekna lekhabuah a chuong. 9 Jehoahaz chu a thlatuhai kuomah a chawl a, Samaria-ah an phùm a, a naupa Jehoas chun a lalna chu a hung hluo a.
Israel lal Jehoas
10 Judai ram lal Joas inlala inthoka kum sawmthum le kum sarinaa chun Jehoahaz naupa Jehoas chu Samaria khawpuiah Israelhai lalin a hung inthrung a, kum sawm le kum ruk a’n lal a. 11 LALPA mithmuah thil suol tak a thaw a. Israelhai thil suol inthawtirtu Nebat naupa Jeroboam suolnahai chu bansan nekin a chîng zui pei lem a.
12 Jehoas inlal sunga thil tlung danghai, a thilthawhai le hlen suokhai le Juda lal Amazia le an indo thuhai chu Israel lalhai inlal lai chanchin inziekna lekhabuah a chuong. 13 Jehoas chu a thlatuhai kuomah a chawl a, Jeroboam chun a lalna chu a hung hluo ta a. Jehoas chu Samaria khawpuiah Israel lalhai lai an phŭm a.
Elisa a thi
14 Elisa chu thi ngamin a damnaw a. Israel lal Jehoas chun a zu kan a, “Pa, pa, Israel vengtu ropui” tia insamin a tra a. 15 Elisa chun, “Thalngul le thal iemani zat hung la rawh” a ta, a hung làk a. 16 Elisa chun Israel lal kuomah, “Thalngul kha chel rawh” a ta, a hang chel chun a kut chungah Elisa chun kut a’n nghat a. 17 “Sak tieng tukver kha hong rawh” a ta, lal chun a hong a. Elisa chun, “Kâp raw leh” a ta, a kâp a. “LALPA hnèna thal, Aramhai chunga LALPA hnèna thal a nih. Afek hmunah Aramhai chu boral dèr khopin i hnè ding a nih” tiin a puong a.
18 Chun, “Thalhai kha la rawh” a ti nawk a, lal chun a lâk a. “Hnuoi sun rawh” a ta, voi thum a sun a. 19 Pathien mi chu lal chungah a lung a sen a, “Voi nga voi ruk lai sun la chu Aramhai tukdolin i sukram vong tawl ding a ni vei leh. Voi thum chauh i sun leiin voi thum chauh hne’ng i tih” a ta.
20 Elisa chu a thi a, an phùm a. Kum a hung invoi chun Moab-haiin an ram chu thrâlah an hung rùn a. 21 Mi pakhat an phûm ding lai tak hin rûntu pawl an hmu thut a, a ruong chu Elisa thlàna chun an thlàk a. A ruongin Elisa ruhai a zuk tawk chun mithi chu a hung hring nawk a, a ngîr el ta a.
Israelhai le Aramhai
22 Aram lal Hazael chun Jehoahaz inlal sung po po chun Israelhai chu a sukrimsi hle a. 23 Nisienlakhom, Abraham hai, Isak hai le Jakob hai kuoma a thuthlung leiin LALPAN anni chu a hmangai a, a lainat a, a ngaisak a. Tu chen hin anni chu sukbohmang a nuom naw a, a kuoma inthokin a pei hmang nuom bok nawh.